ہزاراں کلومیٹر لمبیاں سڑکاں نہیں بلکہ مواصلات دی تاریخ رقم ہو رہی اے: مریم نواز
پنجاب وچ پہلی واری 35 ہزار کلومیٹر لمبیاں رابطہ سڑکاں دی تعمیر، توسیع تے بحالی دا ریکارڈ قائم
حکام نوں شاباش، لاہور وچ خاتون نال بدسلوکی دا سخت نوٹس، بس کنڈکٹر نے معافی منگ لئی، وزیراعلیٰ پنجاب نے ویڈیو شیئر کر دِتی
لاہور: وزیراعلیٰ پنجاب مریم نواز دا جہلم تے پنڈ دادن خان دے عوام لئی تحفہ، 2021ء توں شروع ہون والی للہ جہلم روڈ دی تعمیر پنج سال بعد مکمل ہوگئی۔
وزیراعلیٰ مریم نواز نے للہ جہلم روڈ منصوبے دی تکمیل اُتے اظہارِ تشکر کیتا تے سی اینڈ ڈبلیو دی ٹیم نوں شاباش دِتی۔
ایس موقع اُتے وزیراعلیٰ مریم نواز نے آکھیا کہ پنجاب وچ ہزاراں کلومیٹر لمبیاں سڑکاں نہیں بلکہ مواصلات دی تاریخ رقم ہو رہی اے۔ پنجاب وچ پہلی واری 35 ہزار کلومیٹر لمبیاں رابطہ سڑکاں دی تعمیر، توسیع تے بحالی دا ریکارڈ قائم ہویا اے۔
سڑکاں بنن نال نہ صرف عوام نوں سہولت ملدی اے بلکہ معاشی سرگرمیاں وی ودھدیاں نیں۔
وزیراعلیٰ پنجاب نے جہلم پنڈ دادن خان روڈ دی جلد تکمیل لئی ضروری اقدامات کرن دا حکم دِتا۔
مریم نواز نوں تفصیلی بریفنگ دوران دَسیا گیا کہ 128 کلومیٹر لمبی للہ جہلم روڈ پنڈ دادن خان نوں للہ انٹرچینج نال جوڑے گی۔ دو رویہ للہ جہلم روڈ اُتے دو بائی پاس تے سڑکاں تعمیر کیتیاں جا رہیاں نیں۔
ایہ سڑک 13 ارب 53 کروڑ 80 لاکھ روپے دی لاگت نال تعمیر ہو رہی اے۔ 20 توں 24 فٹ چوڑی سڑک نوں 76 فٹ تک چوڑا کیتا جا رہیا اے۔ سڑک دے کناریاں دی مضبوطی تے ٹریفک دی روانی برقرار رکھن لئی پکے کنارے بنائے جان گے۔
للہ جہلم روڈ منصوبے وچ 4.2 کلومیٹر لمبا جلالپور بائی پاس تے 3.98 کلومیٹر لمبا پنڈ دادن خان بائی پاس وی شامل اے۔
دوجے پاسے وزیراعلیٰ پنجاب مریم نواز نے کوئٹہ دے علاقے کرم وچ دہشت گرداں دے خلاف کامیاب آپریشن اُتے اظہارِ تشکر کیتا اے۔
اپنے بیان وچ اُنہاں نے آپریشن دوران 31 دہشت گرداں نوں ہلاک کرن اُتے سکیورٹی فورسز نوں خراجِ تحسین پیش کیتا تے سکیورٹی فورسز دی پیشہ ورانہ مہارت نوں سراہیا۔
دوجے پاسے وزیراعلیٰ پنجاب نے سپیڈو بس وچ کنڈکٹر ولوں خاتون نوں دھکے دین دے واقعے دا سخت نوٹس لے لیا تے ڈی آئی جی فیصل کامران نوں فوری کارروائی دیاں ہدایات جاری کر دِتیاں۔
سماجی رابطے دے پلیٹ فارم ایکس اُتے جاری بیان وچ مریم نواز نے آکھیا کہ خاتون نوں دھکا دین والے ملازم نوں نوکری توں فارغ کرنا کافی نہیں، متعلقہ کنڈکٹر نوں متاثرہ خاتون دے گھر لے جا کے سب دے سامنے معافی منگوائی جاوے۔
ٹرانسپورٹ کمپنی دے ملازم عوام نوں دھکے دین لئی نہیں رکھے گئے۔
بعد وچ وزیراعلیٰ پنجاب نے متعلقہ بس کنڈکٹر دی معافی منگن والی ویڈیو وی ایکس اُتے شیئر کر دِتی۔
ویڈیو وچ کنڈکٹر علی رضوان نے کان پھڑ کے معافی منگی تے آکھیا کہ جس طرح دا سلوک اُس نے خاتون نال کیتا، اوہ انتہائی غلط سی۔ اوہ اپنے کیتے اُتے بہت شرمندہ اے تے پوری قوم توں معافی منگدا اے۔
اُس نے آکھیا کہ اوہ توبہ کردا اے تے آئندہ کدے وی کسے نال ایس طرح دا سلوک نہیں کرے گا۔
واضح رہے کہ گزشتہ روز لاہور وچ سپیڈو بس دے کنڈکٹر ولوں خاتون نوں دھکے دین دی ویڈیو سوشل میڈیا اُتے وائرل ہوئی سی۔
