مولانا دی تقریر وچ کجھ لفظ نہ ہوندے تے بہتر سی: بیرسٹر گوہر

جمہوریت نوں نقصان پہنچاؤن والے اقدامات توں گریز کرنا چاہیدا اے: گفتگو، فاروق ایچ نائیک نے آکھیا کہ ایمرجنسی وچ کمیٹی بنانا غیر آئینی اے: اسد قیصر

اسلام آباد (این این آئی، آئی این پی) پاکستان تحریک انصاف دے چیئرمین بیرسٹر گوہر نے آکھیا اے کہ مولانا فضل الرحمان صاحب دی تقریر وچ کجھ لفظ نہ بولے جاندے تے بہتر ہوندا۔ انہاں دی تقریر دے جواب وچ جس طرح حملے کیتے گئے، اوہ وی نامناسب نیں۔ سیاسی قیادت تے جمہوریت نوں نقصان پہنچاؤن والے اقدامات توں گریز کرنا چاہیدا اے۔

پارلیمنٹ ہاؤس دے باہر میڈیا نال گل بات کردیاں انہاں ہور آکھیا کہ بیرونی انتشار دا پوری قوم رل کے مقابلہ کردی اے۔ ملک وچ کشیدگی ودھاؤن دی بجائے سیاسی رہنماؤں نوں اپنا کردار ادا کرنا چاہیدا اے۔ ملک وچ تناؤ کافی حد تک ودھ چکیا اے، ہن کشیدگی ہور نہیں ودھنی چاہیدی۔ اساں ریڈ لائن کراس کرن والے نہیں، ساڈا مؤقف اے کہ پاکستان پہلے تے ریاست پہلے۔

دریں اثنا پی ٹی آئی رہنما تے قومی اسمبلی دے سابق سپیکر اسد قیصر نے قومی اسمبلی وچ گل کردیاں آکھیا کہ فاروق ایچ نائیک نے آکھیا اے کہ ایمرجنسی وچ کمیٹی بنانا غیر آئینی اے۔ کی پیپلز پارٹی اس دے خلاف کوئی قرارداد لے کے آوے گی؟ عمران خان دیاں بھیناں نوں رہا کیتا جائے۔ ارباب شیر علی نال پیش آون والا واقعہ بہت تشویشناک اے۔ ساڈے رہنما کتھے نیں تے انہاں نوں کس قانون دے تحت حراست وچ رکھیا گیا اے؟

انہاں ہور آکھیا کہ مینوں گل کرن دا موقع نہیں دتا گیا، جس دا مینوں شدید گلہ اے۔