تھری ایم پی او غلامی دے دور دی اک نشانی اے: سلمان اکرم
مولانا تے ساڈے نظریات وچ جتھے مماثلت ہووے گی، اوتھے اسیں اکٹھے نظر آواں گے
اے پی سی دے معاملے اُتے پارٹی وچ کوئی اختلاف نہیں: سلمان اکرم راجہ
لاہور (دنیا نیوز، مانیٹرنگ ڈیسک) پی ٹی آئی دے سیکرٹری جنرل سلمان اکرم راجہ نے آکھیا اے کہ آل پارٹیز کانفرنس دے معاملے اُتے پارٹی دے اندر کوئی اختلاف یا مسئلہ نہیں۔ ایس بارے ساریاں جماعتاں نال گل بات کرنی ہوندی اے۔ ایہ کانفرنس نومبر دے مہینے وچ ہو جائے گی تے ایس دا ایجنڈا وی طے ہو جائے گا۔ اگلے دس دناں دے اندر کانفرنس ہو جائے گی۔
پروگرام ’’دنیا مہربخاری دے نال‘‘ وچ گل بات کردیاں سلمان اکرم راجہ نے آکھیا کہ مولانا فضل الرحمٰن دے خلاف ہن تحقیقی ادارے کیوں متحرک ہوئے نیں، ایس دی وجہ ظاہر اے کہ مولانا نے سخت مؤقف اختیار کیتا اے۔ جیہڑا وی شخص قانون، آئین تے بنیادی حقاں دی گل کردا اے، اوہدے خلاف ادارے متحرک ہو جاندے نیں۔ ایہ کوئی نویں گل نہیں۔
مولانا فضل الرحمٰن نے ایس وقت جیہڑا مؤقف اختیار کیتا اے، اوہ ہر جمہوریت پسند شخص نوں اختیار کرنا چاہیدا اے۔ سانوں امید اے کہ مولانا اپنے مؤقف اُتے قائم رہن گے، اسیں پہلے توں ہی اپنے مؤقف اُتے قائم آں۔
عمران خان دے نظریات واضح نیں۔ مولانا دے نظریات، اوہناں دے مؤقف تے ساڈے مؤقف وچ جتھے مماثلت یا ہم آہنگی ہووے گی، اوتھے اسیں اکٹھے نظر آواں گے، تے جتھے مماثلت نہیں ہووے گی، اوتھے اکٹھے نظر نہیں آواں گے۔
اک سوال دے جواب وچ انہاں آکھیا کہ آئینی عدالت نے پشاور ہائی کورٹ نوں اپنا آئینی اختیار استعمال کرن توں روک دتا اے۔ ایہ کوئی حیرانی والی گل نہیں، بلکہ ایہ اوہی نظام اے جس دا اسیں سارے شکار آں۔
ساڈے لوکاں نوں کالے قانون دے تحت بغیر کسے الزام دے گرفتار کیتا گیا۔ تھری ایم پی او بارے سارے جان دے نیں کہ ایہ انتہائی کالا قانون اے۔ پوری دنیا وچ ایس دی کوئی مثال نہیں ملدی۔ ایہ غلامی دے دور دی اک یادگار اے۔ انگریزاں دے دور وچ وی ایس قسم دے قوانین نہیں سن، جیہڑے ہن ساڈے ملک وچ رائج نیں۔
آرٹیکل 245 دی وجہ نال ساریاں عدالتاں دے آئینی اختیارات ختم ہو گئے نیں، بنیادی حق وی ختم ہو گئے نیں۔ بنیادی حقاں دے حوالے نال عدالت توں کوئی داد رسی نہیں منگ سکدا۔ سانوں مکمل طور اُتے اک خوفناک جنگل ورگے نظام وچ دھکیل دتا گیا اے، جتھے حق منگن لئی اسیں عدالت نہیں جا سکدے۔
