جوڈیشل افسر چین دے عدالتی نظام دا جائزہ لین: چیف جسٹس
اسلام آباد: چیف جسٹس آف پاکستان جسٹس یحییٰ آفریدی نے چین دے تربیتی دورے لئی چُنے گئے بہترین کارکردگی والے 25 جوڈیشل افسران نال ملاقات کیتی تے انہاں نوں خصوصی بریفنگ دِتی۔
پاکستان بھر توں چُنے گئے افسران دا وفد 18 نومبر توں یکم دسمبر 2026 تک دو ہفتیاں دے تربیتی پروگرام وچ حصہ لین لئی چین جائے گا۔ افسران دی چُون متعلقہ ہائی کورٹس دی مشاورت نال پیشہ ورانہ کارکردگی تے خدمتاں دی بنیاد اُتے کیتی گئی اے۔ وفد وچ چاراں صوبیاں، اسلام آباد، آزاد جموں و کشمیر تے گلگت بلتستان دے جوڈیشل افسران شامل نیں۔
چیف جسٹس نے خاص طور اُتے دور دراز، پسماندہ تے بدامنی توں متاثرہ علاقیاں وچ خدمتاں سرانجام دین والے افسران دی کارکردگی دی تعریف کردیاں آکھیا کہ اوہ چین وچ پاکستانی عدلیہ دے سفیر نیں، اس لئی ادارے دے وقار، اقدار تے پیشہ ورانہ معیار نوں برقرار رکھن۔
انہاں ہدایت کیتی کہ چین دے عدالتی طریقۂ کار، جدید ٹیکنالوجی تے کیس مینجمنٹ دے نظام دا غور نال جائزہ لین تے اوہناں بہترین طریقیاں دی نشاندہی کرن جنہاں نوں پاکستان وچ انصاف دی فراہمی بہتر بناؤن لئی اپنایا جا سکے۔
نیشنل ججز کالج آف چائنا دے زیرِ اہتمام پروگرام دوران پاکستانی وفد سینئر ججاں تے قانونی ماہرین نال ملاقاتاں کرن توں علاوہ بیجنگ تے چوانژو سمیت مختلف شہراں دیاں عدالتاں دا مطالعاتی دورہ وی کرے گا۔
ایہ دورہ سپریم کورٹ پاکستان تے سپریم پیپلز کورٹ آف چائنا دے درمیان مفاہمتی یادداشت دے تحت کروایا جا رہیا اے۔ چیف جسٹس دے مطابق ایس قدم نال ضلعی عدلیہ دی پیشہ ورانہ صلاحیت، عدالتی انتظام تے مقدمیاں دی مؤثر سماعت دے نظام وچ بہتری آوے گی۔





















