جہڑے بندے نوں سائنس دا کجھ نہیں پتہ اوہ اپنے آپ نوں سائنس دا امام سمجھدا اے: مفتی منیب

کراچی: چن دے معاملے تے وزارت سائنس تے رویت ہلال کمیٹی وچ اختلاف، فواد چودھری دے ٹویٹ تے چیئرمین رویت ہلال کمیٹی مفتی منیب الرحمان آکھیا جہڑے بندے نوں سائنس دا کجھ نہیں پتہ اوہ اپنے آپ نوں سائنس دا امام سمجھدا اے۔ چیئرمین مرکزی رویت ہلال کمیٹی مفتی منیب الرحمان نے اپنے اک بیان وچ آکھیا اے ایہ کہڑی کتاب وچ لکھیا اے کہ چن دے سائز توں تریخ دا تعین کیتا جائے، فواد صاحب، ایہ سائنس تے مذہب دوواں اعتبار نال پہلی دا چن سی، قمری مہینے دی 29تریخ نوں جے چن غرو ب آفتاب دے بعد موجود اے پر نظر نہ آئے تے مہینہ 30دا قرار پائے گا پر اگلی شام تک ایہدی عمر 24گھنٹے ودھ جائے گی ایس لئی نسبتاً وڈا نظر آئے گا۔ خیال رہوے پچھلے دیہاڑ وفاقی وزیر سائنس و ٹیکنالوجی فواد چودھری دا ٹویٹر تے اک تصویر شیئر کردیاں کہنا سی کیہ ایہ پہلی دا چن اے؟ کیہ سورج دے غروب ہون دے بعد اینی دیر چن سر آسمان رہندا اے؟ عوام آپ فیصلہ کر لین۔