سموگ: وڈے ہسپتالاں وچ 18 ہزار مریض رپورٹ
بخار، کھنگھ، زکام تے گلے تے جسم وچ درد دیاں شکایتاں ودھ گئیاں، فلو، کورونا یا سانس دیاں علامتاں ظاہر ہون اُتے ڈاکٹر نال رابطہ کرن دی ہدایت
لاہور: سموگ دی شدت ودھن نال شہریاں دی صحت متاثر ہون لگی اے۔ پچھلے اک ہفتے دوران شہر دے 6 وڈے سرکاری ہسپتالاں وچ 18 ہزار توں ودھ مریض رپورٹ ہوئے نیں۔
میو ہسپتال وچ فلو، انفلوئنزا تے کورونا ورگیاں علامتاں دے نال 6 ہزار، جناح ہسپتال وچ 5 ہزار 500، جدکہ سروسز ہسپتال وچ 5 ہزار توں ودھ مریض سامنے آئے۔ جنرل، گنگا رام تے چلڈرن ہسپتال وچ وی سینکڑیاں مریض رپورٹ ہوئے نیں۔
بخار، کھنگھ، زکام، گلے تے جسم وچ درد دیاں شکایتاں ودھ گئیاں نیں۔
طبی ماہرین دے مطابق سموگ دے باریک زہریلے ذرات سانس دے نظام نوں متاثر کردے نیں تے سانس دیاں نالیاں وچ سوزش تے جلن پیدا کر سکدے نیں۔
بچے، بزرگ تے دمے، سی او پی ڈی یا دل دیاں بیماریوں وچ مبتلا افراد دے زیادہ متاثر ہون دا خدشہ اے۔
ماہرین نے ہدایت کیتی اے کہ فلو، کورونا یا سانس دیاں علامتاں ظاہر ہون اُتے ڈاکٹر نال رجوع کیتا جاوے۔
