پنج نومبر دا حکم گورنر راج تے تھری ایم پی او تک محدود: وفاقی آئینی عدالت، پشاور ہائیکورٹ نوں ہور آئینی درخواستاں اُتے سماعت دی اجازت

تھری ایم پی او دیاں درخواستاں پشاور رجسٹری وچ دائر، ایتھے موصول ہون اُتے جائزہ لاواں گے: چیف جسٹس امین الدین

عبوری حکم وچ ترمیم، بار کونسلز نوں وی کارروائی وچ شامل ہونا چاہیدا اے: جسٹس عامر فاروق، پشاور بار کونسل نوں وی فریق بنن دی اجازت، فوج دی مسلسل تعیناتی ناگزیر: خیبر پختونخوا حکومت

اسلام آباد: وفاقی آئینی عدالت نے خیبر پختونخوا وچ گورنر راج تے تھری ایم پی او دے تحت گرفتاریوں نال متعلق مقدمے وچ پنج نومبر دے عبوری حکم وچ ترمیم کردیاں پشاور ہائیکورٹ نوں آرٹیکل 199 دے تحت گورنر راج تے تھری ایم پی او نال متعلق مقدمیاں توں علاوہ ہور آئینی درخواستاں دی سماعت دی اجازت دے دتی اے۔ عدالت نے واضح کیتا کہ پنج نومبر دا حکم صرف گورنر راج تے تھری ایم پی او نال متعلق معاملات تک محدود سی۔

چیف جسٹس امین الدین خان دی سربراہی وچ دو رکنی بینچ نے سماعت کیتی۔ بیرسٹر گوہر علی خان نے مؤقف اختیار کیتا کہ پنج نومبر دے حکم نال پشاور ہائیکورٹ دی عدالتی کارروائی متاثر ہوئی اے۔

جسٹس عامر فاروق نے ریمارکس دتے کہ آرٹیکل 245 دی سادہ تشریح کیتی جائے تے آرٹیکل 199 دے تحت مقدمیاں دی سماعت ممکن نہیں رہندی، تاہم ایس تشریح نال پورا عدالتی نظام مفلوج ہو جائے گا۔

عدالت نے واضح کیتا کہ پشاور ہائیکورٹ آرٹیکل 199 دے تحت ہور مقدمیاں دی سماعت جاری رکھ سکدی اے۔ بیرسٹر گوہر نے استدعا کیتی کہ عدالت تھری ایم پی او دے تحت گرفتار افراد نوں وی ریلیف فراہم کرے۔

چیف جسٹس امین الدین خان نے بیرسٹر گوہر نوں دَسیا کہ تھری ایم پی او نال متعلق متفرق درخواستاں پشاور رجسٹری وچ دائر کیتیاں گئیاں نیں، درخواستاں ایتھے موصول ہون اُتے جائزہ لیا جائے گا۔

جسٹس عامر فاروق نے ریمارکس دتے کہ ایہہ اہم مقدمہ اے تے ہنگامی حالت دا کیس وی اہمیت رکھدا اے، بار کونسلز نوں وی کارروائی وچ شامل ہونا چاہیدا اے۔ عدالت نے پشاور بار کونسل نوں مقدمے وچ فریق بنن دی اجازت دے دتی۔ مزید سماعت غیر معینہ مدت لئی ملتوی کر دتی گئی۔

دوجے پاسے خیبر پختونخوا حکومت نے وفاقی آئینی عدالت دے پنج نومبر 2026 دے حکم دی روشنی وچ ایڈووکیٹ جنرل دے ذریعے جمع کرائے گئے جواب وچ مؤقف اختیار کیتا اے کہ صوبے وچ سول انتظامیہ دی معاونت لئی مسلح افواج دی مسلسل تعیناتی ناگزیر اے تے حکومت دا فی الحال کسے ضلع یا علاقے توں فوج واپس بلاؤن یا تعیناتی ختم کرن دا کوئی ارادہ نہیں۔

صوبائی حکومت دے مطابق سول انتظامیہ تے صوبائی قانون نافذ کرن والے اداریاں نوں انسانی جاناں، سرکاری املاک تے ریاست دیاں اہم تنصیبات دی حفاظت لئی مسلح افواج دی معاونت تے عملی موجودگی دی لوڑ اے۔

اپنا تبصرہ گھلو