پاکستان ولوں ترکمانستان نوں کاسا 1000 دا حصہ بنن دی دعوت، ازبکستان تک توسیع دی تجویز

اویس لغاری نال ترکمانستان دے وزیرِ توانائی دی ملاقات، ٹاپ منصوبے لئی تکنیکی ورکنگ گروپس دا اجلاس جلد بلاؤن اُتے زور

– کاسا 1000 منصوبہ اگلے سال مکمل ہون دی امید، پاکستان نوں تاجکستان توں بجلی دی برآمد جلد شروع ہووے گی: تاجک وزیرِ خارجہ

اسلام آباد (نامہ نگار) وفاقی وزیرِ توانائی اویس لغاری نال اسلام آباد وچ ترکمانستان دے وزیرِ توانائی اناگیلدی ساپاروف نے ملاقات کیتی۔ ملاقات دوران توانائی دے شعبے وچ تعاون، علاقائی گرڈ کنیکٹیویٹی تے ترکمانستان، افغانستان تے پاکستان (ٹاپ) بجلی ترسیل منصوبے اُتے تبادلہ خیال کیتا گیا۔

اویس لغاری نے ترکمانستان دے وزیرِ توانائی نوں کاسا 1000 منصوبے دا حصہ بنن دی دعوت دتی تے دسیا کہ پاکستان نے تاجکستان تے کرغزستان دی حوصلہ افزائی کیتی اے کہ اوہ کاسا 1000 ٹرانسمیشن لائن نوں ازبکستان تے ترکمانستان تک ودھاؤن دے امکانات دا جائزہ لین۔

انہاں آکھیا کہ پاکستان بجلی دی پیداوار وچ اضافی صلاحیت رکھدا اے تے مسابقتی توانائی دی مارکیٹ متعارف کرا رہیا اے۔ وزیر نے ٹاپ منصوبے لئی تکنیکی ورکنگ گروپس دا اجلاس جلد بلاؤن تے چند ہفتیاں اندر روڈ میپ تیار کرن اُتے زور دتا۔

ترکمانستان دے وزیرِ توانائی اناگیلدی ساپاروف نے ٹاپ منصوبے دی تکمیل دے عزم دا اعادہ کردیاں دسیا کہ ترکمانستان افغانستان تک ٹرانسمیشن لائن بچھاؤن دا کم مکمل کر چکیا اے، جدوں کہ افغانستان توں کوئٹہ تک 1,150 کلومیٹر لمبے منصوبے دے باقی مراحل تے فزیبلٹی دے جائزے اُتے تکنیکی ورکنگ گروپ دے ذریعے کم اگے ودھایا جائے گا۔

دونواں فریقین نے تکنیکی مسائل حل کرن تے منصوبے نوں عملی شکل دین لئی فوکل پرسنز وچ باقاعدہ رابطہ برقرار رکھن اُتے اتفاق کیتا۔

دوجے پاسے تاجکستان دے وزیرِ خارجہ سراج الدین مہرالدین نے امید ظاہر کیتی اے کہ اگلا سال کاسا 1000 بجلی منصوبے دی تکمیل دے حوالے نال بہت اہم ثابت ہووے گا، جس نال تاجکستان جلد پاکستان نوں بجلی برآمد کرن دے قابل ہو جائے گا۔

ای سی او وزرائے خارجہ کونسل دے 30ویں اجلاس دے موقعے اُتے میڈیا نال گل بات کردیاں تاجک وزیرِ خارجہ نے آکھیا کہ تاجکستان منصوبے دے اپنے حصے اُتے پہلے ہی کافی کم مکمل کر چکیا اے۔ انہاں امید ظاہر کیتی کہ دوجے شراکت داراں دے تعاون نال افغانستان والے حصے دا کم وی مکمل کر لیا جائے گا۔

انہاں آکھیا کہ افغانستان دی صورتحال دے باعث بدقسمتی نال ایس منصوبے دی تکمیل وچ کافی وقت لگ چکیا اے، تاہم امید اے کہ تاجکستان دی بجلی جلد پاکستان پہنچنی شروع ہو جائے گی۔

اپنا تبصرہ گھلو