ساڈا وطن عظیم تر اے

لکھت:رابعہ رحمن

جدوں باسی کڑھی وچ اُبال آن لگدا اے تے تبصریاں، مذاکریاں، تجزیاں تے تنقیداں دے سارے بھونپو وجن لگدے نیں تے ہر اک بھونپو دے باجے توں یا ڈفلی دی دھب دھب نال مختلف اوازاں تے سُر نکلدے نیں ، اپنی اپنی بولی وچ ہر کوئی بیان بازی کر رہیا ہوندا اے جے ایس دی بجائے اسیں اپنی گل وچ وزن پیدا کریے، گل کرن توں پہلے تحقیق کر لیے تے فیر مذہب، معاشرتی روایت، اخلاقیات تے قانون نوں مدنظر رکھدے ہوئے اپنا مدعا بیان کریے تے شاید سنن والے نوں وی چنگا لگیمیڈیا اُتے وی چنگے تے مہذب گل بات سنن دا موقع ملے تے اخباراں وچ گند گھولن تے الزام تراشیاں دی بجائے خبر، ادب و آداب دے دائرے وچ رہ کے منظر عام اُتے آئے تے پاکستانی عوام وی چین تے سکون نوں محسوس کر سکن۔ پرنٹ تے الیکٹرانک میڈیا توں ڈرن دی بجائے اسیں بے چینی نال ایس دے آن دا انتظار کریے۔ سچ تے ایہہ وے کہ ساڈا وطن بوہت پیارا اے ایس دی تعمیر سچائی، خلوص، بے غرضی، تہذیب و تمدن تے ایمان دیاں اٹاں دیاں بنیاد اُتے ہوئی اے۔ کوئی وی عاقل و بالغ ایس گل توں انکار نہیں کر سکدا کہ آزادی ویلے تے ایس توں پہلے دیاں تحریکاں وچ بچہ، بڈھا، جوان، عورت تے مرد سب شیروشکر ہو کے کاروائیاں، جلسے جلوساں، احتجاجاں وچ شامل سن۔ ایس ویلے اک ای پلیٹ فارم اک ای پارٹی سی جیہڑی اپنے وطن اسلامی جمہوریہ پاکستان لئی سردھڑ دی بازی لا رہی سی۔ اک تقریب وچ جان دا اتفاق ہویا تے میزبان اعلیٰ کہہ رہیاں سن کہ اج آزادی دا جشن اے پاکستان نوں آزاد ہوئے کنے ورہے ہو گئے پر اسیں اج تیکر آزاد نہیں ہوئے۔ مینوں ایہہ سن کے بوہت دکھ ہویا اسیں کتھے آزاد نہیں آں؟ جے اسیں حیاتی دے نال نال پرانیاں یاداں تازہ کریے تے جو سانوں نظر آئے گا اوہ ایمانداری، جذبہ حب الوطنی، کرپشن دے خلاف مہم، رشوت دے خلاف جنگ، جھوٹ، دغا بازونسے حتیٰ الامکاں نفرت، پاکستان دی ترقی و ترویج لئی کم کرن والے نامور معزز پاکستانی جنہاں وچ ڈاکٹر عبدالقدیر خاں، عبدالستار ایدھی ، ارفع کریم، ملالہ یوسف زئی، شہدائے عظیم جنہاں دی حیاتی ہن اسیں جی رہے آں ہر دور دا سیاستدان جو چاہے، مفاد پرست وی ہوئے پر کجھ کجھ وطن عظیم دی آزادی، عزت، سربلندی تے توقیر لئی معروف عمل، پسماندہ علاقیاں وچ بجلی، گیس تے پانی دا نظام ممکنہ حد تیکر بحال سرکاری ہسپتال، ڈسپنسریاں، دوائیاں، طبی معالجے دی بہترین سہولتاں دی کوششاں، مختلف سروسز دے بوہت انج دے دانشور جیہڑے اندرون تے بیرون ملک انٹرنیشنل فورم اُتے پاکستان دی مضبوطی دا کارن بن دے نیں، ساڈے ادیب، شعراء، کالم نگار، ساڈے میڈیا دے قابل فقیہ الذہن صحافی، کمپیئر پاکستان لئی ببانک دہل جان دین نوں تیار نیں ساڈی تعلیمی ترقی دی مثال ابھردے سورج وانگوں اے۔ سرکاری تعلیمی اداریاں توں ودھ کے گل نجی اداریاں دا تواتر توں کھلنا تے طالبعلماں دے داخلیاں دی اک لمبی لسٹ ساڈی علمی فروغ دی مثال اے ساڈی ثقافت، تمدن، تہذیب، ساڈی زبان اردو دا سرکاری زبان قرار دتے جانا، تقریبات وچ اردو وچ تقریراں، آرمی افسراں دا عوام نال تے پیارے وطن دے خاص تہواراں یوم تکبیر، یوم شہداء تے یوم آزادی اُتے انداز تشکر، قوم دا انداز فکر، ہر وار اک پلیٹ فارم اُتے جمع ہو کے وطن دی مضبوطی لئی شانہ بشانہ کم کرن دا عزم آہن، تجدید ، عہد، روزگار دے مواقعیاں دی ممکنہ فراہمی، عمارتاں، پلازے، سڑکاں، پل، انڈرپاس، میٹرو تے موٹروے پاکستان دی آزادی اے تے ہمیشہ پاکستانی قوم دا سرمایہ رہے گی۔
ساڈے سائنسداناں دی دن رات دی انتھک کوششاں ایس وطن نوں ایٹمی طاقت دا سرچشمہ بنان لئی ایہناں نوں کیہڑیاں یادداشتاں توں کڈ سکدا اے۔ 1948، 1965 تے 1971 دیاں جنگاں پانی بہا کے نہیں لڑیاں گئیاں۔ ایس وطن دی آزاد قوم نے آزاد وطن پاکستان لئی آزادی نوں مضبوط سرحداں وچ مقید کرن لئی لہو تے جگر دے ٹکڑیاں نال لڑی اے تے جناب کیہ شواہد گھٹ نیں ساڈی آزادی دی للکار لئی۔ ایہہ ساڈی پیشانی اُتے جیہڑی آزادی دا سورج روشن اے ساڈی دھون وچ جیہڑی عزت تاراں دی جھلمل کردی مالا وانگوں چمک رہی اے تے چکاچوند کردی اے وطن پاکستان دے جھنڈے تے ساڈی صداقت تے شجاعت نوں پاکستان نوں آزاد نہ کہن والے پاکستان نوں زندہ باد تے پائندہ باد دے نعرے وچ نہ سدن والے جان لین کہ جدوں تیکر شہادتاں عزم استقلال، ایثار و قربانی لئی اسیں ہر ویلے تیار و کامران رہاں گے ساڈا وطن سربلند رہے گا۔ اسیں وطن پرست، مذہب پرست تے اپنے اسلاف دے کارنامیاں دے پیروکار آں جدوں ایہہ وطن ساڈے حوالے کیتا گیا ایس ویلے گو کہ ظلمت کدے زیادہ سن پر اج ہر سُو اجالا اے۔ اک ننھے جہے چراغ وچ وی اک جگنو وچ وی اینی روشنی اے کہ اوہ بھٹکے ہویاں نوں منزل تیکر لے جاندا اے اسیں تے فیر اپنی اکھاں اپنا دل اپنے بازو اپنے جگر ایس وطن دی راہ وچ مٹی کر دتے نیں تے نہ ساڈے اُتے کوئی غم دے پہاڑ ٹٹے نیں نہ اسیں کمزور تے بے منزل ہوئے آںساڈے رستے صاف وکھائی دیندے نیں۔ اسیں پہاڑ دیاں چوٹیاں نوں سر کرن دی اج وی اینی ای طاقت رکھنے آں جنی کہ کارگل دی جنگ وچ سی۔ ساڈی ہار نوں ساڈا دشمن ترسدا اے تے اسیں ترس رہے آں ایس دن نوں کہ جدوں ساڈا پیارا جھنڈا دنیا وچ ہمیشہ لئی لہرایا جائیگا تے دشمن وطن دے جھنڈے سرنگوں ہون گے تے ساڈی قومیت حاصل کرن لئی پوری دنیا دے لوک خواہشمند ہون گے کیوں جے اسلامی جمہوریہ پاکستان ای ایس دنیا دا عظیم ملک بنے گا۔ انشاء اللہ