پاکستان وچ صدارتی نظام دی گونج

لکھت:اعجازعلی ساغر

تحریک انصاف 2018ء وچ جدوں اقتدار وچ آئی تے ایس لئی پہلے دن توں ای مسئلے نے جنم لے لیا ایہہ مسئلے اینوں پچھی سیاسی جماعتان دی طرفوں وراثت وچ ملے سن سسٹم بالکل بہہ چکیا سی ادارے تقریباً تباہ ہو چکے سن ہر پاسے کرپشن تے رشوت ستانی دا بازار گرم سی جائز کم لئی وی پیسے دینے پیندے سن ملک دیوالیہ ہون دے نیڑے سی قومی خزانہ خالی سی بیرونی قرضیاں اُتے سود اینا سی کہ اینوں ادا کرن لئی سانوں بھاری شرطاں اُتے قرضہ لینا پیندا سی۔ پچھلی حکومتاں نے ملک نوں ایس اسٹیج اُتے لا کھڑا کیتا کہ قومی ادارے گروی رکھنے پئے گئے سن تے نوبت ہن ایتھوں تیکر آ اپڑی سی کہ سانوں اپنے ایٹمی اثاثیاں دی فکر پئے گئی سی کہ کدوں ساڈے توں ایٹمی اثاثیاں دی حوالگی دا مطالبہ کیتا جاندا اے امریکی ڈرون بلاخوف و خطر شہری آبادیاں نوں آ کے ٹارگٹ کر کے ٹُر جاندے تے واشنگٹن ڈی سی ہر وار ڈومور دا مطالبہ کردا تے ساڈے حکمران بس صفائیاں دیندے پھردے بس اسیں ناں دے آزاد سی ساڈے فیصلے کدھرے ہور ہوندے سن ایہناں سارے چیلنجاں نال عمران خان تے تحریک انصاف نوں نمبڑنا سی۔ تحریک انصاف نوں مسلم لیگ ن ، پیپلز پارٹی، مولانا فضل الرحمن سنے متحد تے مضبوط اپوزیشن دا وی ساہمنا سی تے مافیا وی پوری طرح پنجے گاڑھے بیٹھا سی۔ سب توں پہلے تحریک انصاف نے بیرونی قرضہ جات دی ادائیگی تے ملکی خزانے نوں بھرن دے حوالے نال کم شروع کیتا ایس سلسلے وچ ٹیکس وصولی دی شرح نوں ودھایا گیا۔ چوں کے ادارے تقریباً تباہ ہو چکے سن تاں ایس حوالے نال کابینہ نے سر جوڑے تے وزیراعظم پاکستان نے اداریاں دی بحالی تے ایہناں نوں اپنے پیراں اُتے کھڑا کرن دے عزم دا اعادہ کیتا گیا تے ہولی ہولی اداریاں نوں بہتر کیتا جان لگیا۔ وزیراعظم پاکستان اقوام متحدہ دی جنرل اسمبلی وچ متاثر کن خطاب توں بعد دنیا دے موثر ترین لیڈر بن کے ابھرے بھارت جیہڑا پاکستان دا ازلی دشمن سی ایس نوں ترقی کردا پاکستان کنج ہضم ہوندا تاں ایس نے پاکستان دے خلاف لابنگ شروع کر دتی تے ہٹلر مودی نے پاکستان نوں اقوام عالم دیاں نظراں وچ ڈیگن دی بوہت کوشش کیتی پر وزیراعظم پاکستان عمران خان تے وزیر خارجہ دی بہترین سفارتکاری پاروں بھارت اپنے مذموم مقصد وچ ناکام ہویا۔ پاکستان وزیراعظم عمران خان تے ایہناں دے بہترین وزراء دی انتھک محنت پاروں دن بدن ترقی کرن لگیا قومی خزانہ جیہڑا خالی ہو چکیا سی تے ملک دیوالیہ ہون دے نیڑے سی اوہ ملک ہولی ہولی اپنے پیراں اُتے کھڑا ہون لگیا۔چوں کے اقتدار چنگے چنگیاں نوں خراب کر دیندا اے تاں ایہو کجھ تحریک انصاف دے کجھ وزیراں تے ممبراں دے نال ہویا اقتدار ملدے ای اوہ وی پچھلے سیاستداناں دے رستے اُتے ٹُر پئے تے وگدی گنگا وچ ہتھ دھون لگ پئے چوں کے 2018ء دے الیکشن وچ عمران خان نوں واضح اکثریت نہیں مل سکی تاں ایہناں نوں اتحادیاں دا سہارا لینا پیا اتحادیاں نے تحریک انصاف تے عمران خان نوں نک توں چنے چبوا دتے خاص کر پنجاب تے وفاق وچ اتحادیاں نے تحریک انصاف دی ساکھ نوں بوہت نقصان اپڑیا ۔ دوجے پاسے اپوزیشن وی ملک بچان دی بجائے ابا بچائو تحریک لے کے میدان وچ آ گئے چوں کے ادارے ہن کم کرنا شروع ہو گئے سن تاں دونواں وڈی سیاسی جماعتاں دے رہنماواں دی گرفتاریاں تے پکڑ دھکڑ معمول بن چکی سی پیپلز پارٹی سندھ جد کہ مسلم لیگ پنجاب دی طرفوں زور آزمائی کر رہی سی ایہناں دونواں جماعتاں نوں ایہہ ادراک ہو چکیا سی کہ وفاق حاصل کرنا ایہناں لئی کافی اوکھا ہو چکیا اے چوں کے ایہناں دونواں سیاسی جماعتاں نے لگ بھگ 30 ورہے حکمرانی کیتی اے چناں چے اوہناں نے اپنے پنجے مضبوط کر لئے سن تحریک انصاف دی حکومت وجود وچ آ چکی سی پر حکومتی معاملات چلان وچ ایس نوں دشوار دا ساہمنا سی ایس دی وجہ بیورو کریسی سی جیہڑی ہجے تیکر مسلم لیگ ن دے زیر اثر سی تے ملک چلان وچ سارا کردار بیورو کریسی دا ای ہوندا اے سب توں پہلے آٹا بحران ایس دے بعد شوگر تے ہن بجلی دا بحران تحریک انصاف ایس دو ورہے اقتدار وچ بحراناں وچ ای گھری رہی اے تے ایس دے رستے وچ طرح طرح دے روڑے اٹکائے گئے نیں عوام وچ بے چینی تے مایوسی ودھائی جا رہی اے تے ایہہ ظاہر کیتا جا رہیا اے کہ عمران خان تے تحریک انصاف ڈیلیور نہیں کر پا رہے۔ دوجے پاسے اپوزیشن دی طرفوں اداریاں اُتے تنقید دا سلسلا دن بدن ودھدا جا رہیا اے۔ میاں نواز شریف نے اپنی نااہلی توں بعد آئینی اداریاں نوں خوب لتاڑیا تے اپنی ہر تقریر وچ خلائی مخلوق دا ذکر کردے تے فوج، عدلیہ تے نیت دے خلاف سخت زبان استعمال کر دے رہے ایسے طرح آصف علی زرداری نے وی اٹ نال اٹ وجان تے پیراں وچ جھکان دے بیان دے کے اک انج دی روایت نوں جنم دتا ویلا بوہت وڈا مرہم ہوندا اے۔ آصف علی زرداری تے نواز شریف نوں صدر تے وزیراعظم بنان والی ایس عوام نوں جے قائداعظم دا پاکستان چاہیدا اے تے فیر عمران خان نوں بطور صدر لیانا ہوئے گا تے ملک وچ صدارتی نظام رائج کرنا ہوئے گا کیوں جے پارلیمانی نظام وچ ایس ملک دا چیف جسٹس شراب نوں شراب ثابت نہیں کر سکیا مافیا ایس ملک دیاں جڑاں وچ بہہ چکیا اے ایس مافیا نوں ختم کرن لئی جزا تے سزا دا عمل شروع کرنا ہوئے گا تے ایہہ اودوں تیکر انج نہیں ہو سکدا جدوں تیکر صدارتی نظام نہ آ جائے۔
تحریک انصاف توں عوام نوں آس سی کہ اوہ کرپشن ختم کرے گی پر کرپشن ختم کرن دی بجائے ہور ودھ گئی اے بلکے سر عام ہو گئی اے اودوں وزیراعظم پاکستان نے وزیراعلیٰ پنجاب عثمان بزدار تے وفاقی کابینہ اُتے زور دتا اے کہ اوہ ایس کرپٹ مافیا دے خلاف آہنی ہتھاں نال نمبڑن۔ ایس ویلے ملک وچ ساری سیاسی جماعتاں چوہے بلی دا کھیڈ کھیڈ رہیاں نیں کسے نوں وی عوام دی پرواہ نہیں سوائے عمران خان دے تاں ایس قوم تے ملک نوں ترقی دی حقیقتی راہ اُتے گامزن کرن لئی عمران خان نوں صدر لیانا ہوئے گا۔ ایس دے نال نال اپوزیشن دی جماعتاں نوں وی اک مشورہ اے کہ کرسی دے لالچ وچ ایس حد تیکر نہ جان کہ دوبارہ کرسی نصیب نہ ہوئے کیوں جے ایس ملک وچ ملک دشمن عناصر دی کوئی تھاں نہیں قوم دے اوہ عظیم ہیرو تے سپوت ایس دی حفاظت لئی تن من دھن دی بازی لان لئی ہمہ وقت تیار نیںَ مسلم لیگ ن تے پیپلز پارٹی اقتدار دی ایس رسہ کشی وچ ایس حد نوں کراس نہ کرن کہ فیر واپسی ممکن نہ ہوئے بلاول تے مریم ویلے دا انتظار کرن تے موجودہ صدارتی نظام نوں سپورٹ کرن جے اوہ اقتدار حاصل کرنا چاہندے نیں کیوں جے ایس دی گونج ہن زور و شور نال سنائی دین لگی اے تاں عقلمندی ایہو اے کہ ٹھیک ویلے دا انتظار کیتا جائے تے عمران خان صاحب شاید تہانوں فیر کدی موقع نہ ملے تاں ویلا تہاڈا اے خدارا ایس قوم تے ملک دا بھلا کردے جائو ایہہ قوم آزادی توں لے کے ہن تیکر آزادی دی کوشش کر رہی اے پلیز ایس گلے سڑے تے راشی نظام نوں دفن کر دیو چاہے تہانوں ایس لئی جنی مرضی سخت فیصلے لینے پین تسیں قوم نوں ریاست مدینہ دے کے جائو ایس ملک نوں اوہ ای ملک بنانا اے جیہڑا تسیں خاب ویکھیا اے جے تسیں ایس ملک نوں صحیح ڈگر اُتے پا دتا تے تریخ تہانوں پاکستان دے محسناں دے طور اُتے یاد رکھے گی۔