مریم نواز اُتے اوہناں دے اپنے اتحادی کرپشن دے الزام لا رہے نیں: سعدیہ جاوید
توانائی دیاں قیمتاں وچ کمی آون تک ملکی معیشت ترقی نہیں کر سکدی، سندھ حکومت دی ترجمان۔ نویں صوبیاں بارے ملک وچ بحث ہووے، مضبوط بلدیاتی نظام ہونا چاہیدا اے: لاہور وچ میڈیا نال گل بات
لاہور: پیپلز پارٹی دی رہنما سعدیہ جاوید نے آکھیا اے کہ مریم نواز اُتے اوہناں دے اپنے اتحادی وزیر کرپشن دے الزام لا رہے نیں۔
لاہور پریس کلب وچ میڈیا نال گل بات کردیاں انہاں مزید آکھیا کہ ملک وچ نویں صوبیاں دے قیام بارے بحث جاری اے، پر ہن تک ایس سلسلے وچ کوئی باقاعدہ کاغذی کارروائی سامنے نہیں آئی۔ پیپلز پارٹی پنجاب وچ وی جلد اپنا مقام بنائے گی۔
انہاں آکھیا کہ پیپلز پارٹی عوام نوں 10 لاکھ گھر قرضے اُتے نہیں بلکہ مفت فراہم کر رہی اے۔ کراچی نوں پانی دی فراہمی لئی کے فور منصوبہ وفاقی حکومت نے بنانا سی، پر ایہ منصوبہ تاخیر دا شکار اے۔ سندھ وچ پیپلز پارٹی یوتھ کارڈ وی متعارف کروا رہی اے۔
پیپلز پارٹی دی رہنما تے سندھ حکومت دی ترجمان نے آکھیا کہ کرپشن پورے ملک دا مسئلہ اے۔ اسیں مریم نواز اُتے کرپشن دا الزام نہیں لا رہے، بلکہ اوہناں دے اپنے اتحادی وزیر اوہناں اُتے الزام لا رہے نیں۔
انہاں دا کہنا سی کہ جدوں تک ملک وچ توانائی دیاں قیمتاں گھٹائیاں نہیں جاندیاں، معیشت ترقی نہیں کر سکدی۔
سندھ حکومت دی ترجمان نے آکھیا کہ سندھ دی ونڈ دی مخالفت پیپلز پارٹی نے سب توں پہلاں کیتی سی۔ نویں صوبیاں دے قیام بارے ملک وچ بحث ہونی چاہیدی اے تے مضبوط بلدیاتی نظام ہونا چاہیدا اے۔ سندھ وچ بااختیار بلدیاتی نظام موجود اے، جدکہ پنجاب وچ کئی سالاں توں بلدیاتی نظام فعال نہیں۔
انہاں آکھیا کہ فریال تالپور پنجاب دے کارکنان نال ملاقات لئی آئی اے تے ناراض کارکنان دے تحفظات دور کیتے جان گے۔





















