مریم نواز دا عورتاں تے بچیاں دے تحفظ لئی فیصلہ کن قانونی اقدامات دا حکم
مریم نواز دا عورتاں تے بچیاں دے تحفظ لئی فیصلہ کن قانونی اقدامات دا حکم
– مؤثر تے یقینی کارروائی لئی نواں اینٹی ریپ ایکٹ لیاؤن، مقدمیاں دی فوری سماعت لئی سپیڈی کورٹس قائم کرن دا فیصلہ۔ عورتاں تے بچے حساس طبقہ نیں، رواداری تے برداشت پُرامن معاشرے دی بنیاد اے: وزیراعلیٰ پنجاب دا خطاب تے عالمی دن اُتے پیغام۔
لاہور (سٹاف رپورٹر) وزیراعلیٰ پنجاب مریم نواز شریف دی صدارت ہیٹھ خصوصی اجلاس ہویا، جس وچ عورتاں تے بچیاں دے تحفظ لئی فیصلہ کن قانونی اقدامات اُتے غور کیتا گیا تے اہم فیصلے کیتے گئے۔
وزیراعلیٰ پنجاب نے عورتاں تے بچیاں نال زیادتی دے واقعات اُتے مؤثر تے یقینی کارروائی لئی نواں اینٹی ریپ ایکٹ لیاؤن دا حکم دے دتا، جدوں کہ عورتاں تے بچیاں دے خلاف جرائم دے مقدمیاں دی فوری سماعت لئی سپیڈی کورٹس قائم کرن دا وی فیصلہ کر لیا گیا۔ ایسے مقدمیاں دا مقررہ مدت اندر فیصلہ کرنا ضروری قرار دتا گیا۔
مریم نواز نے عورتاں تے بچیاں دے خلاف جرائم وچ سزا دی شرح اُتے تشویش دا اظہار کیتا تے مؤثر تفتیش لئی پولیس افسران دی صلاحیتاں ودھاؤن دی ہدایت دتی۔ اجلاس وچ تفتیش تے استغاثہ دے معیار وچ بہتری لئی مصنوعی ذہانت دی مدد لین اُتے اتفاق ہویا۔ ایس موقعے اُتے عورتاں تے بچیاں دے کیسز وچ آڈیو تے ویڈیو ثبوتاں دی مؤثر ریکارڈنگ دا فیصلہ وی کیتا گیا۔
وزیراعلیٰ پنجاب نے عورتاں تے بچیاں نال زیادتی دے واقعات دی روک تھام لئی پیشگی اقدامات کرن دا حکم وی دتا۔
اجلاس وچ آئی جی پولیس نے عورتاں تے بچیاں دے خلاف جرائم تے حکومتی اقدامات بارے تفصیلی رپورٹ پیش کیتی۔ انہاں دسیا کہ صوبے بھر وچ ویمن ہیلپ ڈیسک، ورچوئل ویمن پولیس سٹیشن، ورچوئل چائلڈ سیفٹی تے موبائل پولیس سٹیشن کم کر رہے نیں۔
پولیس سٹیشنز وچ عورتاں نال متعلق 12 لاکھ 40 ہزار شکایتاں درج ہوئیاں، جنہاں وچوں 92 فیصد اُتے کارروائی مکمل کر لئی گئی۔ ورچوئل سنٹر برائے چائلڈ سیفٹی اُتے درج شکایتاں دے نتیجے وچ اک لاکھ توں ودھ گمشدہ یا اغوا کیتے گئے بچے بازیاب کرا کے انہاں دے خاندان دے حوالے کیتے گئے۔
بریفنگ وچ ہور دسیا گیا کہ بچیاں تے عورتاں نال زیادتی دے 71 فیصد واقعات وچ قریبی لوک ملوث پائے گئے۔
وزیراعلیٰ مریم نواز نے سرگودھا وچ جرائم پیشہ افراد دے گینگ دا خاتمہ کرن اُتے شکریہ ادا کیتا تے آئی جی، آر پی او، ڈی پی او سرگودھا تے سی ٹی ڈی ٹیم دی کارکردگی نوں سراہیا۔
مریم نواز نے آکھیا کہ عورتاں تے بچیاں نال زیادتی دے واقعات وچ ملوث افراد نوں قرار واقعی سزا دوان لئی مؤثر قانون سازی کیتی جائے گی۔ عورتاں تے بچے معاشرے دا حساس طبقہ نیں، انہاں دی حفاظت لئی ہر ممکن قدم چکیا جائے گا۔ سماجی تے معاشرتی شعور تے آگاہی ضروری اے۔ عورتاں تے بچیاں نال زیادتی دے مقدمیاں وچ سزا یقینی بناؤن لئی خصوصی تفتیش ضروری اے۔
دریں اثنا برداشت تے رواداری دے فروغ دے عالمی دن اُتے اپنے خصوصی پیغام وچ وزیراعلیٰ پنجاب نے آکھیا کہ رواداری، احترام تے برداشت کامیاب تے پُرامن معاشرے دی بنیاد نیں۔ پاکستان نوں امن، رواداری تے بھائی چارے دی مثال بنانا پئے گا۔ لوکاں وچ باہمی سمجھ بوجھ دے ذریعے رواداری نوں فروغ دینا وقت دی لوڑ اے۔
مریم نواز شریف نے آکھیا کہ تعلیمی ادارے وی نوجوان نسل نوں برداشت، احترام تے محبت دے اصول سکھاؤن۔ ودھدی ہوئی انتہا پسندی تے پُرتشدد تنازعات دے ایس دور وچ رواداری تے برداشت دی اہمیت پہلے نالوں کہیں ودھ گئی اے۔
معاشرے وچ عدم برداشت دے رویّیاں دی روک تھام لئی مثبت سوچ تے بہترین طرزِ عمل اپنانا پئے گا۔ اک دوجے نوں برداشت کرن دی روش اختیار کرنی ہووے گی۔ معاشرے دے ہر طبقے نوں برداشت تے تحمل دے رجحان نوں پروان چڑھاؤن وچ اپنا بھرپور کردار ادا کرنا چاہیدا اے۔ اج اسیں برداشت تے رواداری نوں فروغ دین لئی اپنا بھرپور کردار ادا کرن دے عزم دا اعادہ کردے آں۔





















