کیپیٹل مارکیٹ نوں مالی وسائل دا مؤثر ذریعہ بنایا جائے: وزیر خزانہ

ایس نال ودھ توں ودھ کاروباری اداریاں نوں طویل مدتی مالی وسائل تک رسائی حاصل ہووے گی۔

اسلام آباد (اے پی پی) وفاقی وزیر خزانہ تے محصولات سینیٹر محمد اورنگزیب نے آکھیا اے کہ مالی وسائل حاصل کرن لئی روایتی بینک قرضیاں دے نال نال کیپیٹل مارکیٹ نوں وی مؤثر ذریعہ بنانا ہووے گا، تاں جو بچتاں نوں پیداواری سرمایہ کاری لئی متحرک کیتا جا سکے تے ودھ توں ودھ کاروباری اداریاں نوں طویل مدتی مالی وسائل تک رسائی مل سکے۔

اُنہاں ایہہ گل کیپیٹل مارکیٹ ڈویلپمنٹ کونسل (سی ایم ڈی سی) دے چوتھے اجلاس دی صدارت کردیاں آکھی۔ اجلاس وچ کیپیٹل مارکیٹ دیاں اصلاحات، کارپوریٹ قرضے جاری کرن، سرمایہ کاراں دی تعداد ودھاؤن، مارکیٹ دے بنیادی ڈھانچے وچ بہتری تے طویل مدتی فنانسنگ دی سہولت نال متعلق اقدامات دا جائزہ لیا گیا۔

اجلاس نوں دسیا گیا کہ جنوری توں ستمبر 2026ء دوران کارپوریٹ قرضیاں دا اجرا 291 ارب روپے رہا، جدوں کہ 2025ء وچ 326 ارب روپے حاصل کیتے گئے سن، جیہڑے 2024ء دے مقابلے وچ 30 فیصد ودھ سن۔

فروری 2025ء توں ستمبر 2026ء دوران 45.4 ارب روپے مالیت دے 12 نویں لسٹڈ کارپوریٹ قرضے وی جاری کیتے گئے۔

اجلاس وچ نیشنل گرڈ کمپنی آف پاکستان لمیٹڈ دے مجوزہ شریعہ کمپلائنٹ صکوک پروگرام اُتے وی غور کیتا گیا، جس دا مجموعی حجم 100 ارب روپے، جدوں کہ ابتدائی اجرا 20 ارب روپے تک ہووے گا۔

ایس پروگرام تحت 10 سال تک دی مدت والے صکوک مختلف مرحلیاں وچ عوامی پیشکش دے ذریعے جاری کیتے جان گے تے پاکستان سٹاک ایکسچینج وچ لسٹ کیتے جان گے۔ ایہہ اقدام متعلقہ منظوریواں تے مارکیٹ دے حالات اُتے منحصر ہووے گا۔