عدالتاں نال فراڈ کرن والے جعلسازاں خلاف چیف جسٹس لاہور ہائیکورٹ دا ایکشن، مقدمے درج گرفتاریاں
پنجاب بھر دیاں عدالتاں وچ کورٹ فیس دیاں جعلی ٹکٹاں راہیں قومی خزانے نوں ڈیڑھ ارب روپے دا نقصان پہنچاؤن دا انکشاف، لاہور وچ روزانہ 15 لاکھ روپے آمدن متوقع سی، سال بھر دوران جمع ہون والی رقم تے عدالتی کارروائیاں دے حجم وچ فرق سامنے آؤن اُتے کارروائی، کاپی برانچ دے انچارج تے ریکارڈ کیپر سمیت 9 افراد نامزد، متعدد گرفتار، لاکھاں جعلی ٹکٹاں تے پرنٹنگ مشیناں برآمد
لاہور (محمد اشفاق توں) لاہور سمیت پنجاب دیاں عدالتاں وچ جعلی کورٹ فیس ٹکٹاں دا وڈا سکینڈل بے نقاب ہو گیا، قومی خزانے نوں ڈیڑھ ارب روپے دا نقصان، چیف جسٹس لاہور ہائیکورٹ عالیہ نیلم دے سخت نوٹس اُتے اینٹی کرپشن دی کارروائی، کاپی برانچ دے انچارج تے ریکارڈ کیپر سمیت 9 افراد مقدمے وچ نامزد، متعدد ملزماں نوں گرفتار کر لیا گیا۔ ملزماں دے قبضے وچوں لاکھاں جعلی ٹکٹاں، پرنٹنگ مشیناں تے جعلسازی وچ ورتیا جان والا ہور سامان برآمد کر لیا گیا، جدکہ ہور ملزماں دی گرفتاری لئی چھاپے مارے جا رہے نیں۔
چیف جسٹس لاہور ہائیکورٹ نے واضح کیتا اے کہ عدالتی نظام نال فراڈ کرن تے قومی خزانے نوں نقصان پہنچاؤن والے عناصر کسے رعایت دے حقدار نہیں۔
تفصیلات مطابق لاہور ہائیکورٹ سمیت پنجاب بھر دیاں ماتحت عدالتاں وچ جعلی کورٹ فیس ٹکٹاں دے ذریعے قومی خزانے نوں مبینہ طور اُتے ڈیڑھ ارب روپے دا نقصان پہنچاؤن والے نیٹ ورک دا وڈا سکینڈل بے نقاب ہو گیا۔
چیف جسٹس ہائیکورٹ عالیہ نیلم دے نوٹس تے احکامات اُتے اینٹی کرپشن حکام نے کارروائی کردیاں جعلسازی وچ ملوث گروہ خلاف مقدمہ درج کر لیا۔ مقدمے وچ سول کورٹ دی کاپی برانچ دے انچارج زمان اللہ، ماڈل ٹاؤن کچہری دے ریکارڈ کیپر اعجاز احمد سمیت 9 افراد نوں نامزد کیتا گیا اے۔
کارروائی دوران ملزماں دے قبضے وچوں لاکھاں دی تعداد وچ جعلی کورٹ فیس ٹکٹاں، پرنٹنگ مشیناں تے جعلسازی لئی ورتیا جان والا ہور سامان برآمد کر لیا گیا، جدکہ کئی ملزماں نوں گرفتار وی کر لیا گیا اے۔
پنجاب بھر دیاں ماتحت عدالتاں وچ مقدمے دائر کرن، عدالتی دستاویزات دیاں مصدقہ نقلاں حاصل کرن تے مختلف درخواستاں تے دستاویزات جمع کرواؤن لئی پنجاب حکومت ولوں جاری کردیاں کورٹ فیس ٹکٹاں ورتیاں جاندیاں نیں۔ انہاں ٹکٹاں دی مالیت مختلف قانونی مدات دے تحت مقرر کیتی گئی اے۔
ذرائع مطابق صرف لاہور وچ روزانہ کورٹ فیس ٹکٹاں دی مد وچ تقریباً 15 لاکھ روپے آمدن متوقع سی، تاہم سال 2025ء تے 2026ء دوران سرکاری خزانے وچ جمع ہون والی رقم تے عدالتی کارروائیاں دے حجم وچ واضح فرق سامنے آیا۔ ابتدائی اندازیاں مطابق جعلی ٹکٹاں دے استعمال تے فروخت راہیں قومی خزانے نوں تقریباً ڈیڑھ ارب روپے دا نقصان پہنچایا گیا۔
ذرائع مطابق اینٹی کرپشن حکام نے لاہور دی ضلع کچہری دے مختلف دفاتر وچ چھاپے مار کے مبینہ جعلسازی دے نیٹ ورک دا سراغ لایا۔ جعلی کورٹ فیس ٹکٹاں دی تیاری تے فروخت دے ذریعے سرکاری خزانے نوں مبینہ طور اُتے ڈیڑھ ارب روپے دا نقصان پہنچایا گیا۔
اینٹی کرپشن حکام ولوں سارے ملزماں خلاف بلاامتیاز کارروائی جاری اے تے ایس نیٹ ورک وچ ملوث ہور افراد دی نشاندہی لئی وی تحقیقات کیتیاں جا رہیاں نیں۔
