پاکستان ولوں حوثیاں نوں سعودی عرب اُتے حملے فوری بند کرن دا مطالبہ
سعودی کمپنی آرامکو دی عمارت اُتے حملے دی کوشش قابلِ مذمت، ایہ غیر ذمہ دارانہ طرزِ عمل اے: ترجمان دفتر خارجہ۔ بلاجواز تے بلااشتعال جارحیت دا مقابلہ کرن لئی سعودی حکام دی مستعدی تے فوری ردعمل نوں سراہندے آں: اعلامیہ۔
اسلام آباد (دنیا نیوز، مانیٹرنگ ڈیسک) پاکستان نے سعودی عرب دے دارالحکومت ریاض وچ سعودی تیل کمپنی آرامکو دی انتظامی عمارت اُتے حوثیاں دے حملے دی کوشش دی شدید مذمت کردیاں حوثیاں توں سعودی عرب اُتے حملے فوری طور اُتے بند کرن دا مطالبہ کر دتا اے۔
ترجمان دفتر خارجہ ولوں جاری کیتے گئے اعلامیے وچ پاکستان نے یمن دے حوثیاں ولوں سعودی آرامکو دی انتظامی عمارت نوں نشانہ بناؤن دی کوشش دی شدید مذمت کردیاں آکھیا کہ حملے دے نتیجے وچ خوش قسمتی نال کوئی جانی نقصان نہیں ہویا۔
اعلامیے مطابق شہری تنصیبات نوں نشانہ بنانا انسانی جاناں تے علاقائی سلامتی دے حوالے نال سنگین بے حسی تے غیر ذمہ دارانہ طرزِ عمل اے۔ پاکستان حوثیاں توں مطالبہ کردا اے کہ اوہ سعودی عرب دے خلاف سارے حملے فوری تے غیر مشروط طور اُتے بند کرن۔
دوجے پاسے پاکستان نے بلاجواز تے بلااشتعال جارحیت دا مقابلہ کرن لئی سعودی حکام دی مستعدی تے فوری ردعمل نوں سراہندے ہوئے سعودی عرب دی سلامتی، خودمختاری تے علاقائی سالمیت دے تحفظ لئی ضروری تمام اقدامات دی مکمل حمایت دا اعادہ کیتا اے۔
ترجمان دفتر خارجہ نے مزید آکھیا کہ سعودی عرب دی سلامتی پاکستان لئی غیر معمولی اہمیت رکھدی اے۔ پاکستان سعودی قیادت تے عوام دے نال پوری ثابت قدمی نال کھڑا اے تے اپنے سعودی بھراواں تے بھیناں دے تحفظ تے فلاح و بہبود لئی پاکستان دا عزم غیر متزلزل اے۔
