مریم نواز ولوں ڈپٹی کمشنراں نوں ہسپتالاں دی صورتحال بہتر بناؤن لئی 3 دناں دی مہلت
بیوٹیفکیشن سکیمیں وچ سستی اُتے برہم، 8 ڈپٹی کمشنراں نوں بہترین کارکردگی اُتے شاباش، پنجاب نوں تجاوزات توں پاک کرن دا حکم
انتظامیہ دی لاپرواہی نال میری ساکھ اُتے حرف آندا اے، ڈپٹی کمشنرز طلبہ نوں ترقیاتی سکیمیں بارے آگاہ کرن: وزیراعلیٰ مریم نواز
لاہور وزیراعلیٰ مریم نواز شریف دی زیرِ صدارت ڈپٹی کمشنراں دی کارکردگی بارے خصوصی اجلاس ہویا، جس وچ پنجاب پرفارمنس مینجمنٹ یونٹ دے سربراہ تے معاونِ خصوصی شعیب مرزا نے ہر ضلع بارے کے پی آئی رپورٹ پیش کیتی۔
وزیراعلیٰ نے مری، گوجرانوالہ، اٹک، بہاولپور، چکوال، جہلم، لیہ تے ساہیوال نوں بہترین کارکردگی اُتے شاباش دتی، جدکہ بعض ضلعیاں وچ بیوٹیفکیشن پلان دی تکمیل تے معیار وچ سستی برتن اُتے برہمی دا اظہار کیتا۔
تمام ڈپٹی کمشنراں نوں ہسپتالاں دی صورتحال بہتر بناؤن لئی 3 دناں دی مہلت دتی گئی تے ڈپٹی کمشنراں تے اسسٹنٹ کمشنراں نوں روزانہ ہسپتالاں دے دورے کرن دی ہدایت کیتی گئی۔
فصلاں دی باقیات ساڑن دے واقعات اُتے 100 فیصد کنٹرول کرن دا حکم دتا گیا۔ اوکاڑہ تے ہور ضلعیاں دے ڈپٹی کمشنراں نوں فصلان دی باقیات ساڑن دے واقعات روکّن وچ ناکامی اُتے وارننگ دتی گئی۔
بیوٹیفکیشن سکیمیں وچ پائیداری تے معیار اُتے خصوصی توجہ دین دا حکم دندیاں ہر سکیم وچ فواریاں سمیت ہور واٹر فیچرز شامل کرن دی ہدایت کیتی گئی۔
اجلاس وچ گورننس تے سڑکاں دی دیکھ بھال لئی خصوصی سکواڈ قائم کرن دی ہدایت کیتی گئی۔ دَسیا گیا کہ ایہ سکواڈ 12 گھنٹیاں دے اندر اندر معائنہ کرکے مسائل دے حل لئی فوری اقدامات کرے گا۔
وزیراعلیٰ نے سٹریٹ لائٹس 100 فیصد فعال رکھن تے مین ہولز 100 فیصد ڈھکن نال کور کرن دی ہدایت کیتی۔ زیبرا کراسنگ تے سکولاں دی حفاظت لئی ضروری اقدامات کرن دا حکم دتا گیا۔
اسسٹنٹ کمشنراں نوں واٹر فلٹریشن پلانٹس ٹھیک کرواؤن لئی فوری اقدامات کرن دا آکھیا گیا، جدکہ جنرل بس ٹرمینلز تے گرین بس شیڈز دی تعمیر، مرمت تے صفائی یقینی بناؤن دی ہدایت کیتی گئی۔
اجلاس وچ کھلیاں پلاٹاں اُتے کوڑا کرکٹ سٹن والے مالکان نوں پہلی واری وارننگ، دوجی واری بھاری جرمانہ تے تیسری واری ایف آئی آر درج کرن اُتے اتفاق کیتا گیا۔
وزیراعلیٰ نے پنجاب نوں تجاوزات توں پاک بناؤن دا حکم دتا تے تجاوزات خلاف مشترکہ آپریشن، وال چاکنگ، پھٹے پرانے بینرز تے دیواراں اُتے لگے چھوٹے چھوٹے اشتہارات وی ہٹاؤن دی ہدایت کیتی۔
ہسپتالاں دی ڈیپ کلیننگ تے سڑکاں دی روزانہ دھلائی کراؤن دا حکم دتا گیا، جدکہ صوبے بھر وچ آوارہ کتیاں اُتے قابو پاؤن دی ہدایت وی کیتی گئی۔
وزیراعلیٰ مریم نواز نے آکھیا کہ سڑکاں اُتے لین مارکنگ، عمارتاں اُتے رنگ روغن تے صاف ستھری سڑکاں ویکھ کے شہر دا چنگا تاثر قائم ہوندا اے۔
انہاں آکھیا کہ ڈپٹی کمشنراں تے انتظامیہ دی لاپرواہی نال میری ساکھ اُتے حرف آندا اے۔ ڈپٹی کمشنرز یونیورسٹیاں تے کالجاں وچ جا کے طلبہ نوں ترقیاتی منصوبیاں تے سکیمیں بارے آگاہ کرن۔
ہر ڈپٹی کمشنر اپنے ضلع دی معاشی ترقی لئی ڈسٹرکٹ اکنامک پلان تیار کرے۔
ایس موقع اُتے شیخوپورہ دے مین بازار، اکبر بازار، ہمایوں بازار، چھوٹا اڈا بازار تے صفدرآباد بازار سمیت شرقپور تے مریدکے دے بیوٹیفکیشن منصوبیاں بارے رپورٹ پیش کیتی گئی۔
اجلاس وچ ڈپٹی کمشنر گوجرانوالہ نوں شاندار بیوٹیفکیشن منصوبے اُتے شاباش دتی گئی تے ایمن آباد، کامونکی تے نوشہرہ ورکاں دے منصوبیاں دا جائزہ لیا گیا۔
وزیراعلیٰ مریم نواز شریف نے ننکانہ صاحب وچ بیوٹیفکیشن دے چار منصوبے نومبر تک مکمل کرن دی ہدایت کیتی۔
اجلاس وچ راولپنڈی دے پنج بیوٹیفکیشن منصوبیاں دا جائزہ لیا گیا تے ڈپٹی کمشنر راولپنڈی نوں گرین بیلٹس اُتے خصوصی توجہ دین دا حکم دتا گیا۔
وزیراعلیٰ نے ڈپٹی کمشنر گجرات نوں نویاں سکیمیں منصوبے وچ شامل کرن دی ہدایت کیتی، جدکہ رحیم یار خان دے بیوٹیفکیشن منصوبے وچ سکیمیں اصل منصوبے توں مختلف ہون اُتے ناپسندیدگی دا اظہار کیتا۔
وزیراعلیٰ نے فوڈ سٹریٹس تے فوڈ کارٹس بہتر افراد تے کمپنیوں دے حوالے کرن دی ہدایت کیتی۔
اجلاس وچ ای بز، کتیاں دے کاٹن دے واقعات، ستھرا پنجاب، ہسپتالاں، سکولاں تے ہور انتظامی امور دا جائزہ لیا گیا۔ وزیراعلیٰ نے بہتر کارکردگی اُتے شاباش دتی، جدکہ ناقص کارکردگی دکھاؤن والے افسران نوں وارننگ جاری کیتی۔
