ساڈی پالیسی اسلام آباد توں آوے گی افغانستان توں نہیں: فیصل کنڈی
ریاست دے خلاف ہتھیار چُکن والیاں نال مذاکرات نہیں، جنگ ہووے گی: خطاب
گورنر پختونخوا دی وفاقی وزیر طارق فضل نال ملاقات، مختلف معاملے اُتے مشاورت
پشاور، اسلام آباد (مانیٹرنگ ڈیسک) گورنر خیبر پختونخوا فیصل کریم کنڈی نے آکھیا اے کہ ساڈی پالیسی اسلام آباد توں آوے گی، جلال آباد یا قندھار توں فیصلے نہیں آون گے۔ ریاست دے خلاف ہتھیار چُکن والیاں نال مذاکرات نہیں بلکہ جنگ ہووے گی، تے فتح توں علاوہ کوئی ہور آپشن نہیں۔
اوہناں آکھیا کہ خیبر پختونخوا دی پہچان صرف دہشت گردی تے انتہا پسندی تک محدود نہیں۔ اسی صوبے دا نرم تے مثبت تشخص دنیا دے سامنے لیانا چاہندے آں۔
ایہہ گلّاں اوہناں اسلام آباد دے سپورٹس کمپلیکس وچ تین روزہ پاکستان ٹورازم فیسٹیول دی اختتامی تقریب تے گورنر ہاؤس پشاور وچ پریس کانفرنس نوں خطاب کردیاں آکھیاں۔ گورنر ہاؤس وچ ایڈوائزر ہوم اینڈ ٹرائبل افیئرز کفایت اللہ خان تے سیکرٹری داخلہ امجد علی خان نے شرکا نوں صوبے دی سکیورٹی صورتحال تے مستقبل دے منصوبیاں بارے تفصیلی بریفنگ دتی۔
فیصل کریم کنڈی نے مزید آکھیا کہ اسی دنیا نوں پیغام دینا چاہندے آں کہ خیبر پختونخوا وچ وی مثبت تے تفریحی سرگرمیاں ہُندیاں نیں۔
اوہناں آکھیا کہ دہشت گردی دے خلاف جنگ وچ صوبے دے عوام نے وڈیاں قربانیاں دتیاں نیں۔ دہشت گردی دے خاتمے لئی پی ٹی آئی حکومت سنجیدہ نہیں سی۔ اسی ایسے موڑ اُتے کھڑے آں جتھوں واپس مُڑن دی گنجائش نہیں تے شکست ساڈے لئی کوئی آپشن نہیں۔
اوہناں آکھیا کہ افغانستان فرار ہون والے دہشت گرداں نوں دوبارہ ایتھے آباد کیتا گیا۔ دہشت گردی دے ناسور دے خاتمے لئی مربوط حکمت عملی ضروری اے۔ عوام دا اعتماد بحال کرکے تے پولیس تے عوام دا رابطہ مضبوط بنا کے آدھی جنگ جیتی جا سکدی اے۔ صوبے دے نوجواناں نوں مثبت سرگرمیاں وچ مصروف رکھنا ساڈی ترجیح اے۔
دریں اثنا، گورنر خیبر پختونخوا فیصل کریم کنڈی نے وفاقی وزیر برائے پارلیمانی امور ڈاکٹر طارق فضل چودھری نال اسلام آباد وچ اوہناں دی رہائش گاہ اُتے ملاقات کیتی۔ دونویں رہنماواں نے باہمی دلچسپی دے معاملے، خیبر پختونخوا دی مجموعی سیاسی صورتحال، درپیش اہم مسئلیاں تے وفاق تے صوبے دے درمیان رابطیاں تے تعاون نال متعلق امور اُتے تبادلہ خیال تے مشاورت کیتی۔
