پاکستان تے ترکیہ دے تعلقات نوں خوشحالی وچ بدلاں گے: وزیراعظم
مشکل ویلے وچ ہمیشہ نال کھڑیا، دوستی ہور مضبوط ہووے گی: تقریب نال خطاب
جی بی دے ترقیاتی منصوبیاں بارے جائزہ اجلاس، فنڈز دی فراہمی یقینی بناؤن دی ہدایت
اسلام آباد (اے پی پی، نامہ نگار) وزیراعظم محمد شہباز شریف نے پاکستان تے ترکیہ دی دوستی نوں ہور مضبوط کرن دے عزم دا اعادہ کردے ہوئے آکھیا کہ دوناں ملکاں دے تعلقات نوں مشترکہ منصوبیاں تے خوشحالی وچ بدلنا اے۔
ایہہ گلّاں انہاں نے جمہوریہ ترکیہ دی 103ویں سالگرہ دی تقریب نال خطاب کردے ہوئے آکھیاں۔ سفارت خانے آمد اُتے ترک سفیر عرفان نذیر اوغلو نے وزیراعظم دا خیرمقدم کیتا۔
وزیراعظم نے اپنے خطاب وچ صدر رجب طیب اردوان، ترکیہ دی حکومت تے ترک عوام نوں قومی دن دیاں مبارکاں دتیاں۔ وزیراعظم نے آکھیا کہ ترکیہ نے ہر مشکل ویلے پاکستان دا بھرپور ساتھ دتا اے۔ انہاں آکھیا کہ بھارتی جارحیت دوران ترکیہ دی حمایت پاکستانی عوام لئی حوصلے دا باعث بنی۔ دوناں ملکاں دے درمیان سٹریٹجک تعاون نوں ہور وسعت دین لئی پرعزم آں۔
تقریب دوران وزیراعظم، نائب وزیراعظم تے ترک سفیر نے سالگرہ دا کیک وی کٹیا۔
دریں اثنا وزیراعظم دی زیرِ صدارت گلگت بلتستان (جی بی) وچ ترقیاتی منصوبیاں بارے جائزہ اجلاس ہویا۔ اجلاس وچ وزیراعظم نے متعلقہ وزارتاں تے اداریاں نوں ہدایت کیتی کہ جاری ترقیاتی منصوبیاں اُتے کم دی رفتار ہور تیز کیتی جاوے تے لوڑین٘دے فنڈز دی فراہمی یقینی بنائی جاوے۔
