پاکستان تے ازبکستان دا دوطرفہ تعاون تے علاقائی روابط مضبوط بناؤن اُتے اتفاق
اسلام آباد: نائب وزیراعظم تے وزیر خارجہ سینیٹر اسحاق ڈار نے پاکستان دے معاشی استحکام، علاقائی رابطیاں دے فروغ تے ادارہ جاتی اصلاحات دے حوالے نال مختلف اہم اجلاساں دی صدارت کیتی تے سفارتی رابطے وی کیتے۔
انہاں نے ازبکستان دے وزیر خارجہ بختیار سعیدوف نال ٹیلی فون اُتے گل بات کردیاں دوناں ملکاں دے درمیان دوطرفہ تعاون، علاقائی ترجیحات تے باہمی دلچسپی دے معاملے اُتے تبادلہ خیال کیتا۔
ترجمان دفتر خارجہ دے مطابق دوناں وزرائے خارجہ نے شنگھائی تعاون تنظیم (ایس سی او) تے اقتصادی تعاون تنظیم (ای سی او) سمیت مختلف علاقائی فورمز اُتے تعاون ودھاؤن تے مشترکہ ترجیحات نوں فروغ دین لئی قریبی رابطہ کاری دی اہمیت اُتے زور دتا۔
دونوں رہنماؤں نے پاکستان تے ازبکستان دے تعلقات ہور مضبوط بناؤن تے باہمی دلچسپی دے معاملے اُتے مسلسل رابطے برقرار رکھن دے عزم دا اعادہ کیتا۔
دوجے پاسے نائب وزیراعظم اسحاق ڈار دی زیرِ صدارت پاکستان ریلوے دی بہتری، جدید طریقیاں مطابق تنظیمِ نو تے ادارے دے مالی استحکام بارے اجلاس ہویا، جس وچ پبلک پرائیویٹ پارٹنرشپ، مقامی بینکاں توں مالی معاونت تے بین الاقوامی فنڈنگ سمیت مختلف آپشنز اُتے غور کیتا گیا۔
اسحاق ڈار نے متعلقہ وزارتاں تے مالیاتی اداریاں نوں ہدایت کیتی کہ خاص طور اُتے مین لائن ون (ایم ایل ون) منصوبے دے روہڑی توں ملتان سیکشن اُتے عملدرآمد لئی کمرشل بینکاں توں مالی معاونت حاصل کرن دا مناسب طریقہ کار تیار کیتا جاوے۔
ایس توں علاوہ نائب وزیراعظم دی زیرِ صدارت اجلاس وچ عالمی محنت کش تنظیم (آئی ایل او) سمیت ہور بین الاقوامی کنونشنز تے معاہدیاں دے تحت پاکستان دیاں ذمہ داریاں تے موجودہ صورتحال دا جائزہ لیا گیا۔
نائب وزیراعظم اسحاق ڈار نال گورنر سندھ سید نہال ہاشمی نے ملاقات کیتی، جس دوران سندھ وچ ترقیاتی اقدامات تے تجارت تے سرمایہ کاری دے فروغ بارے تبادلہ خیال ہویا۔
