منصوبے صرف سوچن نال اپنے نہیں ہو جاندے: عظمیٰ بخاری
چار سال منصوبے مکمل نہ کرن والے اج ملکیت دے دعوے کر رہے نیں: عظمیٰ بخاری
سابقہ حکومت دے نمایاں منصوبے انڈے، کٹے، مرغیاں تے بھنگ دیاں فیکٹریاں سن: بیان
لاہور: وزیر اطلاعات تے ثقافت پنجاب عظمیٰ بخاری نے فواد چودھری دے بیان اُتے ردعمل دیندیاں آکھیا اے کہ چار سال تک تہاڈے کول حکومت رہی، جے ایہ منصوبے تہاڈے سن تاں اپنے دورِ حکومت وچ انہاں نوں مکمل کیوں نہیں کیتا؟
منصوبے صرف سوچن یا اعلان کرن نال کسے دی ملکیت نہیں بن جاندے، بلکہ جیہڑا منصوبہ شروع کردا اے تے اوہنوں پایۂ تکمیل تک پہنچاندا اے، اصل کریڈٹ وی اوہدے حصے آندا اے۔
عظمیٰ بخاری نے آکھیا کہ سابقہ حکومت دے دور وچ جن منصوبیاں دا ذکر عام رہیا، اوہ انڈے، کٹے، مرغیاں تے بھنگ دیاں فیکٹریاں سن۔
اوہناں آکھیا کہ وفاقی تے صوبائی حکومتاں ہون دے باوجود ساڑھے چھ سال بعد کسے منصوبے نوں اپنا قرار دینا محض شرمندگی دا باعث اے۔
وزیر اطلاعات پنجاب نے آکھیا کہ جے ایہ منصوبے واقعی سابقہ حکومت دیاں ترجیحات تے کارکردگی دا حصہ سن تاں چار سالہ اقتدار دوران انہاں نوں مکمل کرن دا موقع موجود سی۔ اج انہاں منصوبیاں دی ملکیت دا دعویٰ کرن دی بجائے ایہ دسیا جائے کہ اپنے دور وچ انہاں نوں مکمل کیوں نہیں کیتا گیا۔
عظمیٰ بخاری نے فواد چودھری نوں مخاطب کردیاں آکھیا، ہُن سچ سچ دسو، وزیراعلیٰ دے استقبال تاں بڑے چنگے سن نا؟
