امریکا، روس تے چین دا ایٹمی جنگ نہ لڑن تے اتفاق: اقوام متحدہ وچ اصلاحات دا فیصلہ

شی جن پنگ، ٹرمپ تے پیوٹن عالمی سلامتی دے تحفظ تے سٹریٹیجک استحکام لئی پرعزم نیں: مشترکہ اعلامیہتریخ رقم کر رہے آں: ٹرمپ، سفارتکاری دا نواں باب لکھیا گیا: پیوٹن، عالمی امن تے مشترکہ موقف اے: شی جن پنگ

شینزن (نیوز ایجنسیاں) چین، روس تے امریکا نے سہ فریقی سربراہی ملاقات مگروں اک مشترکہ اعلامیہ جاری کیتا اے، جیہدے وچ آکھیا گیا اے کہ چینی صدر شی جن پنگ، روسی صدر پیوٹن تے امریکی صدر ٹرمپ سٹریٹیجک استحکام تے بین الاقوامی سلامتی دے تحفظ لئی اپنے عزم تے قائم نیں۔ اعلامیے موجب رہنماواں نے توانائی دے تحفظ بارے معاملیاں تے وی گل بات کیتی تے ریفائن شدہ پیٹرولیم مصنوعات دی پیداوار تے سپلائی ودھاؤن دے منصوباں تے اتفاق کیتا۔ ریاستی عہدیداراں نوں ملے استثنیٰ دا معاملہ وی زیرِ بحث آیا۔ اعلامیے وچ آکھیا گیا اے کہ رہنماواں نے ایس گل تے اتفاق کیتا کہ بین الاقوامی فوجداری عدالت (انٹرنیشنل کریمنل کورٹ، آئی سی سی) تے ایس طرحاں دے دوجے اداریاں نوں اپنے دائرہ اختیار دا ناجائز استعمال نہیں کرنا چاہیدا۔

جوہری معاملیاں تے تیناں رہنماواں نے ایس موقف نوں دہرایا کہ جوہری جنگ جِتی نہیں جا سکدی تے ایہنوں کدی لڑنا وی نہیں چاہیدا، تے تیناں رہنماواں نے ایٹمی جنگ نہ لڑن تے اتفاق کیتا۔ چینی سرکاری میڈیا موجب سہ فریقی ملاقات دے شروع وچ شی جن پنگ نے جوہری ہتھیاراں نوں ’’انسانیت دے سر تے لٹکدی ڈیموکلیز دی تلوار‘‘ قرار دتا سی۔ پرانی یونانی کہانی وچ ڈیموکلیز دی تلوار نوں وڈی طاقت یا دولت نال جُڑے لگاتار خطرات دے استعارے وجوں ورتیا جاندا اے۔ شی جن پنگ نے آکھیا کہ ایہناں نوں مکمل طور تے ممنوع قرار دینا چاہیدا اے تے پوری طرحاں تباہ کر دینا چاہیدا اے۔ اے ایف پی موجب چین دے صدر شی جن پنگ، امریکی صدر ٹرمپ تے روسی صدر پیوٹن دی ملاقات مگروں جاری ہون والے اعلامیے وچ آکھیا گیا اے کہ تینے ملک ریاستی عہدیداراں نوں سفارتی استثنیٰ دین دے اصول دا تحفظ چاہندے نیں۔ ایس توں وکھ صاف کیتیاں گئیاں پیٹرولیم مصنوعات دی پیداوار تے رسد ودھاؤن تے وی اتفاق کیتا گیا اے۔

شینزن وچ نیوز کانفرنس نال خطاب کردیاں پیوٹن نے آکھیا کہ اسیں جمہوریت دے سوال تے گل کیتی، جمہوریت کیہ اے؟ کیہ ایہہ اوہو لبرل نظام اے جیہنوں کجھ حلقیاں نے بنایا تے ہُن وی پوری دنیا تے تھوپّن دی کوشش کر رہے نیں؟ چین دے شہر شینزن وچ واقع کائلن ولا وچ بند کمرے وچ ہون والی گل بات اک گھنٹہ 20 منٹ مگروں مک گئی۔ ٹرمپ نے آکھیا کہ تینے رہنما تریخ رقم کر رہے نیں جد کہ پیوٹن دا آکھنا سی کہ اوہناں نے سفارتکاری دی تریخ وچ اک نواں باب لکھیا اے۔ شی جن پنگ نے آکھیا کہ تینے ملک عالمی امن دے تحفظ بارے مشترکہ نقطہ نظر رکھدے نیں۔ تیناں رہنماواں نے اقوام متحدہ وچ اصلاحات دے عزم دا وی اظہار کیتا تاں جو عالمی ادارہ دنیا نوں درپیش چیلنجاں نال ودھیا طریقے نال نپٹ سکے تے عالمی امن و سلامتی دے اپنے بنیادی مقصد موجب کم کر سکے۔

ایس سربراہی اجلاس مگروں ایہہ خدشے ودھ گئے نیں کہ تینے طاقتور رہنما دنیا نوں اپنے اپنے اثر و رسوخ دے علاقیاں وچ ونڈنا چاہندے نیں۔ ایس دی اک مثال یوکرین تے یورپ نوں نظرانداز کر کے یوکرین دے مستقبل بارے فیصلے کرنا ہو سکدی اے۔ خمیس والے دن ایس توں پہلاں ٹرمپ تے پیوٹن وچکار وکھری ملاقات وی ہوئی، جیہڑی اگست 2025 مگروں اوہناں دی پہلی ملاقات سی۔ 80 ورھیاں دے امریکی صدر نے روسی ہم منصب نوں اپنا دوست قرار دتا، جیہدے تے پیوٹن نے انگریزی وچ جواب دتا کہ تہاڈے نال مل کے خوشی ہوئی۔ ایس مگروں ٹرمپ تے شی جن پنگ وچکار وکھری ملاقات ہوئی۔ ایس ورھے دوہاں رہنماواں دی ایہہ تیجی ملاقات سی۔ امریکی صدر نے چین نال اپنے تعلقات نوں بہت خاص قرار دتا۔ 74 ورھیاں دے پیوٹن تے 73 ورھیاں دے شی جن پنگ وچکار بدھ والے دن ہون والی ملاقات دوہاں رہنماواں دی 50ویں ملاقات سی، جیہدا ذکر چینی صدر نے آپ کیتا۔ امریکی سینیٹ وچ ڈیموکریٹک پارٹی دے رہنما چک شومر نے آکھیا کہ شی جن پنگ تے پیوٹن، ٹرمپ نوں اک سستے ساز وانگ وجا رہے نیں۔

اپنا تبصرہ گھلو