مریم نواز دا خانیوال وچ گھپلیاں اُتے ٹھیکیدار دی گرفتاری دا حکم، سابق ڈپٹی کمشنر وی تحقیقات وچ شامل
حسن ابدال وچ نواز شریف سینٹر آف ایکسی لینس برائے سپیشل ایجوکیشن دا افتتاح، معذور بچے دیاں گلاں سُن کے وزیراعلیٰ دی اکھاں نم ہو گئیاں، بچی نے گانا ’’اکیلے نہ جانا‘‘ گایا تاں مریم نواز دروازے توں واپس مُڑ آئیاں، ریٹائرڈ حوالدار دے گھر دا علامتی افتتاح، بھنڈی تے دال روٹی کھادی
لاہور (سٹاف رپورٹر) وزیراعلیٰ مریم نواز شریف نے خانیوال دے بیوٹیفکیشن پلان وچ مبینہ گھپلیاں دا سخت نوٹس لیا اے۔ ٹھیکیدار نوں ایڈوانس ادائیگی دے معاملے اُتے سابق ڈی سی خانیوال نوں تحقیقات وچ شامل کرن دی ہدایت کر دتی اے۔ وزیراعلیٰ نے ٹھیکیدار دی فوری گرفتاری تے رقم دی ریکوری دا حکم وی دے دتا۔
خانیوال دے اکبر بازار دے بیوٹیفکیشن منصوبے دا ٹھیکیدار ایڈوانس رقم لے کے فرار ہو گیا اے، جدکہ بازار دی خوبصورتی دے منصوبے دی تکمیل وچ وی بے جا تاخیر کیتی گئی اے۔
دریں اثنا وزیراعلیٰ پنجاب نے راولپنڈی ڈویژن دے دور دراز علاقے حسن ابدال وچ نواز شریف سینٹر آف ایکسی لینس برائے سپیشل ایجوکیشن دا باقاعدہ افتتاح کیتا۔
اوہ خصوصی بچیاں دا ہتھ پھڑ کے سینٹر آف ایکسی لینس وچ داخل ہوئیاں۔ سماعت تے قوتِ گویائی توں محروم بچیاں لئی خصوصی کلاس روم ویکھے، پیدائشی جسمانی معذوری دا شکار بچیاں دی کلاس تے پڑھاؤن دے طریقہ کار دا مشاہدہ کیتا، جدکہ میوزک روم تے ایکٹیویٹی روم دا وی معائنہ کیتا۔
وزیراعلیٰ مریم نواز میوزک روم وچ موجود خصوصی بچی سویرا دا گانا ’’اکیلے نہ جانا، سانوں چھڈ کے‘‘ سن کے دروازے توں واپس مُڑ آئیاں تے بچی نوں پیار کیتا۔
خصوصی بچی نے ’’شبِ غم مجھ سے مل کر ایسے روئی، ملا ہو جیسے صدیوں بعد کوئی‘‘ وی سُنایا۔
وزیراعلیٰ نے خصوصی بچیاں دے درمیان بیٹھ کے ملی نغمہ گایا تے بچیاں نوں واری واری پیار کیتا، دعائیں دتیاں تے شفقت دا اظہار کیتا۔ کلاس روم وچ خصوصی بچے سفیان نے واٹس ایپ دی معصوم خواہش دا اظہار کیتا تاں وزیراعلیٰ مسکرا پئیاں۔
وزیراعلیٰ نوں خصوصی بچیاں نے اپنے ہتھاں نال بنا کے کارڈ وی پیش کیتے۔ بازواں تے ٹنگاں توں محروم ننھے احمد علی دیاں گلاں سُن کے وزیراعلیٰ سمیت سارے شرکا اپنی اکھاں وچ آنسو نہ روک سکے۔
احمد علی نے آکھیا کہ جدوں میں پیدا ہویا تاں میرے والدین رو پئے کہ ایہ بچہ زندگی کِویں گزار سکے گا۔ وزیراعلیٰ نے خصوصی بچیاں نوں ’’سپر ہیرو‘‘ قرار دے دتا۔
انہاں نے تیزاب نال جھلسن والی بچی تے اوہدی والدہ نال خصوصی ملاقات وی کیتی۔
وزیراعلیٰ حسن ابدال دے نواحی علاقے وچ ریٹائرڈ حوالدار دے گھر پہنچ گئیاں تے ’’اپنی چھت، اپنا گھر‘‘ منصوبے دے تحت بنن والے مکان دا علامتی افتتاح کیتا۔
انہاں نے ریٹائرڈ حوالدار اعتبار شاہ دے اہل خانہ نال ملاقات کیتی تے انہاں نوں نویں گھر دی مبارکباد دتی۔
اعتبار شاہ نے ’’اپنی چھت، اپنا گھر‘‘ منصوبے دے تحت مکان بناؤن دی کہانی سناندے ہوئے آکھیا کہ پلاٹ موجود سی پر گھر بناؤن لئی غیبی مدد دا منتظر ساں۔ اللہ نے اپنی چھت، اپنا گھر منصوبے دے تحت 15 لاکھ روپے دتے تے گھر بن گیا۔
وزیراعلیٰ نے انہاں تے انہاں دے خاندان نوں تحائف پیش کیتے۔ اعتبار شاہ کولوں کھانا کھلاؤن دی فرمائش کیتی، جس اُتے بھنڈی تے دال دا سالن پیش کیتا گیا۔ وزیراعلیٰ نے شوق نال کھانا کھادا تے سادے کھانے دے ذائقے دی تعریف کیتی۔
اٹک لئی تاریخی ترقیاتی پیکیج
علاوہ ازیں وزیراعلیٰ پنجاب نے اہلِ اٹک لئی تاریخی ترقیاتی پیکیج پیش کیتا اے۔ اٹک دی 122 سالہ تاریخ دے سب توں وڈے میگا پراجیکٹس مکمل کیتے جا رہے نیں۔
ضلع وچ پہلی واری 865 کلومیٹر سڑکاں دی تعمیر، مرمت تے بحالی دے منصوبے اکٹھے شروع کیتے گئے نیں۔ سڑکاں دی تعمیر، مرمت تے توسیع دیاں 59 سکیمیں شامل نیں، جدکہ 8.5 ارب روپے دی لاگت نال 127 ترقیاتی منصوبے مکمل کیتے جا رہے نیں۔
اٹک ضلع دے 82 مریم نواز کلینکس تے ہسپتالاں دی تعمیر تے مرمت دا کم مکمل ہو چکیا اے۔
