چشمہ 5 نیوکلیئر پاور پلانٹ فخر والا سنگِ میل اے، سستی بجلی دے نال ملک دی ترقی وچ اہم کردار ادا کرے گا: شہباز شریف
پاکستان نوں توانائی دے شعبے وچ خودکفیل تے ماحول دوست ملک بناؤن لئی اپنے وسائل توں بھرپور فائدہ چُکنا ہووے گا: وزیراعظم، ملکی ترقی دی بنیاد اوہ امن تے استحکام اے جس نوں فیلڈ مارشل عاصم منیر دی قیادت وچ بہادر افواج نے یقینی بنایا: ڈوم دی تنصیب اُتے خطاب
میانوالی: وزیراعظم شہباز شریف نے چشمہ 5 نیوکلیئر پاور پلانٹ دے ڈوم دی تنصیب نوں فخر والا سنگِ میل قرار دیندے ہوئے آکھیا اے کہ ایہہ منصوبہ پاکستان تے چین دی لازوال دوستی تے سانجھے عزم دی علامت اے۔ ایہہ پاکستان نوں صاف، قابلِ اعتماد تے سستی بجلی فراہم کرن دے نال توانائی دے تحفظ تے معاشی ترقی وچ اہم کردار ادا کرے گا۔
وزیراعظم نے آکھیا کہ پاکستان نوں معاشی طور اُتے مضبوط، توانائی دے شعبے وچ خودکفیل تے ماحول دوست ملک بناؤن لئی اپنے وسائل تے انسانی سرمائے توں بھرپور فائدہ چُکنا ہووے گا۔
وزیراعظم نے ایہہ گلاں میانوالی وچ چشمہ نیوکلیئر پاور پلانٹ دے پنجویں یونٹ (چشمہ-5) دی ڈوم پلیسمنٹ دی تقریب نال خطاب کردیاں آکھیاں۔
پاکستان اٹامک انرجی کمیشن نے چشمہ نیوکلیئر پاور پلانٹ دے یونٹ سی فائیو (C-5) دے ڈوم دی کامیاب تنصیب نال منصوبے دی تعمیر وچ اک اہم سنگِ میل عبور کر لیا اے۔ ایس موقع اُتے منعقدہ تقریب وچ شہباز شریف نے مہمانِ خصوصی دے طور اُتے شرکت کیتی، جدکہ چیف آف ڈیفنس فورسز فیلڈ مارشل سید عاصم منیر، چین دے حکام تے متعلقہ اداریاں دے اعلیٰ عہدیدار تے نمائندے وی موجود سن۔
وزیراعظم نے پاکستان تے چین دے انجینئراں، تکنیکی ماہرین تے مزدوراں دیاں خدمتاں نوں سراہندے ہوئے آکھیا کہ انہاں دی لگن تے محنت نال ایہہ اہم سنگِ میل حاصل ہویا اے۔
اُنہاں اعتماد ظاہر کیتا کہ ایس جذبے تے عزم نال ایہہ منصوبہ ان شاء اللہ مقررہ وقت توں پہلاں فعال وی ہو جائے گا۔
اُنہاں آکھیا کہ بظاہر ایہہ منصوبہ سٹیل تے کنکریٹ دی تعمیرات اُتے مشتمل اے، پر پاکستان دے عوام لئی ایہہ صاف، قابلِ اعتماد تے سستی بجلی دی فراہمی دی ضمانت اے۔ ایہہ اوہ بجلی ہووے گی جیہڑی درآمدی ایندھن دیاں قیمتیں ودھن نال متاثر نہیں ہووے گی، تے نہ ہی بجلی دی پیداوار سورج دی روشنی یا ہوا دی دستیابی اُتے منحصر ہووے گی۔
ایہہ بجلی رات بھر فیکٹریاں نوں چلدا رکھے گی، ہسپتالاں وچ بجلی دی فراہمی یقینی بنائے گی تے طلبہ نوں روشنی وچ تعلیم حاصل کرن دا موقع فراہم کرے گی۔
وزیراعظم نے آکھیا کہ کوئی وی قوم اپنا حال محفوظ بنائے بغیر خوشحال مستقبل تعمیر نہیں کر سکدی۔ پاکستان دی ترقی دی بنیاد اوہ امن تے استحکام اے جس نوں فیلڈ مارشل سید عاصم منیر دی متحرک قیادت وچ بہادر مسلح افواج نے یقینی بنایا اے۔
اُنہاں آکھیا کہ معرکہ حق دوران فیلڈ مارشل سید عاصم منیر دی پُرعزم قیادت وچ پوری قوم نے اپنی بہادر مسلح افواج دی جرأت، پیشہ ورانہ صلاحیتاں تے غیرمتزلزل عزم دا مشاہدہ کیتا۔ ایہہ عزم ایسا سازگار ماحول پیدا کرن وچ اہم کردار ادا کر رہیا اے، جس وچ پاکستان اپنے معاشی اہداف حاصل کرن، سرمایہ کاری نوں راغب کرن تے اعتماد نال ترقی دی رفتار تیز کرن دے قابل ہو رہیا اے۔
وزیراعظم نے ملکی معیشت دی بحالی تے سماجی و اقتصادی ترقی دے سانجھے اقدامات وچ فیلڈ مارشل سید عاصم منیر دی فعال تے ثابت قدم حمایت نوں سراہندے ہوئے اُنہاں دا شکریہ ادا کیتا۔
اُنہاں آکھیا کہ اج دا دن اپنے آہنی دوست عوامی جمہوریہ چین نوں خراجِ تحسین پیش کیتے بغیر مکمل نہیں ہو سکدا۔ چشمہ-5 پاکستان وچ چین دے تعاون نال تعمیر ہون والا ستواں نیوکلیئر پاور یونٹ اے۔ ایہہ سارے منصوبے ایسی دوستی دا زندہ ثبوت نیں جیہڑی مشکل ترین حالات تے خوشحالی دے دور وچ وی کدی کمزور نہیں ہوئی۔
ایس موقع اُتے پاکستان اٹامک انرجی کمیشن دے چیئرمین نے ابتدائی خطاب کردیاں آکھیا کہ ملک دی مجموعی نصب شدہ بجلی پیدا کرن دی صلاحیت وچ جوہری توانائی دا حصہ 8.6 فیصد اے۔
چشمہ فائیو نیوکلیئر پاور پلانٹ دی بجلی پیدا کرن دی صلاحیت 1200 میگاواٹ ہووے گی تے توقع اے کہ ایہہ منصوبہ ستمبر 2030 وچ بجلی دی پیداوار شروع کر دے گا۔
