ٹرمپ اُتے ایران دے خلاف جنگ توں باہر نکلن لئی دباؤ ودھ رہیا اے
ایران لئی وی چنگا موقع اے کہ مذاکرات دی بحالی ول آوے تے فائدہ اٹھاوے
(تجزیہ: سلمان غنی)
امریکہ دے وسط مدتی انتخابات وچ صدر ٹرمپ تے ری پبلکن پارٹی نوں ہون والی شکست توں بعد امریکہ ایران جنگ دا تسلسل تے مستقبل خبراں وچ چھایا ہویا اے۔ خاص طور اُتے امریکہ دے نائب صدر جے ڈی وینس ولوں اسرائیل نال امریکی تعلقات اُتے نظرثانی تے وسط مدتی انتخابات وچ شکست دی وڈی وجہ ایران نال جنگ نوں قرار دینا، جنگ دے خاتمے ول واضح اشارہ سمجھیا جا رہیا اے۔ ہن امریکہ دے سامنے وڈا سوال ایہ اے کہ کی امریکہ ہن وی ایران دے خلاف جنگی صورتحال جاری رکھے گا؟
خود امریکی نائب صدر جے ڈی وینس ہن صدر ٹرمپ توں فاصلے اُتے کھڑے نظر آ رہے نیں۔ انہاں دا کہنا اے کہ 2024ء وچ جنہاں لوکاں نے صدر ٹرمپ نوں ووٹ دتے سن، انہاں نے ایس واری ڈیموکریٹک امیدواراں نوں ووٹ دتے، کیونکہ اوہ صدر ٹرمپ توں ناراض سن۔ جے ڈی وینس دے مطابق جدوں پارٹی دے پرانے تے تجربہ کار رہنمیاں نے آکھیا کہ پارٹی غلط سمت ول جا رہی اے، تاں ٹرمپ نے انہاں دی گل اَن سُنی کر دتی تے ایسے افراد نوں اپنے نیڑے رکھیا جنہاں نوں امریکی سیاست دے محرکات دا علم نہیں سی۔ ہن ایہ ویکھنا ہووے گا کہ کی صدر ٹرمپ ایس جنگ دا تسلسل برقرار رکھ سکدے نیں۔
کانگریس وچ ڈیموکریٹس دے غلبے توں بعد جے صدر ٹرمپ حملے جاری رکھدے نیں تاں کانگریس جنگی اخراجات دے بل منظور نہیں کرے گی۔ شکست توں بعد ایران لئی وی ایہ چنگا موقع اے کہ اوہ اپنی فتح دے اعلان دے نال دوبارہ مذاکراتی عمل دی بحالی ول آوے تے ایس موقعے دا فائدہ چکے۔ ایس طرح صدر ٹرمپ دی انتظامیہ نوں وی جنگ توں نکلن دا موقع مل سکدا اے، کیونکہ ہن صدر ٹرمپ تے ری پبلکن پارٹی دے سامنے 2028ء دے انتخابات دا چیلنج ہووے گا تے اوہ ہن ایران نال جنگ دی ہور سیاسی قیمت ادا نہیں کرنا چاہن گے۔
ماہراں دا کہنا اے کہ کی صدر ٹرمپ دی صدارت دے آخری دو سال کانگریس نال جھگڑیاں وچ گزردے نیں؟ انہاں نوں اپنی صدارت دے پہلے دو سالاں وچ جس مہم جوئی دا موقع ملیا سی، ہن شاید اوہ ممکن نہ ہو سکے۔ ویسے وی ڈیموکریٹک پارٹی دے سینئر رہنمیاں نے واضح کر دتا اے کہ کانگریس دے دونویں ایواناں دا کنٹرول سنبھالن توں بعد اوہ ٹرمپ نوں عدالت دے کٹہرے وچ لے کے آون گے۔
اگرچہ صدر ٹرمپ نوں غیر معمولی اختیارات دے تحت ویٹو دا حق حاصل اے، تے ایس ویٹو دے حق نوں غیر مؤثر بناؤن لئی کانگریس دی دو تہائی اکثریت ضروری ہوندی اے۔ لہٰذا صدر ٹرمپ اپنے روایتی انداز وچ کانگریس دے سامنے سرنڈر نہیں کرن گے، لیکن ڈیموکریٹس صدر ٹرمپ اُتے اثرانداز ہون تے انہاں نوں دفاعی پوزیشن وچ لیاؤن لئی انہاں دے خاندان دے اوہناں ارکان دے خلاف تحقیقات شروع کروا سکدے نیں، جنہاں اُتے بدعنوانی دے مقدمے نیں۔ ایس حوالے نال صدر ٹرمپ تے کانگریس دے درمیان کشمکش ناگزیر ہووے گی۔
امریکی میڈیا وچ شائع ہون والیاں رپورٹاں وچ ایہ تسلیم کر لیا گیا اے کہ ایران دے خلاف اسرائیلی تے امریکی جنگ نے امریکی انتخابات دا نتیجہ بدل دتا اے۔ صدر ٹرمپ اُتے ایران دے خلاف جنگ توں باہر نکلن لئی دباؤ ودھ رہیا اے۔ جے صدر ٹرمپ ایران دے خلاف پسپائی اختیار کرن لئی تیار نہ ہوئے تاں ری پبلکن پارٹی نوں 2028ء دے انتخابات وچ اک واری فیر سیاسی رسوائی دا سامنا کرنا پے سکدا اے۔
