اپیلیٹ فورم نوں مقدمہ دوبارہ فیصلے لئی واپس بھجوان دا اختیار وی حاصل اے: وفاقی آئینی عدالت
نیشنل بینک ورکرز ویلفیئر یونین دے انتخابات بارے متنازع دعویاں دے فیصلے لئی حقائق تے شواہد دا جائزہ ضروری
این آئی آر سی دے فل بینچ کول اپیلیٹ اختیار نوں مؤثر بناؤن لئی ضروری اختیارات وی موجود، اسلام آباد ہائیکورٹ دا فیصلہ برقرار
اسلام آباد (اے پی پی) کسے قانونی فورم نوں اپیل سنن دا اختیار حاصل ہووے تاں اوہ مقدمہ ازسرِنو فیصلے لئی متعلقہ فورم نوں واپس بھجوا سکدا اے، ایدے لئی قانون وچ وکھری تے واضح اجازت ضروری نہیں۔ وفاقی آئینی عدالت نے نیشنل بینک ورکرز ویلفیئر یونین دے آئین وچ ترامیم دے معاملے اُتے این آئی آر سی دے فل بینچ دے اختیار نوں قانونی قرار دیندے ہوئے یونین دیاں اپیلاں خارج کر دتیاں تے اسلام آباد ہائیکورٹ دا فیصلہ برقرار رکھیا۔
چیف جسٹس جسٹس امین الدین خان تے جسٹس علی باقر نجفی اُتے مشتمل دو رکنی بینچ نے قرار دتا کہ انڈسٹریل ریلیشنز ایکٹ 2012 دے سیکشن 58 دے تحت نیشنل انڈسٹریل ریلیشنز کمیشن (این آئی آر سی) دے فل بینچ نوں اپیل سنن دے نال اوہ ضروری ضمنی اختیارات وی حاصل نیں، جیہڑے اپیلیٹ اختیار نوں مؤثر بناؤن لئی درکار ہون۔
عدالت نے اپنے فیصلے وچ آکھیا کہ جے کسے مقدمے وچ طریقہ کار دی خامی یا حقائق دے تعین وچ کمی رہ گئی ہووے تاں اپیلیٹ فورم متعلقہ حکم کالعدم قرار دے کے معاملہ دوبارہ فیصلے لئی واپس بھجوا سکدا اے۔ قانون وچ ریمانڈ دا اختیار وکھرے طور اُتے واضح نہ ہون دا مطلب ایہ نہیں کہ اپیلیٹ فورم اس اختیار توں محروم اے۔
فیصلے مطابق این آئی آر سی دے فل بینچ نے 19 دسمبر 2023 نوں یونین دے آئین وچ مجوزہ ترامیم دی منظوری دا حکم کالعدم قرار دیندے ہوئے تمام متعلقہ فریقین نوں سماعت دا مؤثر موقع فراہم کرن توں بعد معاملے دا ازسرِنو فیصلہ کرن دی ہدایت کیتی سی۔
اس حکم وچ فریقین دے بنیادی حقاں دا حتمی تعین نہیں کیتا گیا سی۔
وفاقی آئینی عدالت نے قرار دتا کہ دائرہ اختیار دا سرے توں موجود نہ ہونا تے قانونی اختیار حاصل ہون دے باوجود اس دے استعمال وچ غلطی ہونا، دو وکھ وکھ معاملے نیں۔ این آئی آر سی دے فل بینچ نوں سیکشن 58 دے تحت اپیل سنن دا اختیار حاصل سی، ایس لئی معاملہ دوبارہ فیصلے لئی واپس بھجوان دا حکم دائرہ اختیار توں تجاوز نہیں سی۔
عدالت نے مزید آکھیا کہ یونین دے انتخابات، رکنیت، آئینی ترامیم تے عہدیاں بارے فریقین دے متنازع دعویاں دا فیصلہ کرن لئی حقائق تے شواہد دا جائزہ لینا ضروری اے، جس دا بنیادی اختیار متعلقہ خصوصی قانونی فورم کول اے۔ آئینی عدالت دا دائرہ اختیار نگرانی دی نوعیت دا اے تے عام طور اُتے اس نوں متنازع حقائق دا ازسرِنو جائزہ لین لئی استعمال نہیں کیتا جا سکدا۔
عدالت نے قرار دتا کہ اسلام آباد ہائیکورٹ نے این آئی آر سی دے حکم وچ مداخلت نہ کرکے درست فیصلہ کیتا، کیونکہ ریمانڈ دے حکم نال فریقین دے بنیادی حقاں دا حتمی فیصلہ نہیں ہویا سی تے نہ ہی انہاں نوں ناقابلِ تلافی نقصان پہنچیا سی۔
وفاقی آئینی عدالت نے اپیل دی اجازت دین توں انکار کردے ہوئے دونے درخواستاں خارج کر دتیاں تے اسلام آباد ہائیکورٹ دا 6 مئی 2026 دا فیصلہ برقرار رکھیا۔ عدالت نے متعلقہ قانونی فورم نوں ہدایت کیتی کہ تمام فریقین نوں مؤثر سماعت دا موقع فراہم کرکے معاملے دا قانون مطابق ازسرِنو فیصلہ کیتا جاوے تے وفاقی آئینی عدالت دے فیصلے وچ دتیاں گئیاں آبزرویشنز نوں مقدمے دے حتمی فیصلے اُتے اثرانداز نہ ہون دتا جاوے۔
