مصنوعی ذہانت دنیا نوں بدل رہی اے

اسلام آباد: وزیر مملکت برائے انفارمیشن ٹیکنالوجی شزا فاطمہ نے آکھیا اے کہ ٹیکنالوجی پاکستان سمیت پوری دنیا وچ سماجی زندگی دے ہر شعبے نوں بدل رہی اے، جدکہ مصنوعی ذہانت نے ایس انقلاب دی رفتار ہور وی تیز کر دتی اے۔

دنیا تے معاشرے وچ تبدیلی نوں روکنا ممکن نئیں، اصل سوال ایہہ اے کہ ایس تبدیلی دی قیادت کون کرے گا۔ اسلام آباد وچ مارگلہ ڈائیلاگ نوں خطاب کردیاں شزا فاطمہ نے آکھیا کہ ہر کلک تے ہر سکرول دے ذریعے ساڈی سوچ تے حقیقت نوں تشکیل دتا جا رہیا اے۔ پاکستان دی دو تہائی آبادی نوجواناں اُتے مشتمل اے تے ایسے وچ ساڈی سماجی پہچان وی داؤ اُتے لگی ہوئی اے۔ مصنوعی ذہانت دے عالمی پلیٹ فارم نوجوان نسل نوں اک خاص نقطۂ نظر دے مطابق معلومات فراہم کر رہے نیں، جدکہ بچیاں تے نوجواناں دے معلومات حاصل کرن دے ذرائع ہن تعلیمی اداریاں تے والدین تک محدود نئیں رہے۔