پنجاب وچ تبدیلی دیاں چہ مگوئیاں، مریم نواز دی حکومت محفوظ
تبدیلی دے خواہشمند آپ سامنے آؤن لئی تیار نئیں، نہ ہی حکومت نوں چیلنج کرن دا حوصلہ
پنجاب دی سطح اُتے سیاسی تبدیلی تے متبادل سیٹ اَپ بارے جیہڑیاں چہ مگوئیاں ہو رہیاں نیں، اوہناں دے پچھے کیہہ اے؟ کون اے جیہڑا پنجاب وچ مریم نواز دی حکومت اُتے اثر انداز ہونا چاہندا اے تے کی پنجاب حکومت ایس پوزیشن وچ اے کہ کوئی براہِ راست ایس اُتے اثر انداز ہو سکے؟ ایہدا تجزیہ ضروری اے۔
ویسے تاں پنجاب وچ دو، ڈھائی سال بعد ہر حکومت دے خلاف چہ مگوئیاں دا سلسلہ شروع ہو جاندا اے۔ بے شک کجھ لوکاں دی خواہش ہو سکدی اے کہ مریم نواز دی حکومت نوں کمزور کیتا جائے یا اوہناں اُتے الزام تراشی کرکے اوہناں نوں دفاعی پوزیشن وچ لیایا جائے۔ ضروری نئیں کہ ایہہ عمل صرف مخالف دھڑیاں ولوں ہووے، ایہہ وی ممکن اے کہ پنجاب دی وزارتِ اعلیٰ اُتے کسے دی نظر ہووے۔
پر پنجاب ایسا صوبہ اے جتھے شب خون مارنا اوہدوں تک ممکن نئیں، جدوں تک ایسی کسے تحریک دے پچھے کوئی ہور، خاص طور اُتے غیر سیاسی عنصر سرگرم نہ ہووے۔ ایس لئی پنجاب حکومت تے اوہدے خلاف جاری چہ مگوئیاں دا جائزہ لیا جائے تاں فی الحال ایس دے پچھے خواہشاں دا عمل تاں ہو سکدا اے، پر کوئی سنجیدہ تحریک نظر نئیں آندی۔
ویسے تاں وفاقی حکومت وچ موجود کجھ اتحادی پنجاب دے سیاسی محاذ اُتے پسِ پردہ پنجاب حکومت دے خلاف پروپیگنڈا کرکے ایس اُتے اثر انداز ہون لئی سرگرمِ عمل نیں، پر پنجاب دی سطح اُتے کوئی وی اوہناں دے نال چلن لئی تیار نئیں ہووے گا۔
ایس توں علاوہ پنجاب وچ سیاسی تبدیلی دے خواہشمند عناصر کول اینا حوصلہ نئیں کہ اوہ خود سامنے آ کے وزیراعلیٰ مریم نواز دی حکومت نوں چیلنج کر سکن۔ ایس لئی اوہ ایس سلسلے وچ جنہاں دے ناں لیندے نظر آندے نیں، اوہ ایسے کسے وی عمل توں صاف انکار کر رہے نیں۔ جتھوں تک چودھری شجاعت دے پتران دے تحفظات دا سوال اے، تاں ہو سکدا اے کہ اوہ اپنے تحفظات بارے حق بجانب ہون، پر اوہناں وچ اینا دم خم نظر نئیں آندا کہ اوہ پنجاب حکومت نوں چیلنج کر سکن۔
البتہ ایہہ ضرور آکھیا جا سکدا اے کہ جے اوہناں ولوں پنجاب حکومت اُتے اعتراضات تے کرپشن دے الزامات دا سلسلہ جاری رہندا اے تاں خود پنجاب حکومت ضرور کسے انتہائی قدم چکن اُتے مجبور ہو سکدی اے۔ جے ایس حوالے نال کوئی پیش رفت ہوندی اے تاں آون والے وقت وچ مسلم لیگ (ن) تے مسلم لیگ (ق) دا اکٹھے چلنا مشکل ہو جائے گا، پر فی الحال گل ایتھے تک پہنچدی نظر نئیں آ رہی۔
ایس لئی آکھیا جا سکدا اے کہ نیڑے مستقبل وچ پنجاب اندر کسے سیاسی تبدیلی دا امکان نئیں، البتہ پنجاب حکومت نوں دفاعی محاذ اُتے لیاؤن لئی پسِ پردہ سرگرمیاں جاری نیں۔ مسلم لیگ (ن) دی اصل سیاسی طاقت پنجاب اے تے مریم نواز پنجاب توں اپنی سیاسی گرفت کمزور نئیں ہون دین گیاں۔
جتھوں تک سپیکر پنجاب اسمبلی ملک احمد خان بارے چہ مگوئیاں دا سوال اے، تاں سنجیدہ حلقیاں دی رائے اے کہ اوہ ایسے کسے عمل دا حصہ کدے وی نئیں بنن گے جس نال اوہناں دی سیاست اُتے حرف آوے۔ البتہ اوہ اپنے ذاتی تعلقات نوں سیاست توں ودھ اہمیت دیندے نیں۔
شریف خاندان دے اک اہم ذریعے دا کہنا اے کہ جے کجھ لوک ساڈے خلاف ملک احمد خان توں امیداں لائی بیٹھے نیں تاں فیر ساڈے لئی ستے خیراں نیں۔ البتہ ایہہ ضرور آکھیا جا سکدا اے کہ پنجاب حکومت دی وجہ نال جنہاں دی سیاست نوں خطرہ اے، اوہ اچھل کود کر رہے نیں تے اسیں ایہہ سب ویکھ کے محظوظ ہو رہے آں۔
