خیبر پختونخوا تے بلوچستان وچ آپریشن، خوارج تے فتنہ الہندوستان دے 74 دہشت گرد ہلاک

کرم دے علاقے وچ 3 نومبر توں کئی جھڑپاں، بھارتی سرپرستی ہیٹھ سرگرم 31 دہشت گرد ہلاک، وڈی مقدار وچ اسلحہ، گولہ بارود تے دھماکہ خیز مواد وی برآمد

خیبر پختونخوا وچ کارروائیاں دا دائرہ میر علی تے اورکزئی تک ودھا دتا گیا، 48 گھنٹیاں دوران 43 دہشت گرد ہلاک۔ صدر زرداری، شہباز شریف تے محسن نقوی ولوں فورسز نوں خراجِ تحسین۔

اسلام آباد: سکیورٹی فورسز نے خیبر پختونخوا تے بلوچستان وچ انٹیلی جنس دی بنیاد اُتے کارروائیاں کردیاں فتنہ الہندوستان تے خوارج دے 74 دہشت گرد ہلاک کر دتے۔

پاک فوج دے شعبۂ تعلقاتِ عامہ دے مطابق کارروائیاں دوران دہشت گرداں دے ٹھکانیاں نوں مؤثر انداز وچ نشانہ بنایا گیا، جدکہ وڈی مقدار وچ اسلحہ، گولہ بارود تے دھماکہ خیز مواد وی برآمد کیتا گیا۔

3 نومبر توں کرم دے علاقے وچ دہشت گرداں خلاف انٹیلی جنس دی بنیاد اُتے کارروائیاں جاری نیں، جتھے کئی جھڑپاں دوران بھارتی سرپرستی ہیٹھ سرگرم 31 دہشت گرد ہلاک کیتے گئے۔ دہشت گرداں دے ٹھکانیاں توں اسلحہ، گولہ بارود تے دھماکہ خیز مواد وی برآمد ہویا۔

دوجے پاسے خیبر پختونخوا دے مختلف علاقیاں وچ انٹیلی جنس دی بنیاد اُتے کارروائیاں دا دائرہ میر علی تے اورکزئی تک ودھا دتا گیا اے۔ گزشتہ 48 گھنٹیاں دوران سکیورٹی فورسز نے میر علی وچ 35 تے اورکزئی وچ 8 خوارج نوں ہلاک کر دتا۔

کارروائیاں دوران دیسی ساختہ دھماکہ خیز مواد تے آئی ای ڈیز سمیت وڈی تعداد وچ اسلحہ تے گولہ بارود وی برآمد کیتا گیا، جس نال دہشت گرداں دے مذموم عزائم ناکام بنا دتے گئے۔

علاقیاں وچ موجود باقی رہ گئے دہشت گرداں دے خاتمے لئی کلیئرنس آپریشن جاری نیں۔

فوج دے شعبۂ تعلقاتِ عامہ دا کہنا اے کہ وفاقی ایپکس کمیٹی دی منظور شدہ قومی ایکشن پلان دی حکمتِ عملی عزمِ استحکام دے تحت سکیورٹی فورسز تے قانون نافذ کرن والے اداریاں دیاں دہشت گردی خلاف کارروائیاں پوری رفتار نال جاری رہن گیاں، تاں جو ملک وچ بیرونی سرپرستی ہیٹھ ہون والی دہشت گردی دا مکمل خاتمہ کیتا جا سکے۔

صدر مملکت آصف علی زرداری، وزیراعظم شہباز شریف تے وزیر داخلہ محسن نقوی سمیت ہور سیاسی رہنماؤں نے سکیورٹی فورسز نوں خراجِ تحسین پیش کیتا اے۔