خیبر پختونخوا: صحت کارڈ پلس پروگرام وچ بے ضابطگیاں سامنے آ گئیاں
70 فیصد دی بجائے صرف 15 فیصد تک رعایت اُتے ادویات خریدیاں گئیاں: آڈٹ رپورٹ، خریداری دا نظام ڈیجیٹل کرن تے تھرڈ پارٹی آڈٹ کراؤن دی سفارش
پشاور (مانیٹرنگ ڈیسک) خیبر پختونخوا دے صحت کارڈ پلس پروگرام وچ ادویات تے طبی سامان مہنگے بھاؤ خریدن دا انکشاف ہویا اے۔ خریداری دے نظام وچ سنگین مالی بے ضابطگیاں دی وجہ توں سرکاری خزانے اُتے غیر ضروری مالی بوجھ پین دی نشاندہی کیتی گئی اے۔
صحت کارڈ پروگرام بارے آڈٹ رپورٹ دے مطابق سرکاری سطح اُتے ادویات دی خریداری وچ 70 فیصد تک رعایت حاصل کرن دی گنجائش موجود اے، پر صحت کارڈ پلس نال منسلک ہسپتالاں وچ صرف 15 فیصد تک رعایت اُتے ادویات خریدیاں گئیاں۔
رپورٹ مطابق صحت کارڈ پلس دے مجموعی طبی اخراجات دا 40 توں 45 فیصد حصہ ادویات، طبی آلات تے ہور طبی سامان اُتے خرچ ہوندا اے۔ وکھ وکھ طریقیاں نال خریداری کرن دی وجہ توں سرکاری خزانے نوں وڈا مالی نقصان ہو سکدا اے۔
رپورٹ وچ سفارش کیتی گئی اے کہ صحت کارڈ پلس دے تحت ادویات تے طبی سامان دی خریداری دے نظام نوں ڈیجیٹل بنایا جائے تے خریداری دا تھرڈ پارٹی آڈٹ کروایا جائے۔
