ساڈی سرکار کاغذی کاروائیاں دی بجائے عملی اقدامات اُتے یقین رکھدی اے: عثمان بزدار
لہور: وزیراعلیٰ پنجاب عثمان بزدار آکھیا اے ماضی وچ ترقی صرف کاغذاں وچ سی، ساڈی سرکار کاغذی کاروائیاں دی بجائے عملی اقدامات اُتے یقین رکھدی اے۔ عثمان بزدار نے اپنے بیان وچ آکھیا ہن ترقی زمین اُتے نظر وی آندی اے، تحریک انصاف دی سرکار یکساں ترقی دے ویژن اُتے یقین رکھدی اے، پسماندہ علاقیاں تے وڈے شہراں وچ عوامی ضرورتاں دا تعین کرکے ترقیاتی منصوبے شروع کیتے گئے نیں، پنجاب دا کوئی شہر، قصبہ تے دیہات ترقی دے ثمرات توں محروم نہیں رہوے گا۔ وزیراعلیٰ پنجاب نے ہور آکھیا جنوبی پنجاب دے پسماندہ ضلعیاں نوں ترقی دے سفر وچ یکساں اہمیت دتی جا رہی اے، پنجاب سرکار 2ورھے وچ کئی سپیشل اکنامک زون تے کم شروع کر چکی اے، بہت جلد بہاولپور وچ سپیشل اکنامک زون تے کم شروع کر رہے آں، جنوبی پنجاب وچ مدر اینڈ چائلڈ، کارڈیالوجی تے جنرل ہسپتال بنا رہے آں۔
