مہنگائی دو مہینیاں بعد سنگل ڈیجٹ وچ آ گئی، اکتوبر وچ 9.6 فیصد ریکارڈ کیتی گئی

اگست وچ مہنگائی 11.1 فیصد تے ستمبر وچ 10.3 فیصد سی، اکتوبر وچ کمی ریکارڈ، پیاز 19.38 فیصد، دال چنا 19.17 فیصد، کڻک 9 فیصد تے آٹا 7.54 فیصد مہنگا ہویا: ماہانہ رپورٹ

اسلام آباد (مانیٹرنگ ڈیسک) ملک وچ مہنگائی دی سالانہ شرح اکتوبر دوران 9.6 فیصد ریکارڈ کیتی گئی، جیہڑی دو مہینیاں بعد دوبارہ سنگل ڈیجٹ وچ آ گئی اے۔

ادارہ شماریات دی ماہانہ مہنگائی رپورٹ دے مطابق اگست وچ مہنگائی دی شرح 11.1 فیصد تے ستمبر وچ 10.3 فیصد رہی سی۔ اکتوبر وچ دیہی علاقیاں وچ مہنگائی 9.8 فیصد، جدکہ شہری علاقیاں وچ 9.5 فیصد ریکارڈ کیتی گئی۔ تاہم جولائی توں اکتوبر تک مہنگائی دی اوسط شرح 10.05 فیصد رہی۔

ادارہ شماریات دے مطابق گزشتہ مہینے پیاز 19.38 فیصد، دال چنا 19.17 فیصد، کڻک 9 فیصد تے آٹا 7.54 فیصد مہنگا ہویا، جدکہ سبزیاں دیاں قیمتاں وچ 6.55 فیصد، انڈیاں وچ 5.72 فیصد تے بیسن وچ 5.54 فیصد اضافہ ریکارڈ کیتا گیا۔

چنے، پھل، دال ماش، مچھلی، خشک میوے تے دال مسور وی مہنگیاں ہون والیاں اشیا وچ شامل رہیاں۔

دوجے پاسے ٹماٹر، آلو، چینی، دال مونگ، گڑ تے چاول دیاں قیمتاں وچ کمی ریکارڈ کیتی گئی، جدکہ بجلی دے چارجز وی گزشتہ مہینے 3.31 فیصد تک گھٹے۔

سالانہ بنیاد اُتے ٹرانسپورٹ دے کرایاں وچ 28.61 فیصد اضافہ ہویا۔ تعلیم 8 فیصد تے صحت دیاں سہولتاں 8.09 فیصد مہنگیاں ہوئیاں۔