190 ملین پاؤنڈ کیس، عمران تے بشریٰ دیاں اپیلاں سماعت لئی مقرر

اسلام آباد ہائیکورٹ وچ 10 نومبر نوں سماعت، وکیل نوں دلائل دین دا آخری موقع، 26 نومبر احتجاج دے مقدمے دی سماعت ملزماں دی عدم موجودگی دے باعث ملتوی

اسلام آباد (اپنے نامہ نگار توں) اسلام آباد ہائیکورٹ نے 190 ملین پاؤنڈ کیس وچ بانی پی ٹی آئی عمران خان تے بشریٰ بی بی دی سزا دے خلاف اپیلاں سماعت لئی مقرر کر دتیاں۔ چیف جسٹس سردار محمد سرفراز ڈوگر تے جسٹس محمد آصف اُتے مشتمل ڈویژن بینچ 10 نومبر نوں سماعت کرے گا۔

عدالت نے بیرسٹر سلمان صفدر نوں دلائل دا آغاز کرن لئی آخری موقع دے رکھیا اے۔ اس توں پہلاں سلمان صفدر ولوں اپیلاں اُتے دلائل دین یا نہ دین بارے بانی پی ٹی آئی تے بشریٰ بی بی توں ہدایتاں لین لئی جیل ملاقات نہ کراؤن دا اعتراض اٹھایا جاندا رہیا، پر ہن سلمان صفدر دی عمران خان نال ملاقات توں بعد اوہ اعتراض وی باقی نہیں رہیا۔

دوجے پاسے انسدادِ دہشت گردی عدالت دے جج طاہر عباس سپرا نے تحریک انصاف دے 26 نومبر دے احتجاج اُتے درج مقدمے دی سماعت ملزماں دی عدم موجودگی دے باعث بغیر کارروائی 16 نومبر تک ملتوی کر دتی۔

عدالت ولوں طلبی دے باوجود وی ملزم پیش نہ ہوئے، جس دے باعث دفعہ 342 دے بیان ریکارڈ نہ ہو سکے تے مقدمے دا فیصلہ وی نہ سنایا جا سکیا۔