سی پی او گوجرانوالہ نال اک ادھوری ملاقات

لکھت:عتیق انور راجہ

ہر روز کئی لوکا نال ملن جلن دا عمل جاری رہندا اے پر بوہت گھٹ انج ہوندا اے کہ کسے نال ملو تے دل آکھے کہ ایس نال پہلے کیوں نہیں ملے تے کدی کدی کسے صاحب عقل تے دانش نال ملن توں بعد ایہہ خیال وی آندا اے کہ ایس دے در اُتے بیٹھے رہیے تے علم تے حکمت دے موتیاں نال اپنی جھولی بھردے رہیے پر سال چھ مہینے بعد انج وی ہوجاندا اے کہ کسے نال ملن توں بعد اسیں سوچدے آں کہ ساڈی کیہڑی غلطی نے سانوں ایس بندے دے نال ملا دتا۔ انج وی ہوندا اے کہ کسے ملاقات دی تلخی دا ذائقہ کئی کئی مہینے ساہواں وچ محسوس ہوندا رہندا اے لکھن لکھان تے خاص کر کالم لکھن دا عمل کئی ورھیاں توں جاری اے۔ شروع وچ انتظامی افسراں نال ملاقات دا نہ کدی سوچیا تے نہ کدی ایہناں نال ملن گئے پر سائبان دے زیر اہتمام جدوں علمی، ادبی، ثقافتی تے سماجی سرگرمیاں کیتیاں تے ہر شعبہ ہائے زندگی نال ہر طرح دے لوکاں نال ملاقاتاں دا سلسلا ٹُر پیا۔ جنہاں وچ سرکاری افسراں ، سیاست دان ، ماہرین تعلیم، سماج سیوک تے علما کرام شامل رہے۔ میں حقیقت وچ ویکھاں تے مینوں ایہہ کہن وچ کوئی عار نہیں اے کہ مینوں ہ میشہ میرے رب نے میری توقعات توں ودھ کے عزت دتی اے۔ پچھلے ورہے دسویں، قومی کتاب میلے دے ویلے اسلام آباد دیاں سڑکاں اُتے میرے ناں تے فوٹو دے نال فلیکس دا لگنا میرے جہے پینڈو بندے ل ئی اک بوہت وڈا اعزاز سی تے میں سمجھنا واں کہ میری زندگی دا اوہ اک یاد گار لمحہ بن گیا جنہوں وچ ساری حیاتی نہیں بھُلاں گا۔ فیر پچھلے ورہے گورنر ہائوس لہور وچ میری کتاب، کاسہ ء چشم دی تقریب رونمائی دا ہونا وی اک انج دا اعزاز سی جس وچ گورنر پنجاب چوہدری محمد سرور دے نال نال ملک دے وڈے نامور شاعر، صحافی، کالم نگار تے گلوکار شریک ہوئے۔ گوجرانوالہ توں پجاہ سٹھ لوکاں دا میری کتاب دی تقریب وچ شرکت لئی لہور جانا تے گورنر پنجاب دا میرے ساتھیاں دا ناں لے ایہناں نوں عزت دینا اک انج دا اعزاز اے،جیہڑا میرے شہر توں شاید ای ہور کسے دے حصے وچ اآیا ہوئے، فیر دو ورہے پہلے ملک دے نامور موٹیویشنل سپیکر سید قاسم علی شاہ صاحب نے جدوں اپیکس گروپ اآف کالجز دی تقریب وچ ہزاراں دے اجتماع وچ میرا ناں لوے کہیا کہ جے گوجرانوالہ وچ کوئی بندہ علمی، ادبی تے ثقافتی حوالےنال کم کر رہیا اے تے اوہ بھائی جان عتیق انور راجہ نیں۔ شاہ صاحب دے لفظاں نال مینوں لگیا کہ جویں مینوں جیتے جی اوہ تغمہ، اوہ پہچان مل گئی اے جیہڑی بوہت سارے اہل قلم و علم نوں ایہناں دے مرن دے کئی عشریاں بعد ملدی اے۔
صاحبو! ایہہ سب لکھن دا مقصد ایہہ بلکل نہیں کہ اپنا تعارف پیش کر رہیا واں بلکے ایہہ لکھن دا مطلب ایہہ وے کہ ایس شہر محبت وچ رہندے ہوئے اہل علم دے نال بہہ کے مینوں اوہ محبتاں تے پیار ملیا اے جس لئی میں رب دے حضور جنا شکر ادا کراں گھٹ اے۔ گل چلی سی سی پی او صاحب نال ملاقات دی تے میں پتہ نہیں کتھوں کتھے جا اپڑیا۔ کالمنسٹ فورم گوجرانوالہ دے مہربان دوست پچھلے اک ورھے توں شہر وچ ہر نویں تعینات ہون والے ڈی سی، کمشنر، سی پی او تے اآر پی او توں تعارفی میٹنگ لئی بلاندے نیں تے میں بنا کوئی بہانہ بنائے ویلے توں پنج منٹ پہلے متھے مقام اُتے اپڑ جانا واں۔ کالمنسٹ فورم دے نال اک دو ملاقاتاں توں بعد میں صدر کالمنسٹ فورم چوہدری ارشاد سندھو تے سیکرٹری صاحب نال عرض کیتا سی کہ جناب اپنے گروپ وچ اک تے ایکٹو کالم نگاراں نوں ریکھیے تے دوجے ایہناں نوں کہو کہ وٹس گروپ وچ اپنے کالم وی نال نال شیئر کردے رہن پر حقیقت ایہو اے کہ ایس گل اُتے عمل نہیں ہو سکیا۔خیر ایس بار ساڈی ملاقات گوجرانوالہ وچ تعینات ہون والے نویں سی پی او رائے بابر صاحب نال دوپہر تن وجے طے ہوئی۔ ساڈے توں پہلے پرنٹ میڈیا دے دوستاں دی ملاقات چل رہی سی۔ اسیں میٹینگ ہال دے ساہمنے بیٹھے ویکھ رہے ساں کہ پرنٹ میڈیا دے دوستاں لئی ٹھنڈا پانی تے چاہ بسکٹ دا اہتمام وی سی پر باہر انتظار کرن والیاں لئی پانی دا کوئی بندوبست نظر نہیں آیا۔ ایس دن فضا وچ گھٹن کجھ زیادہ سی ایس لئی گرمی شاید بوہت زیادہ لگ رہی سی،ہونٹ پیاس دی شدت نال سُک رہے سن جدوں پیاس برداشت کرنا اوکھا ہو گیا تے اک دوست دے نال سی پی او بلڈنگ دے کئی کمریاں وچ جھانک کے ویکھیا کہ شاید کدھروں پانی دے کجھ گھُٹ مل جان پر انج نہیں ہو سکیا۔ کسے کمرے وچ سانوں پانی نہ ملیا تے کسے نے کینٹین دا راہ دسیا اوتھے اک نکی عمر دے ،چھوٹے، نے 25 روپئے والی پانی دی بوتل چالی روپئے وچ سانوں دتی۔ پانی دے کجھ گھُت پین توں بعد اللہ دا شکر ادا کیتا تے سی پی او صاحب نال ملاقات دے انتظار وچ رُکھ دی چھاں تھلے بہہ گیا۔پرنٹ میڈیا والیاں دی ملاقات ختم ہوئی تے پتہ چلیا کہ صاحب نے کالم نگاراں نوں اپنے کمرے وچ ای بُلا لیا اے ملاقات کیہ سی لگدا سی اسیں نویں صاحب نوں حاضری لوان آئے آں۔ سب کالم نگاراں نال تعارف کران دا کہیا گیا تے ہمیشہ وانگوں قاری شاکر صاحب نے کالم نگاراں دی ترجمانی دا فریضہ ادا کردے ہوئے بڑے خوبصورت انداز وچ کجھ لفظ ادا کیتے تے اسیں سارے اوتھوں باہر نکل آئے۔ دفتر توں باہر نکلدے ای خیال آیا کہ اینی گرمی وچ اسیں ایتھے کیوں آئے ساں؟ پنج منٹ دی تعارفی ملاقات لئی سخت گرمی اک گھنٹہ باہر بیٹھنا کیوں گوارہ کیتا۔ سی پی او دفتر دے احاطے وچ ایہہ طے کر لیا کہ دوستاں دی عزت اپنی تھاں پر ہن کالم نگاراں دے نال کسے تعارفی ملاقات لئی بلکل نہیں جانا۔ میری سابقہ افسراں نال چنگی خاصی ملاقاتاں رہیاں نیں۔ تیموری صاحب تے طارق عباس قریشی کئی وار سائبان دی تقریباں وچ شریک ہوئے۔ سابق سی پی او گوجرانوالہ اشفاق خان تے گوہر مشتاق بھٹہ صاحبان نال معاشرتی رویاں دے حوالے نال گل بات دے کئی سیشن ہوئے نیں۔ ہجے پچھے مہینے ای آر پی او گوجرانوالہ ریاض نذیر گاڑا صاحب نال اک تفصیلی ملاقات ہوئی سی۔ دوستواسیں نہ تے کسے ذاتی پروجیکشن لئی کسے افسر نوں ملن جاندے آں تے نہ اسیں کدی کسے غلط کم لئی کسے نال کوئی سفارش کیتی اے۔ساڈی ملاقاتاں دا مقصد ہمیشہ توں رہیا اے کہ معاشرے دی بہتری لئی تے عوامی فلاح لئی گل بات کیتی جائے پر رائے بابر صاحب نال کالمنسٹ فورم دے نال ہون والی بنا چاہ دی ایس ادھوری ملاقات نے دل اُتے اوہ چوٹ کیتی اے کہ ایس دیاں ٹیساں کئی مہینے دل وچ محسوس ہوندیاں رہن گیاں۔ سی پی او صاحب نال ایس کالم دے ذریعے ایہہ کہنا اے کہ اپنے دفتر دے باہر بیٹھے لوکاں تے ایسے عمارت وچ سرکاری ملازماں لئی پانی دے کولر ضرور رکھوا دین۔ پرنٹ میڈیا دی طاقت توں انکار نہیں پر رپورٹر تے رائیٹر دے فرق دا خیال ضرور کر لیا کرو۔