ایل پی جی دی درآمد، قیمت دے تعین تے تقسیم دا نواں نظام، مستحق گھرانیاں لئی سبسڈی: نئی پالیسی کابینہ توں منظور
ایل پی جی دی قیمت 450 توں 500 روپے فی کلو ہووے گی، خصوصی فنڈ قائم، پورٹ قاسم اُتے 40 ہزار میٹرک ٹن گنجائش دا ٹرمینل بنایا جائے گا
سرکاری کمپنیاں بلک بنیاد اُتے ایل پی جی درآمد کرن گیاں: وزیرِ پٹرولیم، مسابقت نوں فروغ دیا جائے گا: وزیرِ اطلاعات دی پریس کانفرنس
اسلام آباد (ذیشان یوسفزئی، اسلم لُڑکا) خطے دی موجودہ صورتحال تے عالمی توانائی دیاں منڈیاں وچ بے چینی دی کیفیت کارن پاکستان وچ ایل پی جی دی فراہمی بحران دا شکار اے۔ اوگرا ولوں مقرر کردہ نرخ 294 روپے فی کلو نیں، پر مختلف علاقیاں وچ ایہ 800 روپے فی کلو تک فروخت ہو رہی اے۔
پٹرولیم ڈویژن مطابق ایس بحران نوں سنبھالن لئی نئی پالیسی تیار کیتی گئی اے، جس دی کابینہ نے وی منظوری دے دتی اے۔
نئی پالیسی تحت حکومت ایل پی جی دی مارکیٹ کھول رہی اے، جس نال سرکاری قیمتاں وچ اضافہ ہووے گا۔ 294 روپے فی کلو والی ایل پی جی دی سرکاری قیمت 450 توں 500 روپے فی کلو تک پہنچ جائے گی۔
نئی پالیسی مطابق ایل پی جی دی قیمت وچ فریٹ، انشورنس تے پورٹ چارجز شامل ہون گے، جیہڑے پہلے شامل نہیں ہوندے سن۔ ایس دے علاوہ ایل پی جی اُتے پٹرولیم لیوی تے ہور ٹیکس وی لاگو ہون گے۔
ایل پی جی مارکیٹرز دا منافع 35 ہزار توں ودھا کے 50 ہزار روپے فی میٹرک ٹن کر دتا جائے گا۔
نئی پالیسی تحت ملک وچ ایل پی جی دی ذخیرہ اندوزی لئی وی انتظامات کیتے جان گے۔ پورٹ قاسم اُتے 40 ہزار میٹرک ٹن گنجائش والا ایل پی جی درآمدی ٹرمینل قائم کرن اُتے کم کیتا جائے گا۔
وفاقی وزیر پٹرولیم علی پرویز ملک نے آکھیا کہ حکومت ایل پی جی دی درآمد، قیمتاں دے تعین تے تقسیم لئی نواں شفاف نظام متعارف کرا رہی اے، جس تحت مستحق صارفین نوں رعایتی قیمتاں اُتے گیس فراہم کرن لئی خصوصی فنڈ قائم کیتے جان گے۔
بے نظیر انکم سپورٹ پروگرام دے نال مل کے مستحق گھرانیاں نوں سلنڈراں اُتے سبسڈی دین لئی کم کیتا جائے گا۔
ایہ فنڈ بنیادی قیمت تے پروڈیوسر دی قیمت وچ فرق ریفائنریز تے پروڈیوسرز توں وصول کرے گا، تے ایس فرق دا 70 فیصد مستحق صارفین نوں ایل پی جی سلنڈراں اُتے سبسڈی دین لئی ورتیا جائے گا۔
وفاقی وزیر نے دسیا کہ پاکستان سٹیٹ آئل، سوئی سدرن دی ایل پی جی کمپنی تے پاکستان ایل این جی لمیٹڈ نوں حکومتی تے کاروباری معاہدیاں دے ذریعے بلک خریداری دی ہدایت دتی گئی اے۔
نجی درآمد کنندگان نوں وی مسابقتی قیمتاں اُتے ایل پی جی فراہم کرن لئی ترغیب دتی جائے گی۔
وزیر اطلاعات و نشریات عطا تارڑ نے آکھیا کہ تاریخ وچ پہلی واری آئل ریفائنریاں دا منافع عوام تک منتقل کیتا گیا اے۔ وزیراعظم نے عالمی توانائی بحران دے باوجود عوام نوں ریلیف فراہم کرن لئی اقدامات کیتے نیں۔
ٹارگٹڈ فیول ریلیف سکیم دے ذریعے مستحق طبقیاں نوں سہولت فراہم کیتی جا رہی اے۔
پریس کانفرنس کردیاں وزیر اطلاعات نے آکھیا کہ وزیراعظم نے پورے بحران دوران عوامی مفادات نوں ترجیح دتی تے ایہ یقینی بنایا کہ عوام اُتے کسے قسم دا اضافی بوجھ نہ پئے۔
انہاں آکھیا کہ ایل پی جی دے شعبے وچ مسابقت نوں فروغ دتا جائے گا۔
