مسابقتی کمیشن دے چیئرمین نال پیمرا دے ایگزیکٹو ممبر دی ملاقات
دونواں ریگولیٹری اداریاں دے درمیان قریبی رابطے تے باہمی تعاون دی ضرورت اُتے زور۔
کراچی (دنیا ڈیسک) پاکستان الیکٹرانک میڈیا ریگولیٹری اتھارٹی (پیمرا) دے ایگزیکٹو ممبر بیرسٹر سکندر آر چودھری نے چیئرمین مسابقتی کمیشن پاکستان (سی سی پی) فرید احمد تارڑ نال ملاقات کیتی۔ ایس موقع اُتے سی سی پی دے ڈائریکٹر جنرل (لیگل اینڈ ایڈجوڈیکیشن) بیرسٹر اسامہ ملک وی موجود سن۔
ملاقات دوران بیرسٹر سکندر آر چودھری نے چیئرمین سی سی پی نوں پیمرا ولوں ذمہ دارانہ نشریات دے فروغ، ریگولیٹری معیاراں اُتے عملدرآمد یقینی بناؤن تے ناظرین دے مفادات دے تحفظ لئی کیتے جان والے اقدامات بارے آگاہ کیتا۔
اُنہاں دسیا کہ پیمرا دیاں کونسلز آف کمپلینٹس عوام ولوں نشریاتی مواد بارے موصول ہون والیاں شکایتاں دا جائزہ لین تے اتھارٹی نوں مناسب کارروائی دی سفارش کرن لئی اک مؤثر فورم فراہم کردیاں نیں۔ ایس نال نشریاتی اداریاں دی جوابدہی تے نشریات دے معیار برقرار رکھن وچ مدد ملدی اے۔
بیرسٹر سکندر چودھری نے میڈیا انڈسٹری وچ صحت مند مسابقت دے فروغ لئی شفاف ریگولیشن تے قانوناں اُتے یکساں عملدرآمد دی اہمیت اُتے وی زور دتا۔
ایس موقع اُتے چیئرمین سی سی پی فرید احمد تارڑ نے منصفانہ مسابقت، ذمہ دارانہ تشہیر تے صارفین نوں باخبر انتخاب دے مواقع فراہم کرن دی اہمیت اُجاگر کردیاں آکھیا کہ گمراہ کن اشتہارات نہ صرف صارفین دے مفادات نوں نقصان پہنچاؤندے نیں بلکہ مارکیٹ وچ مسابقت نوں وی متاثر کردے نیں۔
چیئرمین سی سی پی نے نشریاتی معیاراں دے فروغ تے ناظرین دے مفادات دے تحفظ لئی پیمرا دے کردار نوں سراہیا۔ اُنہاں دونواں ریگولیٹری اداریاں دے درمیان قریبی رابطے تے باہمی تعاون دی ضرورت اُتے زور دتا، تاکہ مشترکہ دلچسپی دے معاملے اُتے مؤثر انداز وچ کم کردیاں میڈیا انڈسٹری وچ منصفانہ تے صحت مند مسابقت نوں فروغ دتا جا سکے۔
