ایس سی او اجلاس، اسلام آباد دے ہوٹلاں نوں عالمی معیار دے مطابق لیاؤن دا فیصلہ
ایس سی او اجلاس دے پیش نظر اسلام آباد دے ہوٹلنگ شعبے نوں عالمی معیار اُتے لیاؤن دے اقدامات تیز کرن دی ہدایت
وفاقی وزیر داخلہ محسن نقوی نے ایس سی او سربراہی اجلاس دے پیش نظر اسلام آباد وچ ہوٹلنگ دے شعبے نوں عالمی معیار دے مطابق لیاؤن لئی جاری اقدامات تیز کرن تے زیرِ تعمیر سارے ہوٹلاں دی بروقت تکمیل یقینی بناؤن دی ہدایت کر دتی۔
اجلاس وچ وزیر داخلہ نے وفاقی دارالحکومت دے ہوٹلنگ سیکٹر دی بہتری لئی جاری منصوبیاں تے اقدامات دا جائزہ لیا۔ انہاں ہدایت کیتی کہ ہوٹل مالکان نال لگاتار رابطہ رکھیا جائے تاکہ انہاں نوں درپیش مسئلے فوری طور اُتے حل کیتے جا سکن۔
محسن نقوی نے موجودہ ہوٹلاں دی تزئین و آرائش، سہولتاں وچ بہتری تے معیار نوں بین الاقوامی تقاضیاں دے مطابق بناؤن لئی خصوصی اقدامات کرن دی ہدایت کیتی۔ انہاں دا کہنا سی کہ مقامی ہوٹلاں نوں عالمی ہوٹل چینز نال جوڑیا جائے تے مقامی ہوٹل مالکان تے بین الاقوامی ہوٹل چینز وچ رابطے تے تعاون نوں فروغ دتا جائے، تاکہ مہماناں نوں عالمی معیار دیاں سہولتاں فراہم کیتیاں جا سکن۔
اجلاس وچ ون کانسٹی ٹیوشن ایونیو نوں عالمی معیار دے ہوٹل وچ تبدیل کرن دے منصوبے بارے بریفنگ دتی گئی، جدکہ اس دے نال واقع عمارت وچ بین الاقوامی معیار دا شاپنگ مال تعمیر کرن دا فیصلہ وی کیتا گیا۔
محسن نقوی نے دَسیا کہ ون کانسٹی ٹیوشن ایونیو منصوبے لئی اک بین الاقوامی ہوٹل چین دے اشتراک نال جامع منصوبہ بندی کیتی جا رہی اے۔ انہاں ہدایت کیتی کہ ہر صورت یکم جنوری توں منصوبے اُتے تعمیراتی کم شروع کر دتا جائے۔
وزیر داخلہ نے ہوٹلنگ سیکٹر دی افرادی قوت دیاں ضروریات پوری کرن لئی متعلقہ تربیتی اداریاں دے تعاون نال خصوصی تربیتی کورسز شروع کرن دی وی ہدایت کیتی۔ محسن نقوی نے آکھیا کہ ایس سی او سربراہی اجلاس لئی اسلام آباد مکمل طور اُتے تیار ہونا چاہیدا اے تے معزز مہماناں دی میزبانی دے سارے انتظامات بین الاقوامی معیار تے جدید تقاضیاں دے مطابق کیتے جان۔
