اسلام 2035 تیکر دنیا دا سبھ توں وڈا مذہب بن جاوے گا: امریکی ادارے دی رپورٹ
مسلماناں دی گنتی 2 ارب 57 کروڑ تیکر اپڑ سکدی اے، وجہ ودھ شرح پیدائش، ہندواں تے یہودیاں دے تناسب وچ کمیمسیحی 2 ارب 52 کروڑ تیکر اپڑ سکدے نیں، اسلام چھڈن والیاں دی گنتی نسبتاً گھٹ، امریکا وچ مسیحی اکثریت مک جاوے گی
واشنگٹن (رائٹرز) اسلام آؤن والے دہاکے دے ادھ تیکر عیسائیت نوں پچھے چھڈ کے دنیا دا سبھ توں وڈا مذہب بن سکدا اے۔ ایس دی بنیادی وجہ مسلم آبادی وچ شرح پیدائش دا دوجے مذاہب دے مقابلے وچ ودھ ہونا اے۔ امریکی تحقیقی ادارے پیو ریسرچ سینٹر نے بدھ والے دن جاری کیتی اپنی نویں کھوج وچ ایہہ پیش گوئی کیتی اے۔ تحقیق موجب مسیحیت صدیاں توں دنیا دا سبھ توں وڈا مذہب رہی اے، پر مسلم آبادی وچ وادھے دی رفتار کدھرے ودھ اے۔ اندازیاں موجب 2035 تیکر دنیا بھر وچ مسلماناں دی گنتی 2 ارب 57 کروڑ جد کہ مسیحیاں دی گنتی 2 ارب 52 کروڑ تیکر اپڑ سکدی اے۔ پیو ریسرچ موجب جے آبادی وچ وادھے دے موجودہ رجحان برقرار رہے تاں 2070 تیکر دنیا وچ مسلماناں دی گنتی 3 ارب 60 کروڑ تے مسیحیاں دی گنتی 3 ارب ہو جاوے گی۔ اوس ویلے دنیا دی مجموعی آبادی وچ مسلماناں دا تناسب 37 فیصد جد کہ مسیحیاں دا تناسب تقریباً 29 فیصد ہون دا امکان اے۔ 2020 وچ مسلماناں دا عالمی آبادی وچ حصہ 26 فیصد سی۔
تحقیق وچ ایس تبدیلی دی بنیادی وجہ مسلم دنیا وچ شرح پیدائش نوں قرار دتا گیا اے۔ 2020 توں 2025 دے دوران اک مسلمان سوانی دے گھر اوسطاً 3.1 بالاں دی پیدائش ہوئی، جد کہ عیسائی سوانیاں وچ ایہہ شرح 2.5 بال فی سوانی رہی۔ دوجے سارے مذہبی گروہاں وچ مجموعی شرح پیدائش 1.6 بال فی سوانی رہی، جیہڑی آبادی دی اک نسل نوں برقرار رکھن لئی ضروری 2.1 دی شرح توں گھٹ اے۔ پیو ریسرچ موجب مسلماناں تے مسیحیاں دی آبادی وچ تبدیلی دا سبھ توں وڈا سبب پیدائش تے موتاں دا فرق اے، پر مذہب بدلن دا رجحان وی ایس وچ اپنا حصہ پاوے گا۔ تحقیق موجب 2020 توں 2070 دے دوران اسلام تے عیسائیت دوویں اپنے مذہب نال وابستگی چھڈن والے لوکاں دی گنتی پاروں پیروکار گواؤن گے، پر مسلماناں وچ ایہہ کمی نسبتاً گھٹ ہووے گی۔
اندازے موجب ایس عرصے وچ اسلام چھڈن والیاں دی گنتی 80 لکھ جد کہ عیسائیت چھڈن والیاں دی گنتی 10 کروڑ 50 لکھ ہو سکدی اے۔ دنیا دی مجموعی آبادی وچ 2020 توں 2070 دے درمیان 29 فیصد وادھے دا امکان اے۔ ایس عرصے وچ اسلام تے مسیحیت اوہ دو وڈے مذہبی گروہ ہون گے جیہناں دی آبادی وچ وادھا عالمی آبادی دی مجموعی شرح نمو دے برابر یا ایس توں ودھ رہوے گا۔ مسلماناں دی آبادی وچ 80 فیصد جد کہ عیسائیاں دی آبادی وچ 30 فیصد وادھے دا تخمینہ اے۔ ہندواں دی مجموعی گنتی وچ وادھا ہووے گا، پر عالمی آبادی وچ اوہناں دا تناسب گھٹ ہو کے 2070 وچ 13.6 فیصد رہن دا امکان اے۔ یہودی آبادی دا تناسب وی گھٹ ہو کے 0.17 فیصد ہو سکدا اے۔ بدھ مت دے پیروکاراں دی گنتی تے عالمی آبادی وچ اوہناں دا حصہ دوویں گھٹ ہون دی پیش گوئی کیتی گئی اے۔
تحقیق موجب بہائی، تاؤ مت، جین مت، سکھ مت تے وکھو وکھ مقامی مذاہب دے پیروکاراں دی مجموعی گنتی وچ معمولی وادھا ہووے گا، پر 2070 تیکر عالمی آبادی وچ ایہناں ساریاں دا سانجھا تناسب 2 فیصد توں گھٹ رہن دا امکان اے۔ ایس طرحاں کسے مذہب نال وابستہ نہ ہون والے لوک، جیہناں وچ ملحد تے لاادری وی شامل نیں، دا عالمی آبادی وچ تناسب 2020 دے 24 فیصد توں گھٹ ہو کے 2070 وچ 17 فیصد رہن دا امکان اے۔ دنیا وچ مذاہب دی جغرافیائی ونڈ وی بدل رہی اے۔ 2070 تیکر امریکا وچ عیسائیت سبھ توں وڈا مذہب تاں رہوے گی، پر عیسائی اوتھے اکثریت وچ نہیں ہون گے۔ ایس دوران جمہوریہ کانگو امریکا نوں پچھے چھڈ کے دنیا وچ عیسائیاں دی سبھ توں وڈی گنتی والا ملک بن سکدا اے۔ رپورٹ موجب مذہب نال وابستہ نہ ہون والے لوکاں دی گنتی بہتے ملکاں وچ ودھے گی، پر چین دی آبادی وچ متوقع کمی ایس وادھے نوں مجموعی طور تے گھٹ کر دیوے گی۔ دنیا دے غیر مذہبی لوکاں دی وڈی گنتی ایس ویلے چین وچ رہندی اے۔





















