خبردار! گھبران دی ہر گز لوڑ نہیں

لکھت:ےیاسر الطاف رانا

ایس پاکستانی قوم دا المیہ اے کہ اوہ تہتر ورہے توں بار بار ایہناں لوکاں نوں آزما رہی اے جیہڑے ہر وار بھیس بدل کے آندے نیں تے ایہناں نوں بھیس بدلن وچ سہولت کاری ایس نظام دے تحت سدا حکمرانی کرن والا اوہ طبقہ کر رہیا اے جیہڑا بظاہر تے وکھائی نہیں دیندا پر پردہ سکرین اُتے انھیاں نوں وی وکھائی دے رہیا اے کیوں جے ایہناں دے کول طاقت اے ایس لئی ایہناں نوں ویکھ سن کے وی ایہناں ول انگلی تیکر چکن دی جرت نہیں کیتی جاندی پر ایہہ گل یاد رکھن والی اے کہ ایس سرمایہ دارانہ تے اونچ نیچ دے طبقاتی نظام دے ہوندے ہوئے کدی تبدیلی نہیں آئے گی۔
تے اج دی تبدیلی والی حکومت جس دے موجد موجودہ وزیراعظم عمران خان نیازی نیں تے ایس حکومت نوں بنے اج دو ورہے ہون نوں آئے نیں پر جیہڑی تبدیلی ہوئی اے اوہ بوہت واضع تے عیاں اے بلکے مزید گھمبیر خرابیاں، معیشت دی زبوں حالی، بیروزگاری تے سیاسی مخالفین توں انتقام توں علاوہ کجھ وی نہیں بدلیا۔
پر مصیبت ایہہ وے کہ ساڈی قوم انتہائی جذباتی تے جلد باز اے اوہ ہر کم فوری فوری ہوندا ویکھنا چاہندی اے پر شاید اوہ ایہہ نہیں جان دی کہ چہرے بدلن نال نظام نہیں بدلدے تے نظام اودوں ای بدلدے نیں جدوں سوچ دا معیار بہتر نظام دی تعلیم تربیت تے سکھن دے عمل توں لنگھ کے بہترین سیاسی نظریے دی پختگی پالے تے عمل درآمد دی پہلی پوہڑھی اُتے پیر رکھے تے ایہناں لوکاں نوں اگے لے کے آئے جیہڑی ذاتی مفادات توں بالا تر ہو کے قومی مفادات نوں مقدم سمجھدے ہون تے ایہہ کم کوئی اک دو مہینے یا اک دو ورہے دا نہیں بلکے ایہہ اک اتقائی عمل مسلسل اے جیہڑا شروع ہوئے گا تے اک دن انج دا نظام وی آ جائے گا جس نوں تبدیلی کہیا جاندا اے جویں یورپ وچ فلاحی ریاستاں دے قیام وچ کئی صدیاں لگیاں سن تے اج اوہ لوک انج دے معاشرے وچ رہ رہے نیں جتھے بندیاں دیاں ضرورتاں ریاست دی ذمے داری اے۔
گویا کہ اج ایس حکومت دے وجود نوں دو ورہے ہون نوں آئے نیں پر درستگی دی بجائے خرابیاں نیں کہ دن بدن ودھدیاں جا رہیاں نیں لاطینی امریکہ نال تعلق رکھن والے انقلابی لیڈر کامریڈ چی گویرا دا کہنا اے کہ میں نجات دہندہ نہیں واں، نجات دہندہ وجود نہیں رکھدے لوک اپنی نجات آپ حاصل کردے نیں، چی گویرا ارجنٹینا دا رہن والا سی پر ایس نے کیوبا دی آزادی دی تحریک وچ حصہ لیا اوہ سرمایہ دارانہ استماریت نال شدید نفرت کردا سی اوہ ارجنٹینا یا کیوبا ای نہیں بلکے پورے لاطینی امریکہ نوں ای غلامی دیاں زنجیراں توں آزاد کروانا چاہندا سی، ایس نے فیڈل کاسترو دے نال مل کے جدوجہد کیتی تے فلاحی حکومت قائم کیتی جیہڑی اج وی ایسے نظریے اُتے قائم اے چی گویرا دا حوالہ دین دا مقصد صرف ایہہ وے کہ جدوں تیکر عوام معاشرہ آپ اپنے آپ نوں سدا ر کے حکمراناں توں آزاد نہیں کروانا چاہن گے اودوں تیکر دنیا دی کوئی طاقت نا تے ساڈے حالات بدل سکدی اے تے نا کسے انج دی تبدیلی دا سوچیا جا سکدا اے جس تبدیلی دے ٹرک دی بتی دے پچھے تہتر ورھے توں ایس قوم نوں چہرے بدل کے نعرے بدل کے کدی اسلامی نظام دے نفاذ دا دھوکا دے کے تے کدی لبرل پاکستان دا دھوکا دے کے ہن عمران خان دی صورت وچ مدینہ دی ریاست تے احتساب دے ناں اُتے پوری قوم نوں مزید غربت بے روزگاری لا علاجی تے بھُک دی دلدل وچ پھسایا جا رہیا اے۔
کیہ اج دو ورہے لنگھن دے باوجود وی ایس قوم نوں سمجھ نہیں آ رہی کہ نا تے ایس نوں پجاہ لکھ گھر ملے نا ای اک کروڑ نوکریاں لبھیاں بلکے کم نا ہون دی وجہ نال ہزاراں بندیاں نوں نوکریاں توں فارغ کر کے بے روزگار کر دتا گیا نا ای ایہناں دی زندگیاں وچ کوئی تبدیلی آئی بلکے ملک اُتے غیر ملکی تے آئی ایم ایف دے قرضیاں دا بوجھ پہلے توں وی زیادہ ہو گیا اے ضروریات زندگی دی ہر شے مہنگی وی ہو گئی اے تے نایاب وی نیں۔
کیہ اج عوام نوں وکھائی نہیں دے رہیا کہ پچھلے تہتر ورھیاں وچ جہڑے لوک ساڈے اُتے حکومتاں کر کے سانوں ایس حال وچ لے آئے نیں کہ دو ویلے دی روٹی کمانا وی محال ہو چکیا اے تے نیازی صاحب دی ایس تبدیلی والی ریاست مدینہ وچ وی اوہ ای جاگیردار سرمایہ دار ملاں دے مالک تے پیر گدی نشین براجمان نیں جیہڑے اک مافیہ دی شکل اختیار کر چکے نیں تے یاد رکھیا جائے وزیراعظم نیازی وی ایہناں دی مہربانیاں توں حکومت بنائے بیٹھا اے تے ایہناں ای الیکٹیبلز دی عوام دشمن غریب دشمن پالیسیاں اُتے عمل پرا اے۔
چینی سکینڈؒ آٹا سیکنڈل لینڈ مافیہ پٹرول مافیہ ایہہ سب اج وی نیازی دے نیڑے تے کچن کبنٹ وچ شامل نیں تے حالیہ بجٹ تیرہ ارب روپئے اپنے تاجر وزیر دی کھاد فیکٹری لئی رکھے گئے نیں۔ پٹرول تے سستا کر دتا پر عوام پٹرول دی اک اک بوند نوں ترسی ہوئی اے جنہاں پٹرولیم کمپنیاں نوں پٹرول سٹاک کرن اُتے چار کروڑ روپئے جرمانہ کیتا گیا سی تے اج پٹرول مافیہ نوں فائدہ دین لئی تقریباً 26 روپئے پٹرولیم مصنوعات مہنگی کر کے عوام اُتے پٹرول بم ڈیگیا گیا تے ایہناں پیٹرولیم کمپنیاں نوں تن سو ارب روپئے دا فائدہ دے دتا گیا اے تے مزے دی گل ایہہ وے کہ تبدیلی خان صاحب دے مشیر پٹرولیم ندیم بابر نیں جیہڑے اج وی کئی پٹرولیم کمپنیاں دے شیئر ہولڈر نیں کیہ ایہہ وے تبدیلی تے مدینہ دی ریاست جس فلاحی ریاست دا وعدہ کیتا گیا سی۔
اج عمران خان دی پرانی تقریراں چُک کے ویکھ لوئو جنہاں وچ کہیا جاندا سی کہ روزانہ بارہ سو ارب روپئے دی کرپشن کر کے منی لانڈرنگ دے ذریعے بار گھل دتے جاندے نیں اج اسیں پچھنے آں تے حق بجانب آں کہ جناب اعلیٰ جدوں تہاڈی حکومت بنی اے تے ہن نا تے کرپشن ہو رہی اے تے نا ای منی لانڈرنگ تے بارہ ارب روپئے دے حساب نال اک مہینے دے تن سو سٹھ ارب روپئے بن دے نیں تے 24 مہینیاں دے حساب نال ایہہ تقریباً باون ارب ڈالر بن دے نیں جہڑے اج ایس ایماندار حکومت نے پچھلے چوراں نوں نسا کے بچائے نیں تے ہور کجھ نہیں تے چلو ایس 52 ارب ڈالر دا ای حساب دے دیو جے حساب وی نہیں دینا تے گھٹو گھٹ ہن ایس ملک وچ بھکھ وی پہلے توں چوکھی اے بے روزگاری غربت تے مہنگائی وی بوہت زیادہ ہو چکی اے تے ہور تے ہور لوڈ شیڈنگ جیہڑی مکمل طور تے ختم ہو چکی تے تبدیلی دے حمام وچ آکے اوہ زور شور سر چکدی پئی اے ایہہ پیسے جیہڑے اج کرپشن تے منی لانڈرنگ نہ ہون دی وجہ نال اکٹھے ہو چکے ایہہ پیسے لوڈ شیڈنگ ای ختم کرن اُتے لا دتے جان پر انج کجھ وی نہیں ہوئے گا کیوں جے اقتدار ای ایہنا دا مقصد سی تے اوہ جویں دے تیویں ایہناں نوں مل چکیا اے تے نا ای ایہنا دا کوئی ہوم ورک سی نا ای کوئی پلاننگ تے ایہہ گلاں ویلا ثابت کر رہیا اے تے آن والے ویلے وچ ایہناں سارے لوکاں دیاں اکھاں کھل جان گیاں جیہڑے اج وی خان دی جذباتی گلاں سن کے امیداں لائے بیٹھے نیں۔
پہلی گل تے ایہہ کہ ہن کرپشن تے احتساب دی بین وجانی بند کیتی جائے کیوں جے جدوں وی خان صاحب یا ایہناں دی کابینہ یا حکومتی اکابرین توں ایہناں دے وعدیاں تے دعویاں ولوں توجہ دلوائی جاندی اے کہ جناب حالات پہلے توں وی کدھرے زیادہ بدتر ہو گئے نیں تے پچھلی حکومتاں دے اُتے الزام لا کے سارا ملبہ ایہناں اُتے پا دتا جاندا اے تے کرپشن دی رام کہانی سنانی شروع کر دتی جاندی اے تے اک ای جواب ہوندا اے کہ اسیں کرپشن ختم کر کے ساہ لواں گے حالاں کے اج کل نیازی صاحب دی نک دے تھلے جیہڑی کرپشن ہو رہی اے جیہڑی جناب دے وزیر مشیر تے قریبی لوک کر رہے نیں ایس ول کوئی دھیان ای نہیں دتا جاندا۔
ایس لئی عوام نوں اج وی ہوش دے ناخن لینے چاہیدے نیں کہ ایہناں دی غربت بیروزگاری تے فلاح کسے صورت وی ایس نظام دے تحت بنن والی حکومتاں دے وس دی گل نہیں تے وڈے وڈے دعوے تے وعدے کر کے آن والا نجات دہندہ دا روپ دھارن والا عمران نیازی بے بسی دی حالت وچ صرف تے صرف اپنی کرسی دے نشے دھت تے اکھاں بند کیتے اپنے حواریاں نوں انجوائے کروا رہیا اے پر حاکمِ وقت دا حکم اے کہ گھبران دی ہر گز لوڑ نہیں۔