یکطرفہ ڈی این اے ٹیسٹ نال بچے دی ولدیت ختم نہیں ہو سکدی: لاہور ہائیکورٹ

ماں دی رضامندی تے عدالتی اجازت توں بغیر نجی ڈی این اے ٹیسٹ قانونی طور اُتے قابلِ قبول نہیں: جسٹس اسد باجوہ

– شادی دوران پیدا ہون والے بچے نوں ولدیت دا قانونی تحفظ حاصل اے، ماتحت عدالتاں دے فیصلے خلاف دائر درخواست خارج۔

لاہور (کورٹ رپورٹر) لاہور ہائیکورٹ نے بچے دی ولدیت توں انکار، نان نفقے تے جہیز دے مقدمے وچ ماتحت عدالتاں دے فیصلے خلاف دائر درخواست خارج کر دتی۔

جسٹس اسد علی باجوہ نے قرار دتا کہ ماں دی رضامندی تے عدالتی اجازت توں بغیر کروایا گیا یکطرفہ نجی ڈی این اے ٹیسٹ بچے دی قانونی ولدیت ختم نہیں کر سکدا۔

عدالت نے قرار دتا کہ شادی دوران پیدا ہون والے بچے نوں قانون دے تحت ولدیت دا تحفظ حاصل اے، جدوں کہ بچے دے بنیادی حقوق، عزت و وقار تے رازداری نوں مقدم رکھنا ضروری اے۔

درخواست گزار نے برطانیہ دی اک نجی لیبارٹری توں ڈی این اے ٹیسٹ کروایا سی، جس وچ مبینہ طور اُتے ولدیت مسترد ہوئی، تاہم عدالت نے قرار دتا کہ عدالتی نگرانی تے اجازت توں بغیر کروائے گئے ایس ٹیسٹ دی کوئی قانونی حیثیت نہیں۔

عدالت دے مطابق فریقین دی شادی 18 اگست 2019 نوں ہوئی، جدوں کہ بچے دی پیدائش 27 اپریل 2022 نوں ہوئی۔ ایس طرح بچہ شادی دوران پیدا ہویا۔ شواہد دے مطابق درخواست گزار خود اپنی اہلیہ نوں بچے دی پیدائش دے وقت ہسپتال لے کے گیا سی، جدوں کہ گواہاں نے وی اوہناں وقتاں وچ میاں بیوی دے درمیان ازدواجی تعلق قائم ہون دی تصدیق کیتی۔

عدالت نے مزید قرار دتا کہ ماں دی رضامندی توں بغیر بچے دا ڈی این اے نمونہ حاصل کرنا آئین دے آرٹیکل 9 تے 14 وچ دتے گئے شخصی آزادی تے انسانی وقار دے تحفظ دے اصولاں دے خلاف اے۔

ڈی این اے ٹیسٹ صرف فریقین دی خواہش یا ٹیکنالوجی دی دستیابی دی بنیاد اُتے نہیں، بلکہ انصاف دے تقاضیاں نوں مدنظر رکھ کے کروایا جا سکدا اے۔

عدالت نے نان نفقے وچ اضافے خلاف درخواست وی مسترد کردیاں قرار دتا کہ نابالغ بچے دیاں ضروریات تے والد دی مالی استطاعت نوں مدنظر رکھنا ضروری اے۔

اپنا تبصرہ گھلو