پی ٹی آئی نال مذاکرات دا سوال ہی پیدا نہیں ہوندا: فیصل کنڈی
پشاور (اے پی پی، این این آئی، مانیٹرنگ ڈیسک) گورنر خیبر پختونخوا فیصل کریم کنڈی نے آکھیا اے کہ پی ٹی آئی نال مذاکرات دا سوال ہی پیدا نہیں ہوندا۔
پشاور وچ میڈیا نال گل بات کردیاں گورنر کے پی نے آکھیا کہ خیبر پختونخوا دے جس محکمے دی وی سانوں بریفنگ دتی جاندی اے، اسیں سر پھڑ کے بیٹھ جاندے آں۔ شہر وچ جیہڑی صفائی ہو رہی اے، کی ایہ کم اوہ پہلے نہیں کر سکدے سن؟ جرم ثابت ہون اُتے سزا تے جزا دا نظام نافذ ہووے گا۔
انہاں آکھیا کہ مذاکرات کرن دا سوال ہی پیدا نہیں ہوندا۔ پی ٹی آئی دیاں 4 فرنچائزاں نیں۔ اک جماعت اپنے چیئرمین، جنرل سیکرٹری تے سپیکر نوں ہی نہیں مندی، اوہ سانوں کی منن گے؟ اوہ آپس وچ لڑ رہے نیں، اوہ دسن کہ انہاں دی اصلی فرنچائز کیہڑی اے۔
انہاں مزید آکھیا کہ سہیل آفریدی دے وارنٹ گرفتاری دے قانونی تقاضے پورے کیتے جان گے۔
دریں اثنا، گورنر خیبر پختونخوا نے ضلع خیبر توں پولیو دا چھٹا کیس رپورٹ ہون اُتے تشویش دا اظہار کردیاں آکھیا کہ رواں سال پاکستان وچ پولیو کیسز دی مجموعی تعداد 8 تک پہنچنا انتہائی تشویشناک اے۔ پولیو دے مکمل خاتمے لئی مربوط تے مؤثر اقدامات ناگزیر نیں۔
