پاکستان جی 24 گروپ دا سربراہ بن گیا، ایہہ اک اہم سنگِ میل اے: صدر، وزیراعظم

عالمی مالیاتی نظام وچ ترقی پذیر ملکاں دی مناسب نمائندگی تے منصفانہ نظام لئی آواز چکی جائے گی: چیئرمین اورنگزیب

جی 24 دے پلیٹ فارم نوں ترقی پذیر معیشتاں دے مفادات دے فروغ لئی استعمال کیتا جائے گا: زرداری، شہباز شریف دی مبارکباد

اسلام آباد (آن لائن، مانیٹرنگ ڈیسک) پاکستان نے عالمی مالیاتی نظام وچ ترقی پذیر ملکاں دی آواز مؤثر بناؤن لئی جی 24 گروپ دی سربراہی سنبھال لئی اے، وفاقی وزیر خزانہ محمد اورنگزیب جی 24 دے نویں چیئرمین بن گئے نیں۔ صدر مملکت آصف علی زرداری تے وزیراعظم شہباز شریف نے وزیر خزانہ سینیٹر محمد اورنگزیب تے متعلقہ ٹیم نوں مبارکباد دتی اے۔

ایس موقع اُتے وزیر خزانہ محمد اورنگزیب نے آکھیا کہ پاکستان عالمی مالیاتی نظام وچ ترقی پذیر ملکاں دی مناسب نمائندگی تے منصفانہ مالیاتی نظام لئی آواز بلند کرے گا۔ عالمی معاشی پالیسیاں وچ ترقی نوں مرکزی اہمیت دین دی لوڑ اے۔ معاشی استحکام دے فائدے سرمایہ کاری، روزگار تے عوامی خوشحالی دی صورت وچ سامنے آؤنے چاہیدے نیں۔

وزیر خزانہ نے عالمی مالیاتی اداریاں وچ ترقی پذیر ملکاں دی نمائندگی ودھاؤن تے سارے ملکاں نوں فیصلہ سازی وچ مناسب حصہ دین اُتے زور دتا۔ ترقی پذیر ملکاں نوں سستی تے بروقت مالی معاونت فراہم کیتی جائے۔

محمد اورنگزیب نے آکھیا کہ جی 24 دی کامیابی دا اصل پیمانہ ترقی پذیر ملکاں دے عوام دی زندگی وچ بہتری لیاؤنا اے۔ پاکستان ترقی پذیر ملکاں دی اجتماعی آواز نوں عملی اقدامات وچ بدلنے لئی اپنا کردار ادا کرے گا۔

علاوہ ازیں صدر مملکت آصف علی زرداری تے وزیراعظم شہباز شریف نے پاکستان ولوں بین الحکومتی گروپ آف ٹوئنٹی فور (G-24) دی صدارت سنبھالن دا خیرمقدم کردیاں وزیر خزانہ سینیٹر محمد اورنگزیب تے متعلقہ ٹیم نوں مبارکباد دتی اے۔

دونہاں نے وکھ وکھ بیانیاں وچ آکھیا کہ جی 24 دی صدارت پاکستان لئی عالمی اقتصادی معاملات وچ ترقی پذیر ملکاں دی مؤثر نمائندگی دا اہم موقع اے۔ پاکستان جی 24 دے پلیٹ فارم نوں ترقی پذیر معیشتاں دے سانجھے مفادات دے فروغ لئی مؤثر انداز وچ استعمال کر سکے گا۔

وزیراعظم شہباز شریف نے چیئرمین شپ ملن اُتے خوشی دا اظہار کیتا تے ایس نوں عالمی اقتصادی منظرنامے اُتے پاکستان دے مؤثر کردار دی پہچان دا اک اہم سفارتی سنگِ میل قرار دتا۔