فیول ریلیف سکیم: 28 ارب روپے ادا، وزیراعظم دا سہولت نہ دین والے پٹرول پمپس بند کرن دا حکم

برآمد کنندگان لئی رعایتی فنانسنگ سکیم اُتے کسے وی بینک نوں عملدرآمد توں انحراف دی اجازت نہیں: شہباز شریف

شہباز شریف نال سوڈان دے وزیر داخلہ دی ملاقات، اک ارب 45 کروڑ روپے دی لاگت نال تیار ہون والے کشمیر چوک انڈر پاس دا افتتاح۔

اسلام آباد (نامہ نگار) وزیراعظم فیول ریلیف پروگرام وچ ڈیڑھ کروڑ افراد رجسٹرڈ، 4 نومبر تک 28.6 ارب روپے دیاں ادائیگیاں ہو چکیاں نیں۔ شہباز شریف نے فیول ریلیف پروگرام اُتے پیش رفت تے شفافیت اُتے اطمینان دا اظہار کردیاں ہدایت کیتی اے کہ پٹرولیم سبسڈی سکیم دے تحت رجسٹرڈ مستحقین نوں سہولت فراہم نہ کرن والے پٹرول پمپس دے لائسنس منسوخ کر دتے جان۔

پرائم منسٹر فیول ریلیف پروگرام دے حوالے نال اہم اجلاس دی صدارت کردیاں شہباز شریف نے آکھیا کہ الحمدللہ، رجسٹریشن تے سبسڈی حاصل کرن دے طریقہ کار نوں آسان بناؤن دے نتیجے وچ رجسٹریشن وچ اضافہ ہویا اے تے زیادہ مستحق شہری ایس سہولت توں فائدہ چُک رہے نیں۔

مستحق شہریاں لئی ٹیکنالوجی اُتے مبنی ایہ شفاف سبسڈی سکیم مستقبل وچ عوامی فلاح و بہبود دے ایس طرح دے اقدامات لئی گیم چینجر ثابت ہووے گی۔

اجلاس نوں بریفنگ دوران دَسیا گیا کہ سبسڈی سکیم دے تحت ہُن تک اک کروڑ 55 لاکھ 19 ہزار 282 شہری رجسٹر ہو چکے نیں، جنہاں وچوں اک کروڑ 50 لاکھ موٹر سائیکلاں دے مالک نیں۔

سبسڈی سکیم دے تحت ہُن تک 6 کروڑ 31 لاکھ 53 ہزار 685 ٹوکن جاری کیتے گئے، جنہاں وچوں 5 کروڑ 94 لاکھ 45 ہزار 347 ٹوکن استعمال کیتے جا چکے نیں۔

فیول سبسڈی سکیم دے تحت 4 نومبر تک 28.6 ارب روپے دیاں ادائگیاں ہو چکیاں نیں۔ سکیم بارے معلومات تے شکایتاں دے ازالے لئی صارفین تے پٹرول پمپس واسطے وکھ وکھ کال سینٹر قائم کیتے گئے نیں۔

دریں اثنا وزیراعظم شہباز شریف نال سوڈان دے وزیر داخلہ لیفٹیننٹ جنرل بابیکر سمرا مصطفیٰ علی نے ملاقات کیتی۔

وزیراعظم نے آکھیا کہ پاکستان سوڈان نال اپنے دیرینہ تے برادرانہ تعلقات نوں بہت اہمیت دیندا اے۔ اسیں چاہندے آں کہ سوڈان اپنے موجودہ بحران توں نکل کے اک پُرامن، مستحکم تے خوشحال ملک دے طور اُتے اُبھرے۔

وزیراعظم نے آکھیا کہ پاکستان سوڈان نال دوطرفہ تعلقات، خاص طور اُتے تجارت تے سرمایہ کاری نوں ہور مضبوط بناؤن دا خواہشمند اے۔ زراعت، دفاع، تعلیم تے ہور شعبیاں وچ دوطرفہ تعاون دے وسیع مواقع موجود نیں۔

پاکستان اقوام متحدہ، او آئی سی، جی 77 تے ہور کثیرالجہتی فورمز اُتے سوڈان دے تعاون نوں قدر دی نگاہ نال ویکھدا اے۔

سوڈان دے وزیر داخلہ نے پاکستان آمد اُتے پرتپاک استقبال تے میزبانی لئی وزیراعظم تے حکومت پاکستان دا شکریہ ادا کیتا۔

سوڈانی وزیر داخلہ نے مشکل صورتحال وچ پاکستانی حکومت تے عوام ولوں انسانی تے طبی امداد فراہم کرن اُتے وزیراعظم دا شکریہ ادا کیتا۔ انہاں سوڈان وچ امن و امان دیاں کوششاں دے حوالے نال بین الاقوامی فورمز اُتے پاکستان دی حمایت نوں وی سراہیا تے خطے وچ امن تے ثالثی لئی پاکستان دیاں کوششاں دی تعریف کیتی۔

علاوہ ازیں وزیراعظم نے برآمدات کرن والے ایس ایم ایز نوں سہولتاں فراہم کرن دے حوالے نال اعلیٰ سطح دے اجلاس دی صدارت کردیاں آکھیا کہ ایس ایم ایز تے برآمد کنندگان لئی رعایتی فنانسنگ سکیم اُتے کسے وی بینک نوں عملدرآمد توں انحراف دی اجازت نہیں دتی جائے گی۔

وزیراعظم نے ہدایت کیتی کہ ایس ایم ایز نوں طویل مدتی فنانسنگ دی سہولت توں فائدہ چُکن لئی 80 فیصد برآمدات دی شرط ختم کیتی جائے۔ ایس ایم ایز دی ترقی لئی حکومتی سرپرستی تے سہولتاں دی فراہمی یقینی بنائی جائے۔

وزیراعظم نے آکھیا کہ ایس ایم ایز دی استعداد کار ودھاؤن، مہارتاں بہتر بناؤن تے کاروبار دے فروغ لئی حکومت ہر ممکن معاونت فراہم کرے گی۔

برآمد کنندگان دی سہولت لئی ایکریڈیٹیشن دے معیار، لیبارٹریاں دی توسیع تے ہور ضابطہ جاتی طریقہ کار نوں بہتر بنایا جائے۔ وزیراعظم نے برآمد کنندگان نوں انہاں دی دہلیز اُتے سہولتاں فراہم کرن لئی جدید لیبارٹریاں قائم کرن دی ہدایت وی دتی۔

مزید برآں وزیراعظم نے کشمیر چوک انڈر پاس دی افتتاحی تقریب توں خطاب کردیاں آکھیا کہ کشمیر چوک انڈر پاس دا منصوبہ صرف 27 دناں وچ مکمل کرنا غیر معمولی کارنامہ اے۔ منصوبے دی تکمیل نال علاقے وچ ٹریفک دے مسائل حل کرن وچ مدد ملے گی۔ ایہ منصوبہ اگلے سال ایس سی او کانفرنس تے ہور اہم تقریبات لئی تیاریاں دا عملی ثبوت اے۔

انہاں آکھیا کہ ایہ منصوبہ صرف 500 میٹر لمبے انڈر پاس تک محدود نہیں، بلکہ ایس دے اردگرد چار کلومیٹر لمبیاں سڑکاں دا جال وی تعمیر کیتا گیا اے۔

ایس توں علاوہ کشمیر، جنت نظیر دی مناسبت نال اتھے دو یادگاراں وی تعمیر کیتیاں گئیاں نیں تے ہزاراں نویں پودے وی لائے گئے نیں۔ ایہ سارے کم صرف 27 دناں وچ مکمل کیتے گئے۔

وزیراعظم نے آکھیا کہ انہاں نوں یاد نہیں کہ ایس توں پہلے کوئی منصوبہ اینی تیزی نال مکمل ہویا ہووے۔ انہاں ایس غیر معمولی کارکردگی اُتے وفاقی وزیر داخلہ محسن نقوی، چیئرمین سی ڈی اے، ٹھیکیدار تے سارے متعلقہ افسران تے اہلکاراں نوں مبارکباد دتی، جنہاں نے دن رات محنت کرکے ایہ کارنامہ سرانجام دتا۔

وزیراعظم نے منصوبے دی شفافیت بارے دَسیا کہ کشمیر چوک انڈر پاس اک ارب 45 کروڑ روپے دی لاگت نال مکمل کیتا گیا اے۔ شفاف پروکیورمنٹ نظام تے ای پیڈز دے ذریعے ٹھیکہ تخمینہ لاگت توں تقریباً اڑھائی فیصد گھٹ اُتے دتا گیا۔

ایس توں پہلاں وفاقی وزیر داخلہ محسن نقوی نے تقریب نال خطاب کردیاں آکھیا کہ منصوبے دوران پرانے درختاں نوں محفوظ رکھ کے دوجی جگہ منتقل کیتا گیا، جدکہ کشمیر چوک منصوبے دے تحت 6340 نویں چھاں دار درخت لائے گئے نیں۔

اسلام آباد نوں ہور سرسبز بناؤن لئی درختاں دی تعداد وچ کئی گنا اضافہ کیتا جائے گا۔ وفاقی دارالحکومت وچ سفاری پارک قائم کرن لئی بین الاقوامی کنسلٹنٹ دیاں خدمات حاصل کر لئیاں گئیاں نیں۔

انہاں آکھیا کہ وزیراعظم نے ون کانسٹی ٹیوشن ایونیو دے معاملے اُتے مکمل تعاون تے حمایت دی یقین دہانی کروائی سی۔ وفاقی کابینہ نے ون کانسٹی ٹیوشن ایونیو دی جے آئی ٹی رپورٹ منظور کر لئی اے۔ ارباں روپے مالیت دی ون کانسٹی ٹیوشن ایونیو دی جائیداد سی ڈی اے نوں واپس مل گئی اے۔ ون کانسٹی ٹیوشن دی عمارت نوں اصل مقصد دے مطابق فائیو اسٹار ہوٹل وچ تبدیل کیتا جائے گا۔

وزیراعظم نے انسدادِ پولیو بارے جائزہ اجلاس دی صدارت کردیاں آکھیا کہ پولیو توں پاک پاکستان دا خواب پورا کرنا اک وڈا چیلنج اے، تاہم ساڈا عزم تے حوصلہ ایس چیلنج توں کہیں زیادہ مضبوط اے۔

صوبیاں تے سارے اسٹیک ہولڈرز نال قریبی مشاورت تے مشترکہ حکمت عملی دے ذریعے پاکستان توں پولیو دا مکمل خاتمہ یقینی بنانا اے۔

وزیراعظم نے ملک بھر وچ انسدادِ پولیو مہمات دے کامیاب انعقاد لئی فرنٹ لائن پولیو ورکرز تے قانون نافذ کرن والے اداریاں دے عزم، محنت تے خدمات نوں سراہندیاں آکھیا کہ انسدادِ پولیو مہمات دوران فرنٹ لائن ورکرز دی مسلسل رسائی تے انہاں دی سکیورٹی یقینی بنانا حکومت دی پہلی ترجیح اے۔

وزیراعظم نے ملک بھر وچ معمول دے حفاظتی ٹیکیاں (روٹین امیونائزیشن) دی کوریج ہور بہتر بناؤن تے خاص طور اُتے پولیو توں متاثرہ تے پولیو دے حوالے نال تشویش والے علاقیاں وچ حفاظتی ٹیکیاں دی کوریج ودھاؤن دی ہدایت وی دتی۔