جنگاں دے ماحولیاتی نقصان نال کئی نسلاں متاثر ہُندیاں نیں: مراد علی شاہ
قدرتی وسائل دی تباہی نال انسانی بحران ودھدا اے، ایران جنگ سمندری حیات لئی خطرہ
کراچی (اسٹاف رپورٹر) وزیر اعلیٰ سندھ سید مراد علی شاہ نے جنگی تنازعات دوران ماحول دے تحفظ دے عالمی دن اُتے اپنے خصوصی پیغام وچ آکھیا اے کہ جنگاں دے ماحولیاتی نقصان نال نہ صرف موجودہ بلکہ آون والیاں نسلاں وی شدید متاثر ہُندیاں نیں۔
اُنہاں آکھیا کہ جنگی تنازعات دوران قدرتی وسائل دی تباہی انسانی بحران نوں ہور سنگین بنا دیندی اے۔
وزیر اعلیٰ سندھ نے مشرق وسطیٰ دی صورتحال اُتے گہری تشویش دا اظہار کردیاں آکھیا کہ ایران دے خلاف جنگ نے نہ صرف انسانی زندگیاں بلکہ سمندری حیات نوں وی شدید خطرے وچ پا دتا اے۔
اُنہاں خبردار کیتا کہ ایران وچ ماحولیاتی نظام دی تباہی دے اثرات پورے خطے نوں متاثر کرن گے۔
فلسطین دی صورتحال بارے گل کردیاں مراد علی شاہ دا کہنا سی کہ اُتھے مسلسل بمباری نال شہری آبادی، زرعی زمیناں تے پانی دی فراہمی دا نظام مکمل طور اُتے تباہ ہو چکیا اے، تے ایس ماحولیاتی تباہی دے سنگین اثرات کئی نسلاں تک برقرار رہن گے۔
اُنہاں عالمی برادری اُتے زور دتا کہ جنگی تنازعات دوران ماحول دے تحفظ لئی فوری تے مؤثر اقدامات کیتے جان۔
وزیر اعلیٰ نے واضح کیتا کہ جنگ دی صورت وچ وی پانی، زمین، جنگلات تے حیاتیاتی تنوع دا تحفظ بے حد ضروری اے۔
اُنہاں ایس عزم دا وی اعادہ کیتا کہ سندھ حکومت صوبے وچ ماحول دے تحفظ تے قدرتی وسائل دے پائیدار استعمال لئی مکمل طور اُتے پُرعزم اے۔
