اسحاق ڈار دے عمانی تے ایرانی ہم منصباں نال ٹیلی فون اُتے رابطے
وزرائے خارجہ ولوں دوطرفہ تعلقات نوں ہور مضبوط بناؤن تے خطے دی صورتحال اُتے وی گل بات، پاکستان دیاں سفارتی کوششاں بارے قرارداد سلامتی کونسل وچ منظور: نائب وزیراعظم
اسلام آباد (آن لائن، اے پی پی، مانیٹرنگ ڈیسک) نائب وزیراعظم تے وزیر خارجہ اسحاق ڈار نے سلطنت عمان دے وزیر خارجہ سید بدر بن حمد البوسعیدی تے ایرانی وزیر خارجہ عباس عراقچی نال ٹیلی فون اُتے رابطے کیتے، جنہاں دوران دوطرفہ تعلقات نوں ہور مضبوط بناؤن تے خطے دی صورتحال اُتے تبادلہ خیال کیتا گیا۔
ترجمان دفتر خارجہ دے مطابق پاکستان تے عمان دے وزرائے خارجہ وچ گل بات دوران باہمی دلچسپی دے مختلف شعبیاں وچ تعاون ودھاؤن، دیرینہ دوستانہ تعلقات دے علاوہ حالیہ علاقائی تے عالمی پیش رفت دا وی جائزہ لیا گیا۔
دونوں رہنمائیاں نے خطے وچ امن تے استحکام دے فروغ لئی مسلسل رابطیاں، بامقصد مکالمے تے سفارتی تعلقات برقرار رکھن دی اہمیت اُتے زور دِتا۔
اس توں علاوہ سینیٹر اسحاق ڈار دی اپنے ایرانی ہم منصب نال ٹیلی فون اُتے گل بات دوران علاقائی صورتحال تے خطے دیاں تازہ ترین پیش رفتاں اُتے تبادلہ خیال کیتا گیا۔
اسحاق ڈار نے مسئلے حل کرن لئی مسلسل مکالمے تے سفارت کاری دی اہمیت اُتے زور دیندیاں آکھیا کہ سارے فریقین نوں تعمیری انداز وچ سفارتی عمل نال جڑے رہن دی ضرورت اے۔
خطے وچ پائیدار امن، سلامتی تے استحکام لئی فعال تے مسلسل سفارتی کوششاں ضروری نیں۔
دریں اثنا اپنے اک بیان وچ اسحاق ڈار نے آکھیا کہ پاکستان ولوں پیش کیتیاں سفارتی کوششاں بارے قرارداد سلامتی کونسل وچ متفقہ طور اُتے منظور ہو گئی اے، اقوام متحدہ نے جنگ دوران سفارت کاری دے کردار بارے صدارتی بیان منظور کر لیا اے۔
اسحاق ڈار نے آکھیا کہ مسلح تنازعات دوران سفارت کاری کشیدگی گھٹاؤن تے امن نوں فروغ دین دا اہم ذریعہ اے۔ جنگ دوران سفارت کاری نوں پچھے نہیں ہٹنا چاہیدا بلکہ اس نوں ہور مؤثر ہونا چاہیدا اے۔
سلامتی کونسل وچ پاکستان دی قرارداد 2788 توں بعد امن لئی سفارتی کوششاں دا تسلسل برقرار اے۔
