ملک بھر وچ 100 فیصد ڈیجیٹل ادائیگیاں دا نظام لیایا جائے: انٹرنیٹ دی فراہمی تے عوام دی ٹیکنالوجی تک آسان رسائی یقینی بناؤن دی ہدایت، سارے ادارے کیش لیس معیشت اُتے عمل کرن: شہباز شریف
صارفاں نوں درپیش مسئلے فوری طور تے حل کیتے جان، راست کیو آر کوڈ راہیں ادائیگیاں دا نظام حکومت دے کیش لیس معیشت دے وژن نوں پورا کرن وچ مددگار ثابت ہو رہیا اے: اجلاس نال خطاب
برآمدات ودھاؤن لئی ٹی ڈی اے پی نوں جدید بناؤن دی منظوری، شفاف طریقے نال میرٹ اُتے تربیت یافتہ افرادی قوت ادارے دا حصہ بنائی جائے، صنعتاں تے کاروبار نوں سہولتاں فراہم کر رہے آں: وزیراعظم
اسلام آباد وزیراعظم شہباز شریف نے ملک بھر وچ 100 فیصد ڈیجیٹل ادائیگیاں دا نظام قائم کرن دی ہدایت کردیاں آکھیا اے کہ سارے ادارے کیش لیس معیشت اُتے عمل کرن، انٹرنیٹ دی فراہمی تے عوام دی ٹیکنالوجی تک آسان رسائی یقینی بنائی جائے۔
اوہناں آکھیا کہ کیش لیس معیشت دا فروغ حکومت دیاں اہم ترین ترجیحات وچوں اک اے، جس دے مثبت نتیجے سامنے آؤن شروع ہو گئے نیں۔
ایہہ خیالات اوہناں ملک وچ کیش لیس معیشت دے فروغ بارے بلائے گئے اعلیٰ سطحی اجلاس دی صدارت کردیاں ظاہر کیتے۔ اجلاس وچ وفاقی وزیر، سارے صوبیاں دے چیف سیکرٹریز تے متعلقہ اداریاں دے اعلیٰ افسران شریک ہوئے۔
وزیراعظم نے متعلقہ حکام نوں ہدایت کیتی کہ ملک وچ 100 فیصد ڈیجیٹل ادائیگیاں دے نظام دے قیام لئی واضح لائحہ عمل تے مقررہ مدت دے نال اہداف پیش کیتے جان۔
اوہناں آکھیا کہ ڈیجیٹل ادائیگیاں دے نظام وچ صارفاں نوں درپیش مسئلے فوری طور اُتے حل کیتے جان۔ راست کیو آر کوڈ راہیں ادائیگیاں دا نظام حکومت دے کیش لیس معیشت دے وژن نوں پورا کرن وچ مددگار ثابت ہو رہیا اے۔
وزیراعظم نے بجلی تے گیس دے صارفاں نوں یوٹیلیٹی بلز اُتے درج کیو آر کوڈ راہیں ادائیگیاں کرن دی ترغیب دین لئی مؤثر میڈیا مہم چلاؤن تے ساریاں وزارتاں تے سرکاری اداریاں نوں کیش لیس معیشت دے منصوبے اُتے مکمل عملدرآمد یقینی بناؤن دی ہدایت کیتی۔
حکام نے بریفنگ وچ دَسیا کہ سارے وفاقی تے صوبائی سرکاری اداریاں وچ ادائیگیاں دی ڈیجیٹائزیشن اُتے تیزی نال کم جاری اے تے زیادہ تر اداریاں وچ دسمبر 2026 تک ساریاں ادائیگیاں مکمل طور اُتے ڈیجیٹل ہو جان گیاں۔
بینظیر انکم سپورٹ پروگرام دیاں 100 فیصد ادائیگیاں ڈیجیٹل والٹ راہیں کیتیاں جا رہیاں نیں۔ 15 نومبر 2026 توں چیک راہیں آسان اسائنمنٹ اکاؤنٹس دیاں ادائیگیاں بند کیتیاں جا رہیاں نیں، جدکہ 16 نومبر توں پورے ملک وچ آسان اسائنمنٹ اکاؤنٹس دیاں ساریاں ادائیگیاں راست ڈیجیٹل نظام راہیں کیتیاں جان گیاں۔
دریں اثناء
وزیراعظم شہباز شریف نے پاکستانی برآمدات نوں فروغ دین، پاکستانی مصنوعات دی عالمی منڈیاں تک رسائی ودھاؤن تے چھوٹے تے درمیانے درجے دے کاروبار سمیت مقامی صنعتاں نوں برآمداتی معیار دے مطابق بناؤن لئی ٹریڈ ڈویلپمنٹ اتھارٹی آف پاکستان (ٹی ڈی اے پی) نوں جدید خطوط اُتے استوار کرن دی منظوری دے دتی۔
ایہہ فیصلہ اوہناں ٹی ڈی اے پی دی کارکردگی تے اصلاحات بارے اپنی زیرِ صدارت جائزہ اجلاس وچ کیتا۔
اجلاس وچ وفاقی وزیر رانا تنویر حسین، جام کمال، احد چیمہ، محمد اورنگزیب، عطا اللہ تارڑ، شزہ فاطمہ خواجہ، ڈاکٹر مصدق ملک، وزیراعظم دے مشیر ہارون اختر، وزیر مملکت بلال اظہر کیانی تے متعلقہ اعلیٰ حکام نے شرکت کیتی۔
اس موقع اُتے وزیراعظم نے آکھیا کہ برآمدات وچ اضافے لئی مصنوعات دی عالمی منڈیاں تک رسائی بڑی اہمیت رکھدی اے۔ جدید خطوط اُتے استوار ٹی ڈی اے پی ایس راہ نوں آسان بنائے گی۔
زرعی مصنوعات دی برآمد لئی پورا ایکو سسٹم بنایا جائے گا، جس وچ پوری ویلیو چین شامل ہووے گی۔
وزیراعظم نے ہدایت کیتی کہ شفاف طریقے نال میرٹ اُتے چنگی تربیت یافتہ افرادی قوت نوں ٹی ڈی اے پی دا حصہ بنایا جائے، ادارے دی کارکردگی تے آڈٹ لئی چنگی شہرت رکھن والی نجی آڈٹ فرم دیاں خدمات حاصل کیتیاں جان۔
اوہناں آکھیا کہ برآمدات وچ اضافے لئی صنعتاں تے چھوٹے تے درمیانے درجے دے کاروبار نوں سہولتاں فراہم کیتیاں جا رہیاں نیں۔
اجلاس نوں بریفنگ دوران ٹی ڈی اے پی دے موجودہ نظام وچ درپیش چیلنجز بارے تفصیل نال آگاہ کیتا گیا تے ادارے نوں جدید تقاضیاں دے مطابق بناؤن لئی اصلاحات وی پیش کیتیاں گئیاں۔
وزیراعظم نے ہدایت کیتی کہ اصلاحات آئندہ سال دے وسط تک مکمل کرکے انہاں اُتے عملدرآمد یقینی بنایا جائے۔
