پنجاب حکومت نے زراعت تے تعلیم نوں پوری طرح تباہ کر دِتا: حافظ نعیم
وزیراعلیٰ تصویراں کھچواوندی اے، ایہ نئیں دسدی کہ نویں جماعت وچ 52 فیصد بچے فیل کیوں ہوئے؟ ساڈا مطالبہ پٹرولیم لیوی دا خاتمہ اے، لاہور سمیت وکھ وکھ شہراں وچ جلسیاں دا اعلان
لاہور: امیر جماعت اسلامی حافظ نعیم الرحمٰن نے آکھیا اے کہ پٹرولیم لیوی خلاف جماعت اسلامی احتجاج توں پچھے نئیں ہٹی۔ ساڈا مطالبہ اے کہ لیوی ختم کیتی جاوے۔ جے اسیں احتجاج نہ کردے تاں حکومت پٹرول دی قیمت 500 روپے فی لیٹر تک لے جاندی۔ 29 نومبر نوں مینارِ پاکستان اُتے وڈا جلسہ کراں گے۔
منصورہ وچ پریس کانفرنس کردیاں انہاں آکھیا کہ احتجاج تے مذاکرات نال نال جاری رہن گے۔ 22 نومبر نوں کوئٹہ وچ وی وڈا جلسہ ہووے گا، اس توں بعد خیبر پختونخوا تے کراچی وچ وی جلسے کیتے جان گے۔
حافظ نعیم الرحمٰن نے آکھیا کہ جماعت اسلامی دے دباؤ توں بغیر حکومت عوام نوں ریلیف نہ دیندی۔ حکومت نے دسیا اے کہ ڈیڑھ کروڑ لوکاں نوں ریلیف دِتا جا رہیا اے۔ 800 سی سی گاڑیاں دے نال 1300 سی سی گاڑیاں نوں وی پٹرول اُتے ریلیف دِتا جاوے۔ ٹریکٹرز تے پبلک ٹرانسپورٹ دیاں گاڑیاں نوں وی ریلیف ملنا چاہیدا اے۔
جماعت اسلامی احتجاج نہ کردی تاں حکومت پٹرول دی قیمت 500 روپے فی لیٹر تک پہنچا دیندی۔ مریم نواز دی حکومت نے زراعت تے تعلیم نوں پوری طرح تباہ کر دِتا اے۔ وزیراعلیٰ پنجاب سکولاں وچ بچیاں دے نال تصویراں کھچواوندی اے، پر ایہ نئیں دسدی کہ نویں جماعت وچ 52 فیصد بچے فیل کیوں ہوئے؟
ملک وچ ایل پی جی دی شدید قلت اے تے ایہ سرکاری ریٹ اُتے وی دستیاب نئیں۔ ایل پی جی دیاں قیمتاں مقرر کرنا کس دی ذمہ داری اے؟
