شدید سردی تے بھکھ دا سامنا کرن والے فلسطینی بچیاں دے دل دہلا دین والے مناظر افسوسناک: شہباز شریف

اسرائیل دیاں جنگ بندی دیاں خلاف ورزیاں قابلِ مذمت، فلسطینیاں نوں امداد توں محروم رکھن لئی غیر قانونی اقدامات اُتے تشویش، امداد دی فراہمی ودھاؤن لئی سارے ممکنہ ذرائع ورتے جان: وزیراعظم، خیمیاں دی بجائے محفوظ پناہ گاہاں دتیاں جان: حماس

اسلام آباد وزیراعظم شہباز شریف نے غزہ دے بہادر فلسطینی عوام نوں بنیادی انسانی امداد توں محروم رکھن لئی اسرائیل ولوں مسلسل غیر قانونی اقدامات اُتے تشویش دا اظہار کیتا اے۔

وزیراعظم شہباز شریف نے آکھیا کہ غزہ وچ خیمیاں دا پانی وچ ڈُب جانا، بے گھر فلسطینی بچیاں دا بے یار و مددگار ہونا تے شدید سردی تے بھکھ دا سامنا کرن دے دل دہلا دین والے مناظر انتہائی افسوسناک نیں۔

اُنہاں آکھیا کہ جنگ بندی دیاں خلاف ورزیاں، بین الاقوامی قوانین دی پامالی تے فلسطینی عوام خلاف اسرائیل دی مسلسل جارحیت دی سخت مذمت کردے آں۔

وزیراعظم نے وزارتِ خارجہ نوں ہدایت کیتی اے کہ انسانی امداد دی فوری فراہمی وچ اضافے لئی سارے ممکنہ ذرائع ورتے جان۔

یاد رہے کہ غزہ وچ شدید بارشاں دے باعث 70 ہزار خیمے پانی وچ ڈُب گئے نیں، جس نال 3 لاکھ 50 ہزار بے گھر افراد متاثر ہوئے نیں۔ حماس نے خیمیاں دے پانی وچ ڈُبن نوں اسرائیلی محاصرے دا نتیجہ قرار دتا اے۔

حماس دے مطابق شدید بارشاں نے غزہ دے محاصرے دی سنگینی بے نقاب کر دتی اے۔ اسرائیل تے امن کونسل غزہ وچ بے گھر افراد دیاں مشکلات دے ذمہ دار نیں، جدکہ انسانی امداد دی فراہمی وچ رکاوٹاں انسانی بحران نوں ہور گہرا کر رہیاں نیں۔

حماس نے مطالبہ کیتا اے کہ بے گھر خاندانواں نوں خیمیاں دی بجائے محفوظ پناہ گاہاں فراہم کیتیاں جان۔ اسرائیل ہنگامی پناہ گاہاں، گرمائش دے آلات تے مرمت دا سامان فراہم کرن توں روک رہیا اے۔

حماس دا کہنا اے کہ غزہ وچ 3 لاکھ خیمیاں دی فوری لوڑ اے۔ ثالث تے ضامن ممالک غزہ وچ امدادی سامان دی مسلسل فراہمی یقینی بناؤن۔