فیملی پلاننگ تے پاکستان دی خوشحالی
لکھت:عتیق انور راجہ
اج مغرب دے جیہڑے ملک ترقی وچ ساڈے توں بوہت اگے نیں یا جنہاں ملکاں دی صفائی ستھرائی دے قصے ساڈا میڈیا سناندا اے یا جنہاں یورپی ملکاں دے بارے وچ کہندے نیں کہ اوتھے دیاں حکومتاں اپنی عوام نوں بہتر تعلیم و تربیت تے صحت دیاں سہولتاں اُتے بوہت توجہ دے رہی اے۔ ایہناں ملکاں دی ترقی دا راز کیہ اے تے اوتھے وسائل مسئلیاں توں کیوں زیادہ نیں ایہہ اسیں سمجھن دی کوشش بالکل وی نہیں کردے۔ سانوں ایہہ احساس ای نہیں کہ ایہناں ملکاں دی ترقی دی ہور بوہت ساری وجوہات دے نال ایہناں دا اپنی آبادی اُتے کنٹرول کرنا اک وڈی وجہ اے تے دوجے پاسے اسیں سارے ایہہ گل بخوبی جان دے نیں کہ پاکستان وچ آبادی ودھن دی شرح دنیا دے دوجے ملکاں توں بوہت زیادہ اے۔
جنہاں ملکاں نے اپنی آبادی نوں کنٹرول کیتا اے ایہناں ملکاں وچ خواتین ہیلتھ ورکر دی خدمات بوہت زیادہ بیان کیتی جاندی اے پر پاکستان پتہ نہیں کیوںایہناں عورتاں نوں ہجے تیکر مستقل نہیں کیتا جا رہیا جنہاں نال اسیں ملکی آبادی نوں کنٹرول کرن دا خاب ویکھ رہے آں۔ ملک دے دوجے حصیاں وانگوں پنجاب وچ بوہت مشکلاں دے باوجود محکمہ بہبود آبادی اپنے فرائض پوری طرح ادا کر رہیا اے ملک دے روشن مستقبل لئی آبادی کنٹرول کرن لئی وی مستقل بنیاداں اُتے منصوبہ بندی کرنی ہوئے گی۔ تے ایہہ اودوں ای ہوئے گا جدوں ایس محکمے وچ کم کرن والیاں عورتاں دے روزگار نوں تحفظ دتا جائے گا۔ ایہناں دی پشت پناہی کیتی جائے جس نال بہبود آبادی دے محکمے نوں وی استحکام ملے گا تے خوشحال پاکستان دا خاب وی پورا ہوئے گا۔ تحریک انصاف دی کامیابی توں بعد پاکستانی عورتاں دا خیال سی کہ ہن ایہناں لئی وی مرداں دے برابر نوکریاں ہون گیاں حکومت ایہناں نوں برابر دے موقع دے کے ایہناں دا اعتماد ودھائے گی۔ نویں حکومت توں بہتری دی امید رکھن والی تے بہتر مستقبل دے سپنے ویکھن والیاں عورتاں وچ محکمہ بہبود آبادی دی کمیونٹی بیسڈ فیملی پلاننگ ورکراں وی شامل سن۔ بہبود آبادی دے محکمے وچ نوکری دے حصول لئی جدوں اخباراں وچ اشتہار شائع ہویا تے ایس لئی تعلیمی قابلیت انڈر میٹرک یا میٹرک پاس ہونا سی پر سابقہ دور وچ نوکری دے برابر موقعے حاصل نہ ہون دی وجہ نال واہوا تعداد وچ اعلیٰ تعلیم یافتہ کُڑیاں نے ایس جاب لئی درخواستاں دے دتیاں۔ محکمانہ انٹرویوز تے دوجے مرحلیاں توں لنگھ کے ایہناں نوں جدوں نوکری لبھی تے پتہ چلیا کہ ایہہ نوکری مستقل نہیں ہوئے گی بلکے حکومت نے ایہناں عورتاں نوں کنٹریکٹ اُتے بھرتی کیتا اے۔ بالکل اونج ای جویں تعلیمی شعبے وچ ٹیچر تے دوجے ملازماں نوں پہلے کنٹریکٹ اُتے بھرتی کر لیا جاندا اے تے قریب تن ورھے بعد ایہناں نوں اک سسٹم دے تحت ریگولر کر لیا جاندا اے پر پچھلے ورہے ایہہ خبراں گردش کرن لگیاں کہ محکمہ بہبود آبادی دیاں عورتاں نوں نوکریاں توں ای فارغ کیتا جا رہیا اے۔ ایہہ خبر میڈیا اُتے چلدے ای ہزاراں ہیلتھ ورکر اپنے معصوم بالاں نوں لے کے لہور مال روڈ جا اپڑیا، اوہناں نے اوتھے دھرنا دے دتا تے بوہت مشکل دے باوجود کئی دن اوتھے احتجاج کردیاں رہیاں، ایہناں دا بس اک ای مطالبہ سی کہ ایہناں نوں مستقل نوکری لئی فوری آڈر کیتے جان جدوں بھُک تے موسم دیاں سختیاں نال نبڑدے ہوئے کئی عورتاں بے ہوش ہو کے ہسپتالاں وچ جا اپڑیا تے حکومتی نمائندیاں دی طرفوں ایہناں نال مذاکرات کردے ہوئے ایہناں نوں یقین دلوایا گیا کہ جلدی ای ایہناں نو ں محکمہ بہبود دے شعبے وچ مستقل بھرتی دے آرڈر لبھ جان گے پر ہجے تیکر انج دے کوئی احکاما ت جاری نہیں کیتے گئے۔ صرف نو ہزار روپئے ماہانہ تنخواہ پان والی ورکر گرمی سردی وچ رکشیاں گڈیاں دا کرایہ دے کے تے دیگر اخراجات چُک کے کئی ورھیاں توں اک جذبے دے تحت کم کر رہیاں نیں تے جدوں سرکار دی طرفوں ایہناں دی نوکری نوں پکا کر دتا جائے گا تے اوہ سمجھن گیاں کہ ایہناں نوں ایہناں دی دی خدمتاں دا وادھو معاوضہ لبھ گیا اے۔
