وزیراعظم نال ملاقات وچ رل مِل کے کم کرن اُتے اتفاق ہویا، عوام اسلام آباد تے لاہور دے کاروباری طبقے دی خواہش اُتے نظام نوں اُتھل پُتھل ہوندا نہیں ویکھنا چاہندے، ملک دی سیاست نوں ری سیٹ کرنا ہووے گا: بلاول
وزیراعظم اپوزیشن نال نویں جھگڑے نہ چھیڑن، اتحادی جماعتاں دا اعتماد بحال کرن، ملک نوں بدترین معاشی بحران تے تاریخ دی سب توں ودھ مہنگائی دا سامنا اے، عوام نوں نفرت دی سیاست نہیں بلکہ مسئلیاں دا حل چاہیدا اے، عالمی بینک نے اعتماد کیتا، اساں پورا اترے، 10 لاکھ گھر بنائے، خواتین نوں زمیناں دا مالک بنایا، تنقید کرن والے ساڈے کولوں عوام دی خدمت سکھن: سیلاب متاثرین لئی گھراں دی تکمیل اُتے خطاب
کراچی: چیئرمین پاکستان پیپلز پارٹی بلاول بھٹو زرداری نے آکھیا اے کہ وزیراعظم نال ملاقات وچ رل مِل کے کم کرن اُتے اتفاق ہویا اے، عوام اسلام آباد تے لاہور دے کاروباری طبقے دی خواہش اُتے نظام نوں اُتھل پُتھل ہوندا نہیں ویکھنا چاہندے، چیلنجز دا مقابلہ کرن لئی ملک دی سیاست نوں ری سیٹ کرنا پئے گا۔
کراچی وچ سندھ دے سیلاب متاثرین دے گھراں دی تکمیل دی تقریب نال خطاب کردیاں بلاول نے آکھیا کہ ملک نوں ایس ویلے بدترین معاشی بحران تے تاریخ دی سب توں ودھ مہنگائی دا سامنا اے۔ وزیراعظم نوں مشورہ اے کہ اپوزیشن نال نویں جھگڑے شروع کرن دی بجائے اتحادی جماعتاں دا اعتماد بحال کرن، نویں جھگڑے شروع کرن دا ایہہ وقت نہیں۔
بلاول نے آکھیا کہ پوری دنیا ایس ویلے معاشی بحران وچوں گزر رہی اے، تاریخ ساز مہنگائی دے باعث عوام حکومتاں ول ویکھ رہے نیں کہ مشکل وقت وچ کون انہاں دے نال کھڑا اے۔ عوام نوں نفرت تے تقسیم دی سیاست نہیں بلکہ اپنے معاشی مسئلیاں دا حل چاہیدا اے۔
مزید آکھیا کہ سندھ حکومت نے سیلاب متاثرین نال کیتے وعدے پورے کرکے تاریخ رقم کر دتی اے۔ معاشی بحران، تعلیمی مسئلیاں تے بے روزگاری دے موجودہ دور وچ سیاسی جماعتاں دیاں ذمہ داریاں ہور ودھ گئی نیں۔
اُنہاں آکھیا کہ ایہہ 10 لاکھ گھر صرف عمارتاں نہیں بلکہ انہاں دے مالکان نوں زمین دا حق وی دتا گیا اے۔ اساں گھراں دیاں خواتین نوں زمین دا مالک بنایا۔ جنہاں کول اپنا گھر نہیں سی، انہاں لئی گھر تعمیر کرکے دتے تے زمین دی ملکیت وی منتقل کیتی۔ ایہہ 1970 توں بعد زمین دی منتقلی دا وی سب توں وڈا منصوبہ اے۔
چیئرمین پیپلز پارٹی نے آکھیا کہ عوام اپنی حکومتاں ول تقسیم دی سیاست تے اک دوجے نوں لڑاؤن لئی نہیں ویکھدے بلکہ اوہ اپنی زندگی آسان بناؤن تے مسئلیاں دے حل دی امید رکھدے نیں۔ سندھ حکومت دے گھر بناؤن تے مفت علاج دے منصوبے عوام نوں ریلیف دین لئی نیں۔
بلاول نے آکھیا کہ حکومتاں دی ذمہ داری اے کہ عوام نوں سہولتاں فراہم کرن تے مشکل حالات وچ انہاں دا معاشی تحفظ یقینی بناؤن۔ سندھ حکومت 10 لاکھ گھراں دی تعمیر توں بعد 20 لاکھ گھر بناؤن دا ہدف حاصل کرن لئی وی پُرعزم اے۔
عوام ویکھ رہے نیں کہ کیہڑی سیاسی جماعت انہاں نوں معاشی بحران وچوں کڈھن لئی نال کھڑی اے۔ سیاسی جماعتاں نوں چاہیدا اے کہ عوام نوں دسن کہ اوہناں نوں معاشی مشکلات تے ناکامیاں وچوں کِویں کڈھن گے۔
بلاول بھٹو نے آکھیا کہ کجھ سیاستدان سمجھدے نیں کہ امیر طبقے نوں ری سیٹ کرو، پر میرا خیال اے کہ غریب عوام نوں ری سیٹ کرو، ایس نال ملک ترقی کرے گا۔ کاروباری تے امیر طبقے دی بجائے غریب آدمی دی گل سنی جائے تے ملک ترقی کرے گا۔
اُنہاں مزید آکھیا کہ سندھ تے بلوچستان وچ سیلاب نال کئی علاقے متاثر ہوئے۔ جدوں فضائی دورہ کیتا تے ایویں محسوس ہویا جیویں سمندر دے اُتے گزر رہے ہوواں۔ اساں اوہدوں متاثرین نال وعدہ کیتا سی کہ انہاں لئی گھر بنا کے دیواں گے تے تین سالاں وچ 10 لاکھ گھر بنا کے دے چکے آں، ہور 10 لاکھ گھر وی بنا کے دیواں گے۔
اپنے خطاب وچ بلاول بھٹو نے دسیا کہ خواہش سی کہ بلوچستان وچ وی متاثرین نوں گھر بنا کے دیئے جان۔ بلوچستان وچ وفاقی حکومت نے ذمہ داری چُکی تے سندھ وچ اساں ذمہ داری نبھائی۔ وفاقی حکومت نے تین سالاں وچ 30 ہزار گھر بنائے جدکہ اساں 10 لاکھ گھر تعمیر کیتے۔ ایس ہاؤسنگ منصوبے توں وڈا منصوبہ ملک وچ کوئی نہیں۔
اُنہاں آکھیا کہ سب توں ودھ سندھ حکومت دی کردار کشی کیتی جاندی اے۔ ساڈے مخالفین آکھدے سن کہ اساں پیسہ بناؤن لئی محنت کر رہے آں۔ وزیراعلیٰ سندھ نوں آکھدا واں کہ کرپشن دی نگرانی کرن والیاں نوں ایس منصوبے دی نگرانی کرن لئی آکھن۔ میرا دعویٰ اے کہ ایس ہاؤسنگ منصوبے وچ کوئی کرپشن نہیں ہوئی۔
بلاول نے مزید آکھیا کہ وفاقی ادارے عالمی بینک نوں ایہہ یقین دلاؤن وچ مصروف سن کہ صوبائی ادارے کرپٹ ہوندے نیں، پر عالمی بینک نے سندھ حکومت اُتے اعتماد کیتا تے صوبائی حکومت نے عملی طور اُتے کم کرکے وکھایا۔
سندھ نوں جتنی وڈی قدرتی آفت دا سامنا کرنا پیا، شاید دوجے صوبے ایس دا مقابلہ نہ کر سکدے۔ تنقید کرن والے سندھ وچ تعلیم دے مسئلیاں اُتے گل کرن دی بجائے حکومت اُتے تنقید کردے نیں۔ ساڈی کردار کشی تے تنقید کرن والے ساڈے کولوں سکھن کہ عوام دی خدمت کِویں کیتی جاندی اے۔
بلاول بھٹو نے آکھیا کہ شہباز شریف دا شکریہ ادا کردا واں کہ اُنہاں ساڈا ساتھ دتا۔ شہباز شریف توں پہلاں جیہڑا وزیراعظم سی، اُس نے سیلاب دوران سانوں اک روپیہ وی نہیں دتا تے آکھیا سی کہ سندھ ساڈا نہیں۔
عالمی بینک نے صوبائی حکومت اُتے اعتماد کیتا تے اساں ایس اعتماد اُتے پورا اتر کے منصوبہ مکمل کرکے وکھایا۔
بلاول نے آکھیا کہ اسلام آباد تے لاہور دے کاروباری طبقے دی خواہش اُتے نظام نوں کِویں جوڑیا تے توڑیا جائے؟ عوام کسے دی خواہش اُتے نظام نوں اُتھل پُتھل ہوندا نہیں ویکھنا چاہندے۔
وزیراعظم نوں مشورہ اے کہ اپوزیشن نال نویں جھگڑے شروع کرن دا ایہہ وقت نہیں، اتحادی جماعتاں دا اعتماد بحال کرو۔
چیئرمین پیپلز پارٹی نے آکھیا کہ خوشخبری اے کہ وزیراعظم تے اُنہاں دی ٹیم نال ملاقات وچ طے ہویا اے کہ آپس دا رابطہ تے تعاون ہور بہتر بنایا جائے گا تے رل مِل کے کم کراں گے۔ وفاق دی جیہڑی ذمہ داری اے اوہ پوری کرے گا تے ساڈی جیہڑی ذمہ داری اے اوہ اساں پوری کراں گے۔
بلاول بھٹو نے آکھیا کہ اساں سیاست وچ عوام دی خدمت لئی آئے آں، انہاں اُتے حکمرانی کرن لئی نہیں۔ دعا اے کہ اسلام آباد والے وی عوام اُتے حکمرانی کرن دی بجائے انہاں دی خدمت بارے سوچن۔
