قومی اسمبلی دا اجلاس کورم دی کمی، سیاسی کشیدگی برقرار رہی
تِن واری کورم دی نشاندہی، دو واری کارروائی تقریباً اک اک گھنٹے لئی معطل رہی
مہنگائی تے بے روزگاری اُتے بحث نہ ہو سکی، پی ٹی آئی دے مطالبے ایوان وچ چھائے رہے
اسلام آباد (سید قیصر شاہ) قومی اسمبلی دا غیر معینہ مدت لئی ملتوی ہوݨ والا اجلاس حکومت تے اپوزیشن دی کشیدگی، نوک جھوک تے الزام تراشیاں دی نذر ہو گیا۔ ایوان وچ قانون سازی تاں ہوئی، پر مہنگائی تے بے روزگاری ورگے عوامی مسئلیاں اُتے کوئی قابلِ ذکر بحث نہ ہو سکی۔
پی ٹی آئی دیاں سرگرمیاں گورنر راج تے ایمرجنسی دی مخالفت، بانی پی ٹی آئی نال ملاقات، علاج معالجے تے انہاں نوں ہسپتال منتقل کرن دے مطالبیاں تک محدود رہیاں، جدکہ جے یو آئی نے وی ممکنہ گورنر راج تے ایمرجنسی دے معاملے اُتے حکومت نوں تنقید دا نشانہ بنایا۔
اجلاس دوران تِن واری کورم دی نشاندہی کیتی گئی۔ دو واری کورم پورا نہ ہوݨ اُتے کارروائی تقریباً اک اک گھنٹے لئی معطل کرنی پئی، جس دے باعث ارکان سوالاں دے جواب تے ضمنی سوالاں توں محروم رہے۔ اک حکومتی رکن نے وی سوال چکیا کہ کی حکومت تے اپوزیشن رل کے وقفہ سوالات معطل کراؤن لئی کورم دی نشاندہی کردیاں نیں؟
سوال ایہہ اے کہ حکومتی ارکان اپنی حاضری یقینی کیوں نہیں بناؤندے تے اپوزیشن عوامی مسئلے اجاگر کرن دی بجائے کارروائی کیوں رکوا دیندی اے؟ پارلیمنٹ عوام دی ترجمانی دا ادارہ اے، ایس نوں سیاسی محاذ آرائی دا مرکز نہیں بننا چاہیدا۔
اجلاس جس سیاسی کشیدگی وچ ملتوی ہویا اے، اوہدے اثرات ایوان توں باہر وی محسوس ہوݨ دا امکان اے۔ سیاسی درجہ حرارت گھٹاؤن لئی اکابرین نوں اگے ودھ کے پہل کرنی ہووے گی تے نفرت دیاں اگاں نوں بجھانا ہووے گا۔
